Si Huswí nasuyó yan mangangatabay
1 Nayadí patiti na ni Muyses síyay aripen nan Katawan, si Katawan wana na kuna ni Huswí anak nin lalaki na ni Non, katulungan na ni Muyses: 2 “Si Muyses nin aripen ko nati yayna. Mísa sawanin, síka tan sarban sarayti nin tutawo, misadyá kamuyna nin rumipay sa Ilog nin Hurdan ta mako kamudtaw sa lutá nin ibi ko lí kunra—kunran saray Israylita. 3 Ibi ko lí sarban kamínan nin madádaan ran ayi muyo leg´an nan nipangakó ko kuna ni Muyses. 4 Say kamínan muyo maabot lí nin nangibwat sa makrang nin kamínan anggan itaw sa Libano, tan nangibwat sa alakin ilog, say Ewpratis—sarban babalyan ran Hitita—anggan sa Baybay nan Mediteranyo itaw sa panrupa. 5 Kasa gapo lí nin saya a makapakádeng subag sa kumuyo sa sarban uawro nin biyay muyo. Bilang kuna ni Muyses, kalamúnen taka; kai taka gapo lí nin lakwanan udino layasan. 6 Magsen tan matpel ka pa, baná ta mangantabay ka lí kunran saraytin tutawo pinggat matawir ray lutá nin sinambawan ko kunran kap´unan ra a ibi ko kunra.

7 “Magsen tan matpel kan maong. Pakandá ka nin tumulok sa sarban gan-gan a nibi nan aripen ko si Muyses sa kumo; andí ka bumring kunan siti nin mamawanan udino mamawiri, tano maaligwas ka lí no adtiman mo mako. 8 Iyator maytin Pamasawan nin Gan-gan naynay sa labí mo; umámeng ka kuna sa awro tan sa yabi, pinggat pakandaen mo kumon nin gaw´en sarban naisurat na. Mísa ka lí nin umasinso tan maaligwas. 9 Kai ko para nin ginan-gan kumo? Magsen tan matpel ka. Andí ka malímo; andí ka tumapó sa nakem, baná ta si Katawan mon Dyos kalamuen na ka adtiman kan mako.”

10 Kaniyá si Huswí binibilin na saray pangulon ran tutawo: 11 “Mako kamo sa pisisirungan tan ibaritá muyo kunran tutawo, ‘Isadyá muyuynay ikabyay muyo. Sa tulon awro nangibwat sawanin rumipay kamo sa Hurdan a iti kamo nin sumrep tan ikunen muyoy lutá nin man´ibi nan Katawan muyon Dyos nin ikon muyon diri.”

12 Balé kunran Rubenita, saray Hadita tan saray kapikngá nin kapupuryan ran Manases, wana ni Huswí, 13 “Panemtemen muyoy gan-gan na ni Muyses si aripen nan Katawan nin nibi na sa kumuyo nayadí nan nibaritá sa kumuyo, ‘Si Katawan muyon Dyos mami ya lí nin painawa muyo sa kunan pamyan nan sitin lutá sa kumuyo.’ 14 Saray asawan babayi, saray ának tan saray ayep sa patatalon magwá saran mabatí sa lutá nin nibi na kumuyo ni Muyses itaw sa baytan nan Hurdan, balé saray tawon lalaki nin manglalaban, misadyá kamo sa pakikilaban, ta matkap kamon rumipay sa adapan ran kababalyan muyon Israylita. Tumulong kamo kunra anggan maibi nan Katawan say kunran painawa, bilang ginwá na sa kumuyo, tan anggan makalap ra anamaet a lutá nin pagkaikon ra a man´ibi nan Katawan nin Dyos muyo sa kunra. Báyo kunan siin, makasublí kamuyna lí tan magkamínan kamuynan lutá muyon diri, ket siti pa a nibi na ni Muyses síyay aripen nan Katawan sa kumuyo itaw sa baytan nan Hurdan adap nan kabubuklas.”

16 Kaaram inumbat raya si Huswí, “Animan mo kamin ginan-gan gaw´en mi lí, tan adtiman mo kamin ibakí itaw kami mako lí. 17 Bilang sa panunukid mi kuna ni Muyses, tumukid kami lí sa kumo. Sawá pa kumon tamó si Katawan mon Dyos kalamuen naka bilang kuna ni Muyses. 18 Sínuman a sumuknod subag kunan saritá mo tan kai naya tukiden, animan a ginan-gan mo sa kunra, maiká sara lí sa patiti. Magsen tan matpel kayna tana.”

Huswí

Kapitulo 2

Si Rahab tan saray Maninirib
1 Kaaram si Huswí anak nin lalaki na ni Non budí nan nangibakí ruwa ray maninirib nangibwat sa Sitim. “Mako kamuyna, kikiten muyoy lutá,” wana, “lalun-laluyna sa Heriko.” Kanyá nako sara tan sinumrep rayay bali nan balangkantis nin nangaran na Rahab tan itaw sara niikap.

