Saray Mangungukom
Kapitulo 1
Sara si Israil lumaban sara
kunran natrá nin Kanayos
1 Nayadí sa patiti na ni
Huswí, saray Israylita tinepet ra kunan Katawan,
“Síno lí tumaraná a umadap nin
lumaban subag kunran Kananyo?”
2 Inumbat nan Katawan, “Saray Huda
a mako; Nigawang kuyna a kamínan nin lutá
sa gamet ra.
3 Saray tawon lalaki nan Huda mísa
wanra Simyunita saray kababalyan ran Israylita, “Pari
atamo sa kamínan a nabyan kumi pigaw makalaban atamo
subag kunran Kananyo. Síkami anamaet lamang makikalamó
atamo sa kamínan muyo.” Kanyá saray
Simyunita nakikalamó sara kunra.
4 Sin sinmarked saray Huda, si Katawan nibi
na saray Kananyo tan saray Perisyo sa gamet ra, tan dinaeg
ra saray mapuló ribo nin tawon lalaki sa Besek. 5
Itaw pa nákit raya si Adí-Besek tan linaban
raya, tan dinaeg ra saray Kananyo tan saray Perisyo. 6 Si
Adí-Besek tinmakris ya, balé kinamat tan dinakep
raya, tan pinutol rayay tangan nin gamet tan ayi na.
7 Karaam wana ni Adí-Besek, “Pitumpuló
a uadí nin naputulan rayay tangan nin gamet tan ayi
ra ket maninep kanen ra sa sirong nan dunguan ko. Sawanin
si Dyos namalé yayna kungko sa ginwá ko kunra.”
Níras raya sa Herusalen, tan itaw yan nati.
8 Saray tawon lalaki nan Huda sinarked rayay
Herusalen tan kinalap raya. Niká rayay babali kunan
gayang tan pinuuran raya.
9 Mísa kunan siin, saray Huda adap
saran lumaban subag kunran Kananyo a mampiikap itaw sa kamínan
nin pupurod, sa Negeb tan sa panrupan pupurod. 10 Sinmulong
sara subag kunran Kananyo a mampiikap sa Hebron (Kiryat-Arba
a gindat ngaran) tan dinaeg na sara sa Sesay, sa Ahiman,
tan sa Talmay. 11 Nangibwat itaw tinmuloy saran nako subag
kunran tutawo a mampiikap sa Debir (Kiriat Seper a gindat
ngaran).
12 Tan wana ni Kaleb, “Ibi kuya lí
si anak kon babayi si Aksa nin ipakasal kunan tawon lalaki
nin sumarked tan mangalap kunan Kiryat Seper.” 13
Si Utunyel anak nin lalaki na ni Kenas, ari na ni Kaleb,
kinalap naya; kanyá si Kaleb nibi nayay anak nin
babayi kuna nin ipakasal.
14 Sayan awro si Aksa nako ya kuna ni Utunyel,
inayat naya nin dumawat ya kuna ni tatay na no magwá
nin maikon nay lutá. Sin kinmayupá ya kunan
ruran nan asno, si Kaleb tenepet na kuna, “Ani magwá
kon rabay mo?”
15 Inumbat ya, “Kumawid ako pa tana
kadí. Baná ta binyan nakuynan lutá
sa Negeb, byan muko pa anamaet nin bubukal.” Kanyá
si Kaleb binyan naya saray atatágay tan ayuyupá
nin bubukal.
16 Saray kapuryan nin katyangan na ni Muyses,
saray Sinyo, adap saran nako sa Babalin Kayo nin Anahaw,
kalamó na saray tutawo nan Huda nin miikap sa pibutlayan
ran tutawo sa Makrang Lutá nan Huda sa Negeb adani
sa Arad.
17 Kaaram saray tawon lalaki nan Huda nako
sara nin mikakalamó kunran Simyunita sísaray
kababalyan ran Israilita tan sinarked ra saray Kananyo a
mampiikap sa Sepat tan ganap ran nasidánen a babali.
Kanyá pinangaran yan Hurma. 18 Saray Hudah dinaeg
na sara anamaet sa Gasa, sa Askalon tan sa Ekron; barang
nin babali pati sakop ran kamínan lutá.
