Mangingibanyá 1 - Máran Tarato nan Biblya

3 Ani magagap ran tutawo sa sarban kapagalan ra nin itaw sara gumawá sa sirong nan awro?
4 Saray kararakan rumaté sara tan saray kararakan lumakwan sara,
balé maituloy yay babon lutá anggan-angga.
5 Lumwá yay awro tan sumrep yay awro,
tan madalí yan sumublí sa adti yan linumwá.
6 Sumiplog yay siri sa bagatanan
tan tumursi ya sa amyan;
tumursi-tursi yan mako,
ket sumublí yan tumaraná.
7 Sarban karayan umagos sa taaw,
balé kai ya gapo mapnó a taaw.
Sa kamínan ran karayan sa pangibwatan ra,
itaw sara sumublí anamana.
8 Makapagal saray sarban bubagay,
Abaw et dyan saya a makabaritá.
Say mata ket kasan sadag nan mampákit,
udino say tutulyan kunan punó nan mamparngé.
9 Animan wantaw, wanti lí anamana,
animan a nangyadí, mangyadí lí anamana;
Kasa gapo nin báyo sa sirong nan awro.
10 Main animan nin maibaritá nan saya,
“Kikiten mo! Siti e a báyo”?
Iti yayna pa sin saytaw;
Iti yayna intaw báyo sa panaon tamo.
11 Kasa gapo nin mapanemtem kunran saray gindat nin kararakan,
tan taman kunran kai et nin rinmaté
kai sara lí mapanemtem
kunran saray tumumbok kunra.

Kasan gagará nin Kadunungan
12 Síko, si Mangangakay, adí ako intaw nan Israil sa Herusalen. 13 Inagamir a nakem ko nin mag´adal tan dumugen ko sa kadunungan sarban nagawá sa sirong nan langit. Aninay byat nan pakaidapan a niká nan Dyos kunran sarban tutawo! 14 Nákit kuyna pa ngámin a nagwá sa sirong nan awro; sarba sara kasan gagará, bilang yan mangamat sa siri.

15 Animan a baswing kai makapánat;
animan a kurang kai maibilang.

16 Nibaritá sa kadiryan ko, “Kikiten mo pa, pinakábaw koy kadunungan ko dyan kunran sínuman nin nag´uray sa Herusalen báyo ko intaw; abaw a nangyadí kungko sa kadunungan tan sa pakatandaan,” 17 Kaaram inagamir sa kadiryan ko nin makataros sa kadunungan, tan anamaet sa kaluangan tan sa kalungasan, balé naadal kuyayti anamaet, bilang yan mangamat sa siri.

18 Baná sa kábawan nin kadunungan rumaté a kábawan nin bereng; sa kábawan nin pakatandaan, abaw et a reré.

Ipatuloy et...