Habakok - Máran Tarato nan Biblya

Darom na ni Habakok
2 Paani káteng, Katawan, matkap kon tumawag kunan tulong mo, balé kai ka rumngé? Udino umagrang akuyna sa kumo, “Pakaraetan!” balé kai ka mangiligyas? 3 Mambalé ipagawá ma kungko nin mangkit sa ambó matunong? Mambalé itpelen mo a kamamalí? Saray pakasidaan tan pakaraetan iti sarayna sa adapan ko; main nin pakaawayan, tan abaw tuloy pisasangkinyan. 4 Kanyá lalatoy yaynay gan-gan, tan kai gapo makábawan a katunungan. Saray maraet ikulong na saray matunong, kanyá naraet a tunong.

Ubat nan Katawan
5 “Kikiten mo saray pakababalyan tan mamantay ka—tan ganap kan mikángap lí. Baná ta main gaw´en ko lí sa pananaon mo nin kai mo lí nin tepren, taman no naibaritá ya kumo. 6 Gulu-guluwen ko sara lí saray Babilunyos, saraytaw nin tutawo a maraksá tan malabas nin birus-biros, sísaray lumabas-labas sa babon lutá a manamsam nin bubali a kai ra ikon. 7 Makalilímo tan makapalínek saran tutawo; sísaray gan-gan a kunran bukod tan itantudó ray galang ran diri. 8 Saray kabayo ra ket madadaras et dyan saray lyupardo, mababayani et dyan saray lubo sa patpaapon. Saray kabalyerya ra mangred nin lumuksu-luyso sara nin madarakudak; saray manrumuran kunran kabayo rumaté sara nin mangibwat sa adadayó. Lumpad sara bilang nin agila a mantebangen nin mangpos; rumaté sara ngámin panggep sa pakaraksaan. Saray alalakin pididinepan ra sumulong sara bilang nin siri sa makrang nin kamimínan tan maninep saran nadadakepan bilang say buyangin. 10 Manuyá-tuyá ra saray adí tan kantyawan ra saray mag´uuray. Kakálisen ra saray sarban babali nin napadil; baná ta mamádeng saran tangkar kunan lutá ket madakepan ra sarayna. 11 Kaaram lumabas-labas sara bilang nin siri tan tumuloy-tuloy sara—saray makasalanan nin tutawo, ket say kasaw ran diri siin a dyos ra.”

Ikarwan daron na ni Habakok
12Katawan, kai para ka a nangibwat sa magnayon nin anggan-angga? Dyos ko, Síyay Madyusan ko, kai ka gapo nin mati. Síka, Katawan, sinuyó muko nin mangikuri a pangungukom; síka, Bato ko, binibilin mo sarayna nin manusa sara. 13 Maringgas tuloy saray mata mo nin mamastang kunan maligno; kai mo gapo itpelen a kamamalí. Mambalé det nin itpelen mo saray maliput-lipot? Mambalé makaklek ka leleg saray maraet inamil na saraynay matutunong et dyan kunran bukod? 14 Ginwá mo saray tutawo bilang nin kuná sa taaw, bilang nin kaayepan sa taaw nin kasan mag´uray. 15 Saray maraet nin kabunó bilwiten na sara ngámin lí kunan kawil na, dakpen na sara sa eket na, dinepen na sara sa karudkod na; tan kanyá gumayágá ya tan maririket ya. 16 Kanyá midáton ya kunan eket na tan mamuor yan insinso kunan karudkod na, baná sa eket na miikap ya sa pakaririktan tan marabay-rabay nay sangkatawayan nin kanen. 17 Magwá yan tumuloy nin mangápos kunan nakalap sa eket na, mansidaen nay pakababalyan nin kasan kádwan?

Ipatuloy et...