Esdras - Máran Tarato nan Biblya

1 Sa ikataraná nin taon na ni Siro adí nin Persya, pigaw matukid a saritá nan Katawan nin inirgo na ni Heremyas, si Katawan tininreg nayay pusó na ni Siro adí nin Persya a mangwá yan pakaipatandá sa sarban pag´adian na tan ipasurat na anamaet:

2 “Siti pa a wana ni Siro adí nin Persya:

“‘Si Katawan, si Dyos sa langit, binyan nako sarban pupag´adian sa babon lutá tan sinuyó nakon mamádeng a simbawan nin ikuna sa Herusalen itaw sa Huda. 3 Sínuman a tutawo na sa pibutlayan kumuyo makapako kamo sa Herusalen itaw sa Huda tan mamádeng a simbawan nan katawan, síyay Dyos nan Israil, síyay Dyos nin itaw sa Herusalen, tan sawá pa kumon si Dyos ra nin makikalamó ra. 4 Tan adtiman sa pupurok a main mabyay et nin mampiikap, saray tutawo matkap ran pamimi kunra nin pirak tan balitok, nin gargaret tan saray bubaka, tan saray dudaton nin mabulos nakem nin idáton sa simbawan nan Dyos sa Herusalen.’”

5 Báyo saray pangungulon pamamali na ni Huda tan si Benhamin, saray sanguti tan saray Lebitas--sara ngámin nin tutawo a pusó ray natinreg nan Katawan--misadyá kamon mako tan mamádeng a bali nan Katawan sa Herusalen. 6 Sara ngámin nin kabaraybay ra tinmulong sara nin namyan a nagsikabarang nin main pirak tan balitok, main gagaret tan bubaka, tan main pamyan nin mabli, tan maikalamó et sarban dudáton nin mabulos nakem.

7 Saya et, si Adí Siro niliwá na saray agamiren sa simbawan nan Katawan, ket kinalap na sarayti intaw ni Nebukudunusor nangibwat sa Herusalen tan niká nasara sa simbawan nan dyos na. 8 Si Siro adí nin Persya nibakí naya si Mitridatis, síyay bantay sa kayamanan, nin nangíras sa kunra tan binilang na sara kuna ni Sesbasar, síya anak nan adí sa Huda,.

9 Sarayti pa a bilang ran agamiren:

lipong nin balitok 30
lipong nin pirak 1,000
pangwan nin pirak 29
10 yawong nin balitok 30
mapadis a yawong nin pirak 410
raruman gargaret 1,000

11 Sa ngámin, main nin 5,400 a gargaret nin balitok tan pirak. Si Sesbasar inawit na sarayti tan nakikalamo na saray napalayasan sin nako sarayna nangibwat sa Babilunya anggan sa Herusalen.

Ipatuloy et...