Say Dáton nin Mapuuran
1 Si Katawan kinayab naya si Moyses tan kinairgo naya sa sirungan nin pidudupong. Wana, 2 “Mag´irgo ka kunran Israylita tan ibaritá mo kunra: ‘No sínuman sa pibutlayan muyo a mangíras nin dátong kunan Katawan, írasen muyoy dátong nin ayep a nangibwat sa bakid udino sa pangen ran ayep.

3 “‘No say dáton a mapuuran yan dáton a nangibwat sa bakid, ipadáton muyay lalakin ayep a kasan kakurangan na. Matkap muyon ibyan itaw sa luuban nan sirungan nin pidudupong pinggat makaná ya lí kunan Katawan. 4 Iká muyoy gamet sa ulo nan dáton nin mapuuran, tan maakó ya lí sa kumon ngaran nin sa kumon pagbababawí. 5 Patyen mo saray nubilyo sa adapan nan Katawan, tan saray ának nin lalaki na ni Aron saray sanguti írasen ra lí a dayá tan ipursak raya lí sa abay nan patatágayan itaw sa luuban nan sirungan nin pidudupong. 6 Kataten muyay dáton nin mapuuran tan putul-putulen mo sara. 7 Saray ának nin lalaki na ni Aron saray sanguti mangwá sara lí nin apoy itaw sa patatágayan tan sideren ran kayo sa apoy. 8 Báyo saray ának nin lalaki na ni Aron saray sanguti sideren ra lí a natputul-putulan, apti say ulo tan say tabá, sa kayo nin mampuuran itaw sa patatágayan, 9 Ringasen muyoy pati tan say saray paa tan bisit kunan ranom, tan saray sanguti puuran ran sarba itaw sa patatágayan, Siti pa a dáton nin mapuuran, say dáton nin kanen, say sayamusom nin makaririket kunan Katawan.

10 “‘No say dáton a mapuuran yan dáton a nangibwat sa pangen, nangibwat sa mimí udino sa kanding, idáton muyoy lalakin ayep a kasan kakurangan na. 11 Patyen mo sara sa amyanan nin abay nan patatágayan sa adapan nan Katawan, tan saray ának nin lalaki na ni Aron saray sanguti tan ipursak raya lí sa abay nan patatágayan. 12 Putul-putulen mo sara lí, tan saray sanguti sideren ra lí, pati say ulo tan say tabá, sa kayon mampuuran itaw sa patatágayan. 13 Ringasen muyoy pait tan saray paa tan bisit kunan ranom, tan saray sanguti írasen ra lí ngámin tan puuran ra itaw sa patatágayan. Siti pa a dáton nin mapuuran, say dáton nin kanen, say sayamusom nin makaririket kunan Katawan.

14 “‘No say dáton kunan Katawan a dáton nin mapuuran yan manuk-manok, idáton mo saray madidintek a maputí nin kalapati udino saray siwsiw nin kalapati. 15 Saray sanguti írasen ra lí itaw sa patatágayan, sulnuten rayay ulo tan puuran ra itaw sa patatágayan; say dayá ra paturúnen lí sa abay nan patatágayan. 16 Galaten muyoy kulanlan tan sabot ra tan itampal muyo sa yupá sa baytan nan patatágayan itaw kunran naiká nin abunsyang. 17 Bisangen nin ibuká sa pakpak, balé andí muyo a ganap nin pikngaen, tan báyo saray sanguti puuran raya lí sa kayo nin mampuuran ra itaw sa patatágayan. Siti pa a dáton nin mapuuran, say dáton nin kanen, say sayamusom nin makaririket kunan Katawan.

Lebitikos

Kapitulo 2

Say Dáton nin Rinakay
1 “‘No main mangíras a dáton nin rinakay kunan Katawan, say dáton ra mag´in ya kumon nin sangkaandaan nin tapong. Ikwan muyoy ladak nan uliba sa babo na, kwan muyoy insinso sa babo na tan íras muyo kunran ának nin lalaki na ni Aron saray sanguti. Saray sanguti mangalap saran sakagemgem nin tapoy tan ladak, pati sarban insinso, tan puuran ra sarayti a tao nin pakapanenteman itaw sa patatágayan, say dáton nin kanen, say sayamusom nin makapaririket kunan Katawan. 3 Say natrá dáton nin rinakay ikunra yayna ni Aron tan saray ának na nin lalaki; siti pay sangkadyusan a tao nan dáton nin kanen a naibyan kunan Katawan.

4 “‘No mangíras kamon dáton nin rinakay a nalutó sa pugon, isakop muyoy sangkaandaan nin tapong: udino makabpal nin tinapay a ginwá nin kasan pamakumbo tan main ladak nin uliba a nailawok udino maimpis nin tinapay a ginwá nin kasan pamakumbo tan iyapros muyoy ladak nan uliba. 5 No say dáton nin rinakay muyo ket lutuen ya sa mababon kawalí, ipagwá ya sa kunan sankaandaan nin tapong a nakalawok nin ladak, tan kasan pamakumbo. 6 Barí-barien muya tan ikwan man ladak; siti pa a dáton nin rinakay. 7 No say dáton nin rinakay muyo ket nalutó ya sa kawalí, ipagwá ya sa kunan sankaandaan nin tapong tan umnon ladak nan uliba. 8 Írasen muyoy dáton nin rinakay a naipagawá kunran saraytin bubagay kunan Katawan; ibyan ma kunran sanguti, ta awiten ra lí itaw sa patatágayan . 9 Kalapen ra lí a tao nan pakapanemteman nangiwat kunan dáton nin rinakay tan puuran raya itaw sa patatágayan leg´an yan dáton nin kanen, say sayamusom makapaririket ya kunan Katawan. 10 Say natrá a dáton nin rinakay ikunra yayna ni Aron tan saray ának na nin lalaki; siti pay sangkadyusan a tao nan dáton nin kanen a naibyan kunan Katawan.

11 “‘Sarban dáton nin rinakay a írasen kunan Katawan matkap nin ginwá a kasan pamakumbo, ta kai kamo mamuor a mataman anin pamakumbo udino say masam´it nin putyukan sa dáton nin kanen a naibyan kunan Katawan. 12 Magwá mo saran írasen kunan Katawan nin dáton a pilí nin bunga, balé kai sara ipadáton itaw sa patatágayan a makapaririket nin sayamusom. 13 Asinan muyon sarban dáton nin rinakay. Andí muyo luktawan a asin sa kumuyon dáton nin rinakay; ilamó muyoy asin sa sarban dáton muyo.

14 “‘No mangíras kamon dáton nin rinakay a pilí nin bunga kunan Katawan, idáton muyoy báyon napitpit nin rinakay a naibaya sa apoy. 15 Ikwan muyon ladak tan insinso; siti a dáton nin rinakay, 16 Saray sanguti puuran raya lí a tao nan pakapanemteman a napitpit nin rinakay tan ladak, pati sarban insinso, leg´an a dáton nin kanen a naibyan kunan Katawan.

Ituloy et...