Nihimiyas - Máran Tarato nan Biblya

Sa bulan nin Kislew sa ikalabin-rwan taon, antaran nin itaw ako sa padil nin gaway sa Susa, 2 si Hanani, síyay sayan busat ko, nibwat kami sa Huda nin nakikalamó mi saray umnon raruma nin tutawo, ket tinepet mi kunra maipáká sa natrá nin Hudyo a mabyay et sa palayasan, tan maipáká sa Jerusalen anamaet.

3 Wanra kungko, “Saray mabyay et sa palayasan tan saray nakasublí sa prubinsya ket magunigon saran alaki tan kinalawakaw sara. Nasidá yay padil nan Herusalen, tan napuuran et a pasrepan na.”

4 Sin narngé ko kunran sarayti, tinmekré tan sinmangit ako. Kunan umnon uawro ket nabaliwan tan nangilin tan dinmasal ako kunan Dyos sa langit. 5 Mísa wangko:

“Katawan, si Dyos sa langit, si makapangyayadí tan makapakángap nin Dyos, síyay maglayon kunan pangakó nin adó kunran saray mangadó kuna tan maglayon sa gan-gan na, 6 Aburuyan mo pay tutulyan mon mapiga-pigaw tan bukaen moy mata mo nin reng´en may dasal nan aripen mo a mandumasal kumo sa awro tan yabi baná sa kunran uaripen mo, saray tutawo nan Israil. Akuen koy kasalanan a ginwá mi, saray Israilitas pati síkon bukod tan saray pamamali nan tatay ko, nin naisubag sa kumo. 7 Sabtan kadukaan a uawey mi kumo. Kai mi gapo nin tinmukid sa bibilin, sa pataoy tan sa gan-gan mo a binyan mo kunan aripen mo si Muyses.

8 “Mapanemtem moy pamibilin a nibi mo kunan aripen mo si Muyses, man´ibaritá mo. ‘No kai ka matunong, itayak-tayak taka lí sa pibutlayan ran pupagilyan, balé no sumublí ka sa kungko tan tumukid ka sa bibilin ko, báyo taman no saray tutawo mon napalayasan ket itaw sarayna sa sangkaadayó a miabot nin tamuraw, ket dinepen ko saradtaw tan awiten ko sara sa kamínan a pinilí kon piikapan baná sa ngaran ko.’

10 “Aripen mo sara tan tutawo mo sara nin nambot mo kunan alakin kasaw mo tan kunan magsen nin garamay mo. Katawan, aburuyan mo pay tutulyan mon mapiga-pigaw kunan dasal nan aripen mo tan sa dasal kunran aripen mo nin maririket a magalang sa ngaran mo. Byan mo saray aripen mo nin aligwas sawanin tan aburuyan mo kuna a pangangádo mo sa adapan nan sitin tawo.”

Síko pay aripen sa panginuman nan adí.

Ipatuloy et...