Isikyel
Kapitulo 1
Say Kataránan
nin Sirmata na ni Isikyel
1 Sa ikalabin-tulo nin panaon, sa ikápat nin bulan
sa ikaliman awro, antaran ako sa pibutlayan ran napakalayasan
adani nan Ilog Kebar, nibuká saray lulangit tan main
nákit kon sirmata nan Dyos.
2 Sa ikaliman bulan—ikaliman panaon
ya kunan pakalayasan na ni Adí Wakin—3 say
saritá nan Katawan rinmaté ya kuni Isikyel
nin sanguti, anak nin lalaki na ni Busi, sa adani nan Ilog
Kebar sa lutá ran Babilunyos. Say gamet nan Katawan
itaw ya sa kuna.
4 Kinmastang ako, tan main nakít kon
aramag nin lumiwá sa amyanan—say sabtan kalakyan
nin gunem a main mankumidlap nin kimat tan nalibedan ya
kunan maslag nin palaway. Say butlay nan apoy ket kabakas-bakas
nin mankumalay a mámot nin pasak, 5 tan sa rarem
nan apo main pa a kabakas-bakas bilang ápat a mangkabyay
nin katawuan. Sa bakas say dimlog ra ket bilang nin tawo,
6 balé sinása saran main ápat nin rupa
tan ápat nin pakpak. 7 Matarangkad saray paa tan
bisit ra; saray ayi ra bilang kunran uybon nin baka tan
sinmalag bilang a pinasileng nin tansó. 8 Sa sirong
pakpak ra sa ápat nin riking ra main gamet nin tawo.
Saran ápat main rupa tan pakpak ra, 9 saray pakpak
nan saya nakudit saray pakpak ran raruma. Sinása
sara tumúrir nin nako; kai sara gapo tinmikó
leg´an saran inmalis.
10 Saray rupa ra kabakas-bakas bilang nin
wanti: sinása saran main ápat rupa nin tawo,
tan say riking sa wanan ra sinása saran main nin
rupa nan liyon, tan sa wiri main rupa nan lalakin baka;
sinása sara anamaet nin main rupa nan agila. 11 Sarain
pa a rupa-rupa ra. Sinása saran main ruway pakpak
nin naipánat sa atágay, say sinásan
pakpak mankuditen na saray raruman katawuan mataman sa ruwan
riking ra; tan sinása saran main ruway raruman pakpak
nin mansakban a lalaman ra. 12 Sinása saran tumúrir
nin nako. Adtiman a mako yay kararwa, mako sara, kasa mantumikó
leg´an saran nako. 13 Say bakas ran mankabyay nin
katawuan bilang sa manpuuran nin uring nan apoy udino bilang
nin tyó. Say apoy ket inmalis sa anunor tan sa sulong
sa pibutlayan ran katawuan; maslag ya, tan kinmidlap yay
kimat sa liwá na. 14 Saray katawuan pinaspas saran
inmalis sa anunor tan sa sulong bilang sa kidlap nan kimat.
15 Leg´an kon pinastang saray mangkabyay
nin katawuan, main nákit kon bantulin sa lutá
adani sa sinásan katawuan nakalamó kunran
saray ápat nin rupa ra. 16 Siti pa a bakas tan pádeng
ran bantulin: Kumidlap sara bilang nin tupasyo, tan saray
ápat ket mikabakas sara. Sinása saran barámo
nakagwá nin bilang sayan bantulin a mampisisná
kunan sayan bantulin. 17 Leg´an saran inmalis, mako
sara sa animan saya kunran ápat nin pangiwanwan a
inadap ran katawuan; saray bantulin ket kai sara gapo nagbaliw
sa pangiwanwan ra leg´an saray katawuan nin nako.
18 Saray rigrigan nan bantulin ket atágay tan makapakángap
sara, tan saray ápat nin rigrigan nan bantulin ket
napnó saran mumata sa ngámin nin libed.
19 Sin inmalis saray mangkabyay nin katawuan,
inmalis saray bantulin sa kadani ra; tan sin inmatágay
saray mangkabyay nin katawuan nangibwat sa lutá,
inmatágay saray bantulin anamaet. 20 Adtiman mako
saray kararwa, mako sara anamaet, tan mikalamó saray
bantulin nin umatágay a mikalamó kunra, baná
ta say kararwa ran mangkabyay nin katawuan itaw sara sa
bantulin. 21 Sin inmalis saray katawuan, inmalis sara anamaet;
sin nisaet saran nakádeng saray katawuan, nisaet
saran nakádeng anamaet; tan sin inmatágay
saray katawuan sa lutá, saray bantulin inmatágay
sara nin mikalamó kunra, baná ta say kararwa
ran mangkabyay nin katawuan itaw sara sa bantulin.
22 Naipánat sa atágay nan ulo
ran mangkabyay nin katawuan barámon sayan bagay bilang
nin simburyo udino arko, nin mankumidla-kidlap bilang nin
sarming, tan makapakángapan ya. 23 Sa sirong nan
simburyo saray pakpak ra naipánat sara saya sa pangiwanwan
ran raruma, tan sinása saran main ruway pakpak nin
mansakban a lalaman ra. 24 Sin inmalis saray katawuan, narngé
koy tunoy ran pakpak ra, bilang nin danurdor a umagos nin
ranom, bilang sa busngaw nan Makapangyayaydí, bilang
sa kagargaran ran pididinep nin makilaban. Sin nisaet saran
nakádeng, kinayupá ray pakpak ra,
25 Kaaram main rinmaté nin busngaw
a nangibwat sa atágay nan simburyo sa atágay
ran ulo ra leg´an saran nakádeng kalamó
saray nayupá nin pakpak. 26 Sa atágay nan
simburyo sa atágay ran ulo ra main barámon
mararem nin maleas a tekré nin kapangyadian, tan
sa atatágay et nan tekré nin kapangyadian
main a kurti bilang nin sayan tawo. 27 Nangibwat kuna siin
nákit koy barámo sa atágay nan awak
na bilang nin mankumalay a mámot nin pasak, barámon
napnó nin apoy, tan nangibwat kunan siin itaw sa
yupá barámo yan apoy; tan nalibedan yan maslag
nin palaway. 29 Bilang sa bakas nan kabunlalakaw sa gugunem
a rumapeg nin awro, wanin lamang a kaslag nin linmibed kuna.
Siti pa a bakas na bilang sa kaalagawan
nan Katawan. Sin nákit kuya, nanabó akon palukob,
tan narngé koy busngaw nan síya mampag´irgo.
Ipatuloy et...