19 Si Katawan nakalamó na saray tawon
lalaki nan Huda. Nangikon rayay babalyan nin pupurod, balé
kai sara gapo nakadagdag nin lumakwan kunran tutawo sa lalawak,
baná ta binakal rayay ruranan ra. 20 Kunan naipangakó
na ni Muyses, say babalin Hibron naibi ya kuna ni Kaleb,
síyay nakadagdag nin lumakwan kunran saray tulon
ának nin lalaki na ni Anak. 21 Balé saray
Behamita, kai ra nakadagdag nin lumakwan kunran Hibusyo
a mampiikap sa Herusalen; anggan sawanin saray Hibusyo mampiikap
saradtaw nin nakalamó ran Behamita.
22 Sawanin saray kakanayon na ni Husi sinarked
rayay babali nin Bit´el tan si Katawan nikalamó
ya kunra. 23 Sin nangibakí saran tawon lalaki nin
manirib sa Bit´el (Los a gindat ngaran na), 24 saray
maninirib main nákit ran tawon lalaki nin lumwá
sa babali tan wanra kuna, “Ipákit mo kumi nin
páno sumrep sa babali tan ipákit mi lí
a maong nin ugalí sa kumo.” 25 Kanyá
nipákit na kunra, tan niká rayay babali kunan
gayang balé niligyas rayay sayan tawo tan sarban
pamamali na. 26 Mísa yan nako ya sa lutá ran
Hitita, itaw ya namádeng nin babali tan pinangaran
na Los, ket ngaran na in anggan sawanin.
27 Balé saray Manases kai raya gapo
nakadagdag nin lumakwan kunran tutawo sa Bit´San udino
sa Taanak udino sa Dor udino sa Iblyam udino sa Migido tan
saray sakop ran kamínan, ket saray Kananyo maksaw
nakem ran miikap kunan siin a lutá. 28 Sin nag´in
saraynan maksaw saray Israil, dinagdag na saray Kananyo
sa gawá nin mapilit balé kai ra sara gapo
nakadagdag nin lumakwan ganap sa kunra. 29 Udino saray Eprain
kai ra sara gapo nakadagdag nin lumakwan kunran saray Kananyo
a mampiikap sa Geser, balé saray Kananyo tinmuloy
saran miikap itaw sa pibutlayan ra. 30 Udino et saray Sabulon
kai ra sara gapo nakadagdag nin lumakwan saray Kananyo a
mampiikap sa Kitron udino sa Naalal, kanyá saraytin
Kananyo niikap sa pibutlayan ra, balé saray Sabulon
dinagdag na sara sa gawá nin mapilit. 31 Udino et
saray Aser kai ra sara gapo nakadagdag nin lumakwan kunran
saray mampiikap sa Akko udino sa Sidon udino sa Alab udino
sa Aksib udino sa Hilba udino sa Apek udino sa Rihob. 32
Saray Aser niikap sa sara sa pibutlayan ran tutawon Kananyo
kunan lutá baná ta kai ra sara gapo nakadagdag
nin lumakwan sa kunra. 33 Udino et saray Neptali kai ra
sara gapo nakadagdag nin lumakwan kunran mampiikap sa Bet
Syimes tan Anat Bet; balé saray Neptalita anamaet
niikap sara sa pibutlayan ran tutawon Kanayo kunan lutá,
tan saray mampiikap sa Bet Syimes tan Anat Bet nag´in
saran maggagawá nin mapilit sa panggepen ra. 34 Saray
Amuryos napukpukan na saray Danita sa balbalyan nin pupurod,
kai raya inaburuyan nin kumayupá sa lalawak. 35 Tan
saray Amuryos maksaw nakem ran maglayon sa Talugtog nan
Heres, sa Ahalon tan sa Saalbim, balé sin inmalaki
a pakayadí ran kakanayon nan Husi, nadagdag sara
anamaet sa gawá nin mapilit. 36 Say ketegan ran Amuryos
ket nagibwat sa Dalan nan Sipitan anggan sa Sila tan anggan
labas nan ketegan.
Saray Mangungukom
Kapitulo 2
Si Anghil
nan Katawan itaw sa Bukim
1 Si anghil nan Katawan nangibwat sa Gilgal nako ya sa Bukim
tan wana, “Níras takamo sa liwá nan
Ehipto tan inantabay takamo sa lútá nin sinamba
kon ibi kunran pupuon muyo. Wangko, ‘Kai ko gapo sumubag
sa pipagketan ko sa kumuyo, 2 tan kai kamo mipagketan kunran
tutawo kunan sitin lutá, balé sidánen
muyoy surong ra.’ Anta sinmubag kamo sa kungko. Mambalé
ginwá muyuyti? 3 Wangko anamaet, ‘Kai ko sara
lí dagdagen nin lumakwan sa adapan muyo; mag´in
sara lí nin láwan a makalap sa kumuyo, tan
saray dyos ra manginláwan sara lí sa kumuyo.’”
