Rut
Si Nayumi námet
na saray asawa na tan ának nan lalaki
1 Sa panaon sin saray mangungukon a nag´uray main
pa nin panaon bitil sa lutá. Kanyá main sayan
tawo a taga Belen sa Huda, kalamó na saray asawa
tan ának nan lalaki, ket nako sara miikap ambó
mateng sa balyan nin Muab. 2 Say ngaran nan tawo Elimilik,
say ngaran nan asawa na Nayumi, tan saray ngaran nan rwa
a ának nin lalaki Malon tan Kilyon. Epratyos sara
nin taga Belen, Huda. Tan nako sara sa Muab tan niikap saradtaw.
3 Sawanin si Elimilik, asawa na ni Nayumi,
nati ya, ket bukod yaynan mikalamó kunran rway ának
na tana. Saray lullaki nangasawa saran Muabita nin bubayi,
si saya ngaran na Urpa tan si raruma ngaran na Rut. Nayadí
saran mampiikap itaw a dandanin mapuló taon, sara
si Malon tan si Kilyon nati siran rwa anamaet, tan si Nayumi
bukod yayna a kasan ának nan lalaki tan asawa na.
Si Nayumi tan
si Rut sumublí sara sa Belen.
6 Sin narngé na ni Nayumi sa Muab nin nako yay Katawan
a tulungen na saray ának na nin mampipami a kanen
ra, sinmadyá ya tan saray manuyang na nin mibwat
itaw a mugot saraynan sumublí. 7 Mikalamó
na saray manuyang na, linmakwan ya sa kamínan nin
mampiikapan na tan nibwat sara sa dalan nin sumublí
sa lutá nin Huda.
8 Kaaram wana ni Nayumi kunran manuyan na,
“Mugot kamuynan sumublí, sinása kamo,
sa pamamali nan nanay muyo. Sawá pa kumon nin ipákit
nan Katawan a pangwánan na, bilang sa pangawán
a nipákit kunran asawa muyon nati tan sa kungko.
9 Sawá pa kumon nin sinása kamon ipagámor
nan Katawan a makadumog kamo nin pag´inawnan sa pamamali
nan raruman asawa anamana.”
Kaaram inarkan nasara nin ipatnugot tan nisangit
saran maksaw 10 tan wanra kuna, “Mugot kamin sumiblí
kunran kananayon mo.”
11 Balé si Nayumi wana, “Mugot
kamuynan sumublí, manunuyang ko. Mambalé mayi
kamo kungko? Mianak ako et nin ának nin lalaki a
mag´in nin asawa muyo? Mugot kamuynan sumublí,
manunuyang ko; Akulaw akuynan tuloy nin mangasawa anamana.
Mataman palayi mayá main et nin piuráram ko;
mataman palayi main asawa ko sa yabi tan kaaram nanganak
akon uabing nin lalaki, tumágan kamo anggan umalaki
sara? Maituloy kamon kai mangasawa nin tumágan kunra?
Kai a, manunuyang ko. Abaw et a pait sa kungko dyan san
kumuyo, baná ta say gamet nan Katawan ket sinmubag
na sa kungko!”
14 Kunan siti nisangit saran maksaw anamana.
Kaaram si Urpa inarkan nayan ipatnugot a katyangan na, balé
si Rut yinakap naya.
15 “Kikiten mo,” wana ni Nayumi,
“si aydo mo mugot yaynan sumublí kunran kananayon
na tan kunan didyos na. Mikalamó kayna kunan sumublí.”
16 Balé si Rut nangumbat ya, “Andí
na ko pa kadí a dagdagen nin lumakwan udino gumurot
sa kumo. No adti ka mako itaw ako mako, tan no adti ka mabatí
itaw ako mabatí. Saray kananayon mo mag´in
saran kananayon ko tan say Dyos mo Dyos ko. 17 No adti ka
mati itaw ako mati, tan itaw ako lí nin maitabon.
Sawá pa kumon si Katawan a makikalamó kungko,
taman no pasakitan, taman no patiti nin mangisyay kuntamo.”
18 Báyo na nakadalepdep ni Nayumi nin maksaw nakem
na ni Rut nin mayi ya, tinumgen yan mandumagdag kuna.
19 Kanyá saray rwan bubbayi tinmuloy
sara nin nako anggan naraté rayay Belen. Sin rinmaté
sara sa Belen, sara ngámin sa babali natinreg sara
baná sa kunra, tan saray raruman bubbayi sa babali
tináway ra, “Si Nayumi yain kadí?”
20 “Andí rako tawagen nin Nayumi,”
nibaritá na kunra. “Tawagen rako nin Mara,
baná ta si Makapangyayadí ginwá nayay
byay ko nin sabtan pait. 21 Linmakwan akon napnó,
balé si Katawan nisublí nakon kasan laman.
Mambalé tawagen rako nin Nayumi? Si Katawan pinadyádyá
nako; si Makapangyayadí nangíras nakon kadimalasan.”
22 Kanyá si Nayumi sinmublií
yan nangibwat sa Muab nin nikalamó naya si Rut nin
Muabita, si aydo na, manrumaté sara sa Belen sa kataranaan
nan panaon yatab nin sibada.
