Sarakyas
Kapitulo 1
Say Tawag
nin Sumublí kunan Katawan
1 Sa ikawalon bulan nan ikarwan panaon na ni Daryos, say
saritá nan Katawan rinmaté ya kunan mamamadles
si Sakaryas anak nin lalaki na ni Berekyas, anak nin lalaki
na ni Idó:
2 “Si Katawan sabtan sager na kunran
pupuon muyo. 3 Kanyá ibaritá muyo kunran sarban
tutawo: Siti pa a wanan Katawan nin Makapangyadian: ‘Sumublí
kamuyna kungko,’ nibaritá nan Katawan nin Makapangyadian,
‘tan sumublí ako lí sa kumuyo,’
wanan Katawan nin Makapangyadian. 4 Andí kamo wanin
bilang saray pupuon muyo, nin nangipatandá ran mamamadles
intaw: Siti pa a wanan Katawan nin Makapangyadian: ‘Igurot
muyuynay saray duká nin gawá tan saray duká
nin ugalí.’ Balé kai kamo rumngé
udino umamingaw sa kungko, nipatandá nan Katawan.
5 Adti saraynay pupuon muyo sawanin? Tan saray mamamadles,
kai para mabyay sara anggan-angga? 6 Balé saray saritá
tan saray nipataoy ko, nin biniblin ko kunran aripen kon
mamamadles, kai para saran nanambot kunran pupuon muyo?
“Kaaram nagbabawí sara tan wanra,
‘Si Katawan nin Makapangyadian ginwá na kuntamo
a manepeg kunran saray gawá tan saray ugalí
tamo, bilang sa dalawen nin gaw´en na.”
Si Tawon
Lalaki sa Pibutlayan ran Kuyon Mirtos
7 Sa ikaruwam-puló tan ápat nin awro sa ikalabin-saya
nin bulan, sa bulan nan Sebat, sa ikaruwan panaon na ni
Daryo, say saritá nan Katawan rinmaté ya kunan
mamamadles si Sarakyas anak nin lalaki na ni Berekyas, anak
nin lalaki na ni Idó.
8 Sin sa yabi main sirmata ko, tan itaw sa
adapan ko main tawo nin lalaki a nakasaklang kunan múdit
nin kabayo. Nakádeng sara sa pibutlayan ran kayon
mirtos sa keras. Sa gurot na main nin múdit, makayumanggi
tan maputí nin kukabayo.
9 Tinepet ko, “Ani sarayti, apo ko?”
Si anghil nin mampag´irgo sa kungko nangumbat ya,
“Ipákit ko lí no nai sara.”
10 Kaaram si tawon lalaki a nakádeng
sa pibutlayan ran kayon mirtos binanggit na, “Sísaray
nibakí nan Katawan nin mako sa sarban kamimínan
sa babon lutá.”
11 Tan dinarom ra kunan anghil nan Katawan
nin nakádeng sa pibutlayan ran kayon mirtos, “Nako
kamina sa sarban kamimínan sa babon lutá tan
nákit mi nin mategen tan matinek anay sansinakban
.”
12 Kaaram si anghil nan Katawan wana, “Katawan
nin Makapangyadian, paani káteng nin mangitawir kan
kádwan kunra sa Herusalen tan kunra sa bubabali nan
Huda, ket pitumpuló nin pananaon kaynan masager kunra?”
13 Kanyá si Katawan inirgo nay mapangawánan
tan manguyong nin susaritá kunan anghil nin nag´irgo
sa kungko.
14 Kaaram si anghil a mampag´irgo sa
kungko wana, “Ipatandá moy saritá: “Siti
pa a wanan Katawan nin Makapangyadian: “Sabtan imon
ko kunran Herusalen tan Siyon, 15 tan sabtan sager ko kunran
pakababalyan a maligyas a kaingaran ra. Masager ako pa tamó
nin bugá, balé sabtan tuloy a ginwá
muyo sa panunusa.’
16 Kanyá siti pa a wanan Katawan;
“Sumublí ako lí sa Herusalen nin main
kádwan, tan itaw ipádeng anamana a bali ko.
Tan say panukatan maipánat lí anggan sa Herusalen,’
nipatandá nan Katawan nin Makapanyadian.
17 “Ipatandá et: Siti pa a wanan
Katawan nin Makapangyadian: ‘Saray babali ko masurok
nin aligwas sara lí anamana, tan si Katawan manguyong
ya lí anamana kunan Siyon tan pilien nayay Herusalen.’”
Ápat
Saklot tan Ápat Maong nin Mangwá
18 Kaaram tinmangar ako, tan itaw sa adapan ko main ápat
saklot. 19 Tinepet ko kunan anghil nin mampag´irgo
sa kungko, “Ani sarayti?”
Inumbat nako, “Sarayti pa a saklot
nin nangitayak kunran Huda, Israil tan Herusalen,”
20 Kaaram si Katawan nipákit na kungko
ápat nin maong mangwá. 21 Tinepet ko, “Ani
lí a gaw´en ra?”
Inumbat nako, “Sarayti pa a saklot
nin nangitayak kunan Huda pinggat kasa gapo a makaitágay
nin ulo ra, balé saray maong nin mangwá marat´anan
saran manglímo kunra tan lumaban sara nin main saklot
kunran pakababalyan nin nangitágay ray saklot ra
subag sa lutá nan Huda a nangitayak kunran tutawo
ra.”
Ipatuloy et...
