Sa Taraná
1 Sa taraná, si Dyos ginwá na saray lulangit tan say babon lutá. 2 Sawanin say babon lutá kasa et dimlog na tan kasan laman na et, say dedlem itaw ya sa babó nan ararem, tan si Kararwa nan Dyos manlumpad yan lumibed-libed sa babo ran ranom.

3 Tan wanan Dyos, “Aburuyan ma padtaw pinggat main kumon nin palaway,” tan nagkamain nin palaway. 4 Si Dyos nakit nayay palaway nin maong ya, tan inisyay nayay palaway kunan dedlem. 5 Si Dyos pinangaran nayay palaway “awro” tan say dedlem “yabi.” Tan nagkamain a yabi, tan nagkamain a buklas—siti pa a ikataraná nin awro.

6 Tan wanan Dyos, “Aburuyan ma padtaw pinggat main kumon a kamínan bilang sa atep nin nakapaalawang a naisálé kunran ranom pinggat maisyay saray ranum kunran ranum.” 7 Kanyá si Dyos ginwá nayay kamínan bilang sa atep nin nakapaalawang tan inisyay nayay ranum sa sirong nan kamínan bilang sa atep nin nakapaalawang nangibwat sa ranum nin itaw sa tágay na. Tan nagkamain saryaytin pagé. 8 Si Dyos pinangaran nayay kamínan bilang sa atep nin nakapaalawang “langit.” Tan nag´in yan yabi, tan nag´in yan buklas—say ikarwan awro.

9 Tan wanan Dyos, “Aburuyan ma pa saray ranom sa sirong nan langit nin madinep sara sa sayan kamínan, tan aburuyan ma pa nin ipákit yay makrang nin kamínan.” Tan nagkamain saryaytin pagé. 10 Si Dyos pinangaran nayay makrang nin kamínan “lutá,” tan saray nadinep nin ranom pinangaran na sara “taaw.” Tan nákit nan Diyos nin maong yayti.

11 Kaaram wanan Dyos, “Aburuyan ma pay lutá a pamainen na saray tanaman: saray bumungan biní nin tanaman tan saray kayo sa lutá nin bumungan bunga nin main bikoy sa rarem ra, kumaná sa kunran nagsikababarang ra.” Tan nagkamain saryaytin pagé. 12 Say lutá pinamainen ya saray tanaman: saray tanaman a manbumungan biní kumaná sa kunran kababarang ra tan saray kayo a manbumungan bunga nin main bikoy sa rarem ra kumaná sa kunran kababarang ra. Tan nákit nan Diyos nin maong yayti. Tan nag´in yan yabi, tan nag´in yan buklas—say ikatlon awro.

14 Tan wanan Dyos, “Aburuyan ma pa saray palaway sa kamínan bilang sa atep nin nakapaalawang sa langit nin isyay yay awro kunan yabi, tan aburuyan ma pa nin masakop sara sa panlawan nin makaaram sa pananaon nin madyusan, tan saray uawro tan saray panaon, 15 tan aburuyan ma pa nin mag´in sara nin palaway sa kamínan bilang sa atep nin nakapaalawang sa langit pinggat maipalaway ya sa babon lutá.” Tan nagkamain saryaytin pagé. 16 Si Dyos nangwá yan rwa ray alalaki nin palaway—say alalaki et nin palaway mag´uray sa awro tan sa madaité et nin palaway mag´uray sa yabi. Ginwá na anamaet saray bituen. 17 Si Dyos niká na sara sa kamínan bilang sa atep nin nakapaalawang sa langit pinggat maipalaway ya sa babon lutá, 18 pinggat mag´uray sara kunan awro tan yabi, tan pinggat maisyay yay palaway kunan dedlem. Tan nákit nan Diyos nin maong yayti. 19 Tan nag´in yan yabi, tan nag´in yan buklas—say ikápat nin awro.

