2 Pakaulitan - Máran Tarato nan Biblya

1 Si Sulumon anak nin lalaki na ni Dabid naibangon nayay kadiryan nan máget kunan pag´adian na, baná ta si Katawan nin Dyos na nikalamó naya tan ginwá nayan makapangyayadí nin masuruk-surok.

2 Kaaram nag´irgo ya kunra ngámin nin Israil—kunran mangingigan-gan nin susanribo tan kunran mangingigan-gan nin susanyasot, kunran mangungukon tan kunra ngámin nin pangulo sa Israil, saray pangulo nin pamamali—3 tan si Sulumon tan sarba ran pidudupong nako sara sa atágay nin kamínan sa Gabaon, baná ta itaw yay sirungan nan Katawan nin pidudupungan, nin nipádeng na ni Muyses, síyay aripen nan Katawan, sa kaatapan. 4 Sawanin si Dabid inulí nayay kahon nan Dyos nangibwat sa Kiriat-Hearim nin mako sa kamínan a nisadyá ra, baná ta namádeng yan sirungan na sa Herusalem. 5 Balé sitaw say tansó nin pamatágayan a gingwá ni Besalel anak nin lalaki na ni Uri, anak nin lalaki na ni Hor, itaw ya sa Gabaon sa adapan nan alakin sirungan nan Katawan; kanyá si Sulumon tan saray pidudupong tinepet raya itaw. 6 Si Sulumon nulí ya sa tansó nin pamatágayan sa adapan nan katawan sa sirungan nin pidudupungan tan nidáton nay sanribon napuuran nin dáton itaw.

7 Kunan yabi si Dyos pinapákit ya kuni Sulumon tan wana kuna, “Dumawat ka animan a rabay muko nin byan sa kumo.”

8 Si Sulumon inumbat naya si Dyos, “Nipákit mo payna a makapangyayadí nin kamaungan kuna ni Dabid nin tatay ko tan ginwá nako payna nin adí sa kasunuran na. Sawanin, Katawan nin Dyos, aburuyan muyo pa a nipangakó mo kuni tatay kon Dabid pinggat maipanenek ya, baná ta ginwá nakon adí kunran tutawo nin kábawan bilang tápok sa babon lutá. 10 Byan muko pa nin kadunungan tan pakatandá, pinggat mamatunong ko saray tutawo, ket so síno a makauray lí kunran alaki nin tutawo mo?”

11 Wana ni Dios kuni Sulumon, “Baná ta siti yay apes nan pusó mo tan kai ka dinmawat nin kayamanan, saray gargaret udino say galang, udino nin say patiti kunran kabunó mo, tan baná ta kai ka dinmawat a anron byay no kai dinmawat ka tamó nin kadunungan tan pakatandá pinggat makauray mo saray tutawo ko nin ginwá takan adí, 12 kanyá say kadunungan tan say pakatandá a maibyan lí kumo. Tan byan taka anamaet nin kayaman, gargaret tan galang, bilang a kasa gapon adí sa intaw tan kasa gapo et sa mayadí kumo nin magkamain lí.”

13 Kaaram si Sulumon nako ya sa Herusalem nangibwat sa atágay kamínan sa Gabaon, nangibwat báyo sa sirungan nin pidudupungan. Tan nag´uray ya kunan Israil.

14 Si Sulumon naninep yan saray rururan tan saray kabayo; nagkamain ya nin labin-ápat yasot nin rururan tan labin-ápat yasot nin kabayo, nin niyator na sa bubbali nin ruran tan sa kuna anamaet sa Herusalem. 15 Si adí nipakábawan nay pirak tan balitok bilang nin bubato sa Herusalem, tan bilang sa kayon kalantas nin kábawan bilang sa kukayon sikumuro-igos sa pupurod. 16 Sara kabayo na nin Sulumon ket inangkat sara sa Ehipto tan sa Kue—saray maglalakó nan adí sinaliw ra sa Kue sa báyon bili. 17 Inangkat rayay sayan ruran sa Ehipto nin binayad ran ánem yasot nin plata nin pirak, tan sayan kabayo binayad ran sanyasot tan limampuló. Nirururan ra et nin ilakó kunra ngámin nin uadí ran Hititas tan saray Aramyos.

Ipatuloy et...