1 Samwil - Máran Tarato nan Biblya

1 Main pay sayan tawo a taga Ramataim, síyay Supim a taga sa kamimínan nin purod sa Eprain, say ngaran na Elkana anak na ni Heruham, anak na ni Eliho, anak na ni Tuho, anak na ni Sup, síyay Epratyo. 2 Rwa ray asawa na; si saya nagaran na