20 Tan wanan Dyos, “Aburuyan ma pay ranom nin mapnó a mabyay nin kaayepan, tan aburuyan ma pa saray manuk-manok nin lumpad sa tágay nan babon lutá nin rumubarí sa kamínan bilang sa atep nin nakapaalawang sa langit.” 21 Kanyá si Dyos ginwá na saray alalaki nin kaayepan sa taaw tan sarban mangkabyay nin barang a namnó sa ranom tan saray kumimey sa rarem, kumaná sa kunran kababarang ra. Tan nákit nan Diyos nin maong yayti. 22 Si Dyos binasbasan na sara tan wana, “Mibunga-bunga kamo tan umabaw kamo sa bilang tan pun´en muyoy ranum kunran saray taaw, aburuyan ma pa nin umabaw saray manuk-manok sa babon lutá.” 23 Tan nag´in yan yabi, tan nag´in yan buklas—say ikaliman awro.

24 Tan wanan Dyos, “Aburuyan ma pay lutá nin mapamainen saray mankabyay nin kaayepan kumaná sa kunran kababarang ra: uayep sa pagtatalon, saray kaayepan nin kumayam-kayam sa lutá, tan saray ayep talon, saya tan saya kumaná sa kunran kababarang ra.” Tan nagkamain saryaytin pagé. 25 Si Dyos ginwá na saray ayep talon kumaná sa kunran kababarang ra, saray ayep sa patatalon kumaná sa kunran kababarang ra, tan sarban kaayepan nin kumayam-kayam sa lutá kumaná sa kunran kababarang ra. Tan nákit nan Diyos nin maong yayti.

26 Kaaram wanan Diyos, “Aburuyan ma pan mangwá tamon tawo kunan aninagan tamo, kunan bakas tamo, pinggat makauray sara kunran kuná sa taaw tan kunran manuk-manok sa langit, kunran ayep sa pagtatalon tan kunran ayep talon, tan kunran sarban kaayepan nin kumayam-kayam sa lutá.”

27 Kanyá si Dyos ginwá nayay tawo kunan aninagan nan diri, sa aninagan nan Dyos ginwá na sara; lalaki tan babayi ginwá na sara.

28 Si Dyos binasbasan na sara tan wana kunra, “Mibunga-bunga kamo tan umabaw kamo sa bilang; pun´en muyoy babon lutá tan ipanumbukan muya. Mag´uray kamo kunran kuná sa taaw tan kunran manuk-manok sa langit tan kunran sarban mangkabyay nin kaayepan a kumayam-kayam sa lutá.”

29 Kaaram wanan Dyos, “Ibi ko kumuyo sarban tanaman a bumungan biní sa rupa nan babon lutá tan sarban kayo a bumungan bunga nin main bikoy sa rarem na. 30 Tan sarban ayep sa babon lutá tan sarban manuk-manok sa langit tan sarban kaayepan nin kumayam-kayam sa lutá—sarban main inawa nin biyay sa rarem ra—Ibi ko kumuyo sarban malibuyong nin tanaman a kanen muyo.” Tan nagkamain saryaytin pagé

31 Si Dyos nákit na ngámin a ginwá na, tan nákit nan maong yaytin talaga. Tan nag´in yan yabi, tan nag´in yan buklas—say ikánem awro.

Pangibwatan

Kapitulo 2

1 Kanyá saray lulangit tan say babon lutá nayadí sarayna sa
sarban nagnap nin dinep ra.

2 Sa ikapiton awro si Dyos nayadí nayna a gawá nan man´gaw´en na; kanyá sa ikapiton awro nagpainawa ya sa sarban gawá na. 3 Mísa si Dyos binasbasan nayay ikapiton awro tan ginwá nayan madyusan, baná kunan siin nagpianawa ya sa sarban gawá nin mampangwá a ginwá na.

Si Adan tan si Iba
4 Siti pa a naisurat nin nangyadí kunran lulangit tan say babon lutá sin nagwá sara, sin si Katawan nin Dyos ginwá na saray babon lutá tan saray lulangit.