4 Sin si anghil nan Katawan nibaritá
na saraytin bubabay kunran sarban Israylita, saray tutawo
sinmangit saran maksaw, 5 tan ningaran rayaytaw nin kamínan
Bukim. Itaw dinmáton saran pangitayaan kunan Katawan.
Say Panubag
tan say Daeg
6 Nayadí na ni Huswí nin pinauwí saray
Islaylita, nako sara nangalap a pagkaikon ra kunan lutá,
barang sa kunran tawir ran diri. 7 Saray tutawo naglingkod
sara kunan Katawan leg´an sa byay na ni Huswí
tan kunran saray pupuon nin mabyay et mayadí sa kuna
tan nákit ran sarban alakin bubarang nin ginwá
nan Katawan sa panggepen ran Israil.
8 Si Huswí anak nin lalaki na ni Non,
síyay aripen nan Katawan, nati ya sa taon nan sanyasot
tan mapuló. 9 Tan nitabon raya sa luta nan tawir
na, sa Timnat Heres itaw sa babalyan nin pupurod nan Eprain,
sa amyanan nan Talugtog nin Gaas.
10 Nayadí kunran sarban kararakan
nin naipadinep sa kunran pupuon ra, main raruman kararakan
nin inmalaki a kai man makatandá kunan Katawan udino
ani a ginwá na sa panggepen ran Israil. 11 Kaaram
saray Israylita ginmawá saran kadukaan sa pangikit
nan Katawan tan naglingkod sara kunran Baal. 12 Nalingatan
rayay Katawan, si Dyos ran pupuon ra, nin síyay nangíras
sa kunra sa liwá nan Ehipto. Sinmunor tan sinmamba
ra saray nagsikabarang nin dyos a nangibwat kunran tutawo
sa kalibedan ra. Naninreg yay sager nan Katawan baná
ta nalingatan raya tan sinmamba sara kuna ni Baal tan saray
Astarot. 12 Sa sager na subag kunran Israil si Katawan nibi
na sara sa gamet ran tulisan a nagulí-ulí
sa kunra. Nilakó na sara sa gamet ran kabunó
ra sa sarban kamimínan, sa kunra kai rayna makatpel.
15 Tepé saray Israil nin umadap sa laban, say gamet
nan Katawan sumubag ya sa kunra nin dumaeg sa kunra, bilang
sa sinambawan na sa kunra. Naanggawan sara sa alakin pangingitpel.
16 Kaaram si Katawan nanuyó ya nin
saray mangungukom, sísaray nangiligyas sa kunra sa
gáget ran tulisan. 17 Anta kai sara rumngé
kunran mangungukom ra balé nilakó ray lalaman
ra bukod kunran raruman dyos tan sinmamba sara kunra. Umanunor
saran tampor sa kaugalian ran pupuon, sísara pay
matalek kunan gan-gan nan Katawan. 18 Si Katawan tepé
nan manuyó a mangungukom pigaw makaligyas sa kunra,
kalamó nayay mangungukom tan linigyas na sara sa
gáget ran kabunó ra leg´an nin mabyay
ya et a mangungukom; si Katawan nangipákit yan kádwan
baná sa kunran man´umareng´eng ra sa
sirong ran nanguyáyan tan nangidyádyá
kunra. 19 Balé sin nati yaynay mangungukom, saray
tutawo sinmublí sarayna sa kaugalian ra nin taman
et maligno dyan kunran saray pupuon ra, mantumbuken ra saray
raruman dyos tan mampaglingkod tan mansumamba sara sa kunra.
Umandí sara nin lumakwan sa kunran duká nin
pitatawo ra tan matib´ey ulo nin kaugalian ra.
20 Kanyá si Katawan sabtan sager
na kunan Israil tan wana, “Baná ta sitin babalyan
sinmubag sara sa pipagketan nin naibangon ko a nibi ko kunran
pupuon ra tan kai sara nangingar sa kungko, 21 Kai kuyna
lí dumagdag sa adapan ra saray barang babalyan nin
naibatí na ni Huswí sin nati ya. 22 Umagamir
ko sara lí nin subuken saray Israil tan kikiten no
ipatuloy ray kaugalian nan Katawan tan no ilalako ra bilang
ginwá ran pupuon ra.” 23 Si Katawan inaburuyan
na saray babalyan nin mabatí; kai na sara dinagdag
tampor nin nibi sa gamet na ni Huswí.
