2 Samwil - Máran Tarato nan Biblya

1 Nayadí a patiti na ni Saul, si Dabid sinmublí ya nangibwat nin manlumaban kunran Amalekitas tab nabatí ya sa Siklag rway awro. 2 Sa ikatlon awro main sayan tawo a rinmaté nin nangibwat sa pididinepan nin manglalaban na ni Saol ket main bisang a aysing na tan main tápok yay ulo na. Sin nako ya kuni Dabid, kinmayupá ya sa lutá nin migalang ya kuna.

3 “Adti ka nibwat?” Tinepet naya ni Dabid kuna.

Nangumbat ya, “Linmayas ako sa pididinepan ran Israilita.”

4 “Ani nangyadí?” Tinepet na ni Dabid. “Ibaritá mo kungko.”

“Saray tutawo tinmakris sara sa pilalaban,” inumbat na, “Abaw saray nangimlay tan nati. Tan si Saul tan si anak na si Dyunatan nati sara.”

5 Kaaram si Dabid nibaritá na kunan anak-anaken nin lalaki a nangituntong nin patandá, “Páno mon tandá nin nati sara si Saul tan si anak na si Dyunatan?”

6 “Main pa nin nangyadí nin itaw ako sa Talugtog nan Gilboa,” a wanan anak-anaken nin lalaki, “tan itaw ya si Saul, man´umirig ya kunan paná na, ket adani saraynay mangamat kuna nin main ruranan ra. 7 Sin nagbinring ya tan nákit nako, kinayaban nako, tan wangko, ‘Ani magwá ko?’

8 “Tinepet nako, ‘Síno ka?’

“ ‘Amalekiti ako pa,’ Inumbat ko.

9 “Báyo nibaritá na kungko, ‘Umdeng kadti pa sa adani ko tan patyen nakuyna! Pangingitpel akuynan adani sa patiti, balé mabyay ako et.’

10 “Kanyá nakaumdeng ako sa kadani na tan pinati kuya, baná ta tandá ko nin nayadí yan natumba kai magwá yan makapakabyay. Tan kinalap koy balanget sa ulo na tan say singsing takyay na tan inawit ko saradti nin isublí ko kunan apo ko.”

11 Kaaram si Dabid tan sara ngámin nin tutawo a mikalamó na ket rinabnot tan binisang rayay uaysing ra. 12 Nibaliwan tan sinmangit sara tan nangilin sara anggan yabi baná kunra ni Saul tan si anak na si Dyunatan, tan baná sa pididinepan nin manglalaban nan Katawan tan baná kunan babalyan nan Israil, baná ta nangimlay sara sa gayang.

13 Si David wana kunan anak-anaken nin lalaki a nangitungtong nin patandá kuna, “Taga adti ka?”

“Anak nakon san´ili, Amaletiki ako,” inumbat na.

14 Si David tinepet naya, “Mambalé kai ka gapo malímon mamatágay gamet mo a mangmati kunan nakatalaga nan Katawan?”

15 Kaaram si Dabid kinayab nayay sayan tawo na tan wana, “Mako kayna ta patyen muya!” Kanyá pinati naya tan nati ya. 16 Kanyá si Dabid nibaritá na kuna, “Say dayá mo isen ya lí sa ababon ulo mo. Say bebey mo ket napanekenekan subag sa kumo sin wamo, ‘Pinati kuyay nakatalaga nan Katawan.’”

Pangabet-abetan na ni Dabid baná kunra ni Saul tan si Dyunatan

17 Inawit nayay pangabet-abetan na ni Dabid maipáká kunra ni Saul tan si anak na si Dyunatan, 18 tan ginan-gan na saray tutawo nan Huda nin maiyakay yayti a tugtog nin Pangabet-abetan kunan Paná (nasurat yayti sa Basawnen nan Dyaspar):

19 “Say gasilla a isen ya pinatí sa pupurod muyo, Israil.
Páno kadí nin nangimlay saray makapangyayadí!

20 “Andí muyo ibaritá sa Gat,
andí muyo mipataoy sa dudalan nan Askalon,
pinggat kai sara rumiriket saray ának bubbayi nin Pilistyos,
pinggat kai sara mariga saray ának bubbayi nin kai naturí.

21 “Tutalugtog sa Gilboa,
sawá pa kumon a kasa kamon dyang tan rapeg,
sawá pa kumon a kasan rumapeg sa natirasan lalawak muyo.
Baná ta say kasalag ran makapangyayaydí ket naguraan sara,
say kasalag na ni Saul kai yayna nakwan nin ladak.

22 “Nangibwat sa dayá ran pinatí,
nangibwat sa lalaman ran makapayayadí,
say paná na ni Dyunatan kai ya gapo ginmurot,
say gayang na ni Saul kai ya sinmublí nin ambó napdá.
23 Si Saul tan si Dyunatan—
sa byay nakawánan tan narabayan sara,
tan sa patiti kai sara naisyay.
Madadaras sara et dyan saray agila,
maéget sara et dyan saray lyon.

24 “Ának bubbayi nin Israil,
umabet-abet kamo baná kuni Saul,
pinasulutan na kamo say múdit tan saray sangkaandaan nin uaysing,
pinaarkusan na saray uaysing muyo a main arkos nin balitok.

25 “Páno kadí nin nangimlay saray makapangyayadí!
Si Dyunatan isen ya pinatí sa pupurod muyo.
26 Bumaliwan ako baná sa kumo, busat kon Dyunatan;
mabli ka sa pusó ko.
Makakángapan say adó mo kungko,
abaw et nin makakángapan dyan sa kunran bubbayi.

27 “Páno kadí nin nangimlay saray makapangyayadí!
Nasidá anay agamiren sa bakal!”

Ipatuloy et...