Malakyas- Máran Tarato nan Biblya

“Kai para nin si Isaw busat naya si Hakob?” nipatandá nan Dyos. “Anta kinawánan kuya si Hakob, 3 balé si Isaw ginurá ko, tan ginwá koy pakababalyan nan pupurod a makrang nin kamimínan tan nibatí koy tawir na kunran uaso talon.”

4 Si Idom magawá nin wana, “Taman no narekmó atamo, ipádeng tamo lí anamana saray nakasidá-sidá.”

Balé siti pa a wanan Katawan: “Magawá saran mamádeng, balé yubaen ko lí. Tawagan ko sara lí Lutá nin Kadukaan, saray tutawo a naynay sara sa sirong nin katay sager nan Katawan. 5 Mákit muyo lí kunran mata muyon diri and wamuyo, ‘Maong yay Katawan—pati sa labas ran ketegan nan Israil!’

Mansumubag sa Pangakuan Baná kunran Pangitayaan nin Makakurangan
6 “Si anak nin lalaki igalang nayay tatay na, tan say aripen kunan amo na. No síkoy tatay, adti yay galang nin manepeg sa kungko? No síkoy amo, adti yay kabilangan nin manepeg sa kungko? ” wanan Katawan nin Makapangyadian.

“Síkamon sanguti a mangipákit nin kasan galang kunan ngaran ko.

“Balé tumepet kamo, ‘Páno kamin nangipákit nin kasan galang kunan ngaran mo?’

7 “Baná sa dáton muyon manamá nin kanen sa altar ko.

“Balé tumepet kamo, ‘Páno kamin manamá sa kumo?”

“Man´ibaritá muyo nin napakasamá yay dunungan nan Katawan. Sin mangidáton kamon bulag nin ayep sa pangitayaan muyo, kai para yain nin abas? No mangitayaan kamon pilay tan main sakit nin ayep, kai pa sarain nin abas? Sarínen muyo nin mangidáton kunan gubernador muyo! Maririket ya lí kumuyo? Akuen na lí kamo?” wanan Katawan nin Makapangyadian.

9 “Sawanin umayat kamo kunan Dyos nin mapangawánan kuntamo. Kunran wanin nin pangidátunan a nagibwat kunran gamet muyo, akuen natamo lí? —wanan Katawan nin Makapangyadian.

10 “Ay, nin saya sa kumuyo a manadá kumon sa luuban nan simbawan, kanyá andí kamo mamuor nin apoy a mayatá sa altar ko! Kai ko maririket kumuyo,” wanan Katawan nin Makapangyadian, “tan kai ko gapo lí nin akuen a pangidátunan nin nangibwat kunran gamet muyo. 11 Say ngaran ko makatandá ya lí maong sa pibutlayan ran pakababalyan, nangibwat itaw sa kamínan nan kabubuklas anggan itaw sa kamínan nan dumaremdem. Sa sarban kamimínan maíras ra lí sa kungko say insinso tan say maringgas nin pangidátunan, baná ta makatandá ra lí nin maong a ngaran ko sa pitbutlayan ran pakababalyan,” wanan Katawan nin Makapangyadian.

12 “Balé manamá muya sa wamuyon, ‘Manamá yay dunungan nan Katawan,’ tan, ‘makapading´ey a kanen na.’ 13 Tan wamuyo, ‘Aninan byat nin takem!’ tan anguten muyo et lí nin kasa gapon galang,” wanan Katawan nin Makapangyadian.

Sin mangíras kamon uayep nin nasaktan, napilay udino main sakit tan idáton muyo nin pangitayaan, akuen ko sara kumon kunran gamet muyo?” wanan Katawan. 14 “Sinibletan yay masaor nin main a maakó nin lalakin ayep sa pangen na tan sumamba nayan ipadáton, balé báyo yan mangitayaan a makakurangan nin ayep kunan Katawan. Baná ta síkoy makapangyayadí nin adí,” wanan Katawan nin Makapangyadian, “tan say ngaran ko maigalang ya sa kángap sa pibutlayan ran pakababalyan.

Ipatuloy et...