5 Sawanin kasa et nin palungpong a nákit sa babon lutá tan kasa et nin tanaman a tinmubó, baná ta si Katawan nin Dyos kai na et nipáwit sa rapeg sa babon lutá tan kasa et gumawá sa lutá, 6 balé main subor nin linumwá sa babon lutá tan nambó yay sarban babo nan lutá . 7 Mísa si Katawan nin Dyos ginwá nayay tawo nangibwat sa tápok nan lutá tan ninawá na kunan árong nan tawo say inawá nin byay, tan si tawo nag´in yan mangkabyay nin pagkamain.

8 Sawanin si Katawan nin Dyos nangmula yan pangmulawan sa baytan, sa Eden; tan niká nayay tawo itaw nin nadimlog na. 9 Si Katawan nin Dyos ginwá na saray nagsikabarang nin kayo a tumubó sa lutá—saray kayo nin maandá sa mata tan mataway nin kanen. Sa butlay nan pangmulawan itaw saray kayo nin byay tan kayo nin pakatandá sa maong tan duká.

10 Main ilog nin mambó kunan pangmulawan nin inmagos nangibwat sa Eden; nangibwat itaw naisyay saran ápat nin pangibwatan ran ilog. Pison a ngaran nan ikataraná nin ilog; umagos yan tumikú-tikó ya sa sarban kamínan nan Habila, nin main itaw a balitok. 12 (Maandá yay balitok kunan itaw a lutá; say mabanglon yatek tan baton unisi mákit saradtaw anamaet.) 13 Gihon a ngaran nan ikarwan ilog; umagos yan tumikú-tikó ya sarban kamínan nan Kus. 14 Tigris a ngaran nan ikatlon ilog, umagos ya sa abay nan Asor sa baytan. Tan Iyuprates a ngaran nan ikápat nan ilog.

15 Si Katawan nin Dyos kinalap nayay tawo tan niká naya sa Pangmulawan nan Eden pinggat main gawá na tan alagawan naya. 16 And si Katawan nin Dyos ginan-gan nayay tawo, “Magwá kan mangan kunran animan nin kayo sa pangmulawan; 17 balé andí ka mangan kunan kayon pakatandá nin maong tan duká, baná ta no mangan ka mati ka lí nin talaga.”

18. Wanan Katawan nin Dyos, “Ambó maandá nin bukod yay tawo. Mangwá ako lí a bagay nin katulong na.”

19 Sawanin si Katawan nin Dyos dinimlog na kunan lutá sarban ayep talon tan sarban manuk-manok sa langit. Inawit na sara kunan tawo pinggat mákit na no ani na sara nin ipangaran; tan animan nin nipangaran nan tawo kunran saya tan saya a mangkabyay nin kaayepan, sitaw a ngaran na. 20 Kanyá si tawo pinangaranan na sara sarban ayep sa pagtatalon, saray manuk-manok sa langit tan sarban ayep talon.

Balé kuna ni Adan kasan nadumog a bagay nin katulong na. 21 Kanyá si Katawan nin Dyos pinakálek nayay tawo a málek nin ararem; tan antaran nan mangkálek, kinalap nayay sayan tagyang nan tawo tan mísa pinikmí nayay laman sa riking nan lalaman. 22 Kaaram si Katawan nin Dyos ginwá nayay tawo nin babayi a nangibwat sa tagyan nin kinalap na kunan tawo nin lalaki, tan níras naya kunan lalaki.

23 Wanan lalaki, “Siti pa sawanin a but´ol nan but´ol ko tan laman nan laman ko; pangaranan ya lí nin ‘babayi,’ baná ta kinalap ya kunan tawo nin lalaki.”

24 Kanyá si tawon lalaki lumakwan ya kunan tatay tan nanay na tan mikalamó ya kunan asawa na, tan mag´in sara nin sayan laman.

25 Si Adan tan si Iba lus´ok-labos saran rwa tan kasan ding´ey nin kaingaran ra.

Ipatuloy et...