2 Si adi nan Heriko naibaritá kuna, “Kikiten mo pa umnon saray Israylita rinmaté saradtin yabi a manirib-sirib kunan lutá.” 3 Kanyá si adí nan Heriko namáwit yan patandá kuna ni Rahab: “Palwaen mo saray tawon lalaki nin nako sa kumo tan sinumrep sara sa rarem nan bali mo, baná ta nako saradti nin manirib-sirib kunan sarban lutá.”

4 Balé si tawon babayi kinalap na sara tan niyadi na sara. Wana, “Ó, saray tawon lalaki nako sara sa kungko, balé kai ko tandá no adti sara nangibwat. 5 Sa patpaapon, sin takdá anan salambanen a luuban nan padil sa babali, linmakwan sara. Kai ko tandá ni adti sara nako. Tumumbok kamuynan tampor kunra. Banglí maabutan muyo sara et.” 6 (Balé niká na sara sa tuktok nan bali na tan niyadi na sara sa sirong ran tangkay nin diilon tanaman a niáprak na sa atep.) 7 Kanyá saray tawon lalaki adap saraynan mangamat kunran maninirib sa dalan nin mako sa maababon uilog nan Hurdan, tan sin nayadí saray mangangamat nin linmuwá, sinalamban ray luuban nan padil.

8 Báyo saray maninirib nin miidá ana sa yabi, nako ya sa tuktuk nan bali na tan wana kunra, “Tandá ko pa nin binyan nayaytin lutá ni Katawan sa kumuyo tan main alakin límo sa kumuyo a narat´anan mi, kanyá sarban mampiikap kunan sitin babalyan mantumunaw sara sa límo baná sa kumuyo. 10 Narngé mi nin pinakrang nan Katawan a ranom sa Baybay nin Múdit sa pakatkapan muyo sin limwá kamo sa Ehipto, tan say ginwá muyo sa Sihon tan sa Og, saray ruwan adí ran Amuryo sa baytan nan Hurdan, ket ganap muyon dinaeg. 11 Sin nakarngé mi kunan sarayti, natunaw sa límo a nakem mi tan nasaew a pakatpelen ran barang saya baná sa kumuyo, baná ta si Katawan muyon Dyos síyay Dyos sa lulangit nin atágay tan sa balon lutá sa ayupá.

12 “Mísa sawanin, sumamba kamo pa sa kungko kunan Katawan nin mangipákit kamo lí nin pangangádo kunran pamamali ko, baná ta nangipákit ako nin pangangádo sa kumuyo. Byan rako pay peteg nin panlawan a iligyas mo saray byay ran tatay tan nanay ko, saray bubsat ko, tan sarban kanayon ra—tan iligyas muyo kami sa patiti.”

14 “Say byay mi tumangen sa byay muyo!” saray tawon lalaki sinaew ra sa kuna. “No kai mo ibaritá a man´gaw´en mi, maong tan matunong kami lí kumuyo mísa nayan ibi ni Katawan a luta sa kumi.”

15 Kanyá pinayupá na sara sa dudungawan kunan rubir, baná ta say balin niikap na sakop ya sa padil nan babali. 16 Wana kunra, “Mako kamo yapó sa pupurod pinggat kai ra kamo madumog saray mangangamat kumuyo. Umadi kamon bukod itaw nin tulon awro anggan rumaté sara, tan mísa mako kamuyna lí.”

17 Sawanin saray tawon lalaki wanra kuna, “Sitin samba nin pinagawá mo nin sinambawan mi kai ya magkaukol sa kumi, sin sumrep kami lí sa lutá, dapot no itaker mayti a múdit nin rubir sa dudungawan nin pinayupá mo kumi, tan dapot no níras mo saray tatay tan nanay mo, saray bubsat mo tan sarban pamamali mo sa rarem nan sitin bali. 19 No sínuman sa kunra nin lumiwá kunan sitin bali nin mako sa dalan, say dayá ra itaw yayna lí sa ulo ran diri; kasan pangungumbatan mi lí. Balé kunran saray nakalamó mo sa rarem nan bali mo, say dayá ra iti ya lí sa ulo mi no main gamet nin mangket sa kunra. 20 Balé no ibaritá moy man´gaw´en mi, kai ana lí magkaukol a samba nin pinagwá mo nin sinambawan mi.”

21 “Nakiayon ako,” nangumbat ya. “Wanin man a nibaritá muyo.”

Kanyá nibakí na sara, tan nibwat sarayna. Tan tinaker nayay múdit nin rubir sa dudungawan na.

22 Sin linmakwan sarayna, nako sara sa pupurod tan niikap saradtaw sa tulon awro, anggan saray mangangamat sa kunra nadumog raynan sarban dalan ket sinmublí sarayna baná ta kasan nadumog ra sa kunra. 23 Kaaram saray ruway tawon lalaki tinmaraná saraynan sumublí. Kinmayupá sara sa pupurod, rinmipay sara sa maababon ilog tan rinmaté sara kuna ni Huswí anak nin lalaki na ni Non tan nibaritá ra ngámin a nangyadí sa kunra. 24 Wanra kuna ni Huswí, “Si Katawan saew nan nibi ngámin a lutá sa gamet tamo; sarban tutawo mantumunaw sara sa límo baná sa kuntamo.”

Ituloy et ...