Hob
Kapitulo 1
Pangitaraná
1 Sa lutá nan Us main tawo a miikap
itaw a naingaran ya nin Hob. Sitin tawo kasa gapo nin sesel
na tan mapapteg ya; nagalang ya kunan Dyos tan kinaday´an
nay duká. 2 Main piton ának nan lullaki tan
tuloy ának nan bubbayi, 3 tan nagkamain yay piton
ribo nin mimí, tulon ribo nin kamilyo, liman yasot
a babalataynan nin baka tan liman yasot nin asno, tan abaw
bilang nin alilá na. Síya pa a sangkamakapangyayadí
nin tawo sa sarban tutawo sa Baytan.
4 Saray ának nin lalaki main pakan
ra sa bali ra kunan awron nikaiyanak ra, tan sagyaten ra
saray tulon bubsat ran bubbayi a mangan tan minum nin nakikalamó
ra. 5 Sin mayadí anay udas nin mampakan ra, si Hob
mangwá yan sadyaan kunran saray ának na pinggat
mapasudí sara. Sa masakbay nin buklas mangatang yan
puuran nin dáton sa kunran sinása ket siti
a man´isipen na, “Banglí saray ának
ko nagkasalanan tan nilunod rayay Dyos sa pusó ra.”
Siti pa a kaugalian a naynay nan gaw´en.
6 Sayan awro saray uanghil nako sara nipadar
kunan Katawan, tan si Satanas nayi ya kunra. 7 Si Katawan
wana kuna ni Satanas, “Adti ka mibwat?”
Si Satanas inumbatan nayay Katawan, “Manlumiwad
ako pa sa babon lutá nin mampakudti-pakudtaw.”
8 Báyo si Katawan wana kuni Satanas,
“Napiga-pigaw maynay aripen ko nin Hob? Kasa gapon
makapada kuna sa babon lutá; kasa gapo nin sesel
na tan mapapteg ya; síyay tawo a magalang kunan Dyos
tan kumaday´an ya sa duká.”
9 “Magalang ya si Hob baná sa
kasa?” inumbat na ni Satanas. 10 “Kai para mon
nangiká nin salaban sa libed na tan kunran pamamali
na tan sarban ikuna? Binasbasan mo a gawá nan gamet
na, kanyá saray mumanok na tan saray uayep na ket
naitayak sara sa sarban kamimínan. 11 Balé
sawanin ipánat moy gamet mo tan bingkasen mo ngámin
nin ikuna, tan talaga ya lí nin milunod ya sa rupa
mo.”
12 Wana ni Katawan kuni Satanas, “Sigi det, sa ngámin
nin ikuna sa pakayadí muyna, balé si tawo
nin kunan diri andí mo ipakudit a garamay mo.”
Kaaram si Satanas linmakwan was sa adapan
nan Katawan.
13 Sa sayan awro sin saray ának na
ni Hob mampakan sara tan mampinum saran arak sa bali nan
kakan busat ra, main naibakí a nako kuna ni Hob tan
wana, “Saray baka mampangadado sara tan saray asno
manpakanen sara sa adanin lalawak, ket saray Sabyos tinmalikdas
sara tan tinakaw ra ngámin a uayep. Pinati ra ngámin
nin alilá sa gayang, tan síko tamó
a nakalayas nin mangibaritá kumo!”
16 Antaran yan mampag´irgo et, main
anamanay raruman naibakí a rinmaté tan wana,
“Say puor nan Dyos nanabó nangibwat sa langit
tan napuuran ngámin a mimí tan saray mangalilá,
tan síko tamó a nakalayas nin mangibaritá
kumo!”
17 Antaran yan mampag´irgo et, main
anamanay raruman naibakí a rinmaté tan wana,
“Saray Kaldyos nagpuruk-purok saran pitutulo nin mampanamsam
ket madaras saran kinmayupá kunran kamilyo tan tinakaw
ra ngámin. Pinati ra ngámin nin alilá
sa gayang, tan síko tamó a nakalayas nin mangibaritá
kumo!”
18 Antaran yan mampag´irgo et, main
anamana et a raruman naibakí a rinmaté tan
wana, “Saray ának mo mampakan sara tan mampinum
saran arak sa bali nan kakan busat ra, ket karam-aram main
maksaw nin bagyo nangibwat sa kamínan nin mabuyangin
a kasan tumubó tan sinmiplog sa ápat duyo
nan bali. Naybá ya sa ababo ra tan nati sara, tan
síko tamó a nakalayas nin mangibaritá
kumo!”
20 Kunan siti, si Hob inumdeng ya tan binisang
nayay anron aysing na tan kiniskis nay ulo na. Mísa
nanabó ya lutá nin sumamba 21 tan wana:
“Lus´ok labos ako nin nangibwat
sa pianakan nan nanay ko, tan lus´ok labos lí
nin mibwat ko. Si Katawan a nami tan si Katawan a mangalap;
sawá pa kumon nin raywen a ngaran nan Katawan.”
22 Kunan ngámin ti, si Hob kai
ya nagkasalanan nin mansumelsel kunan Katawan sa pagkamalian.
Ipatuloy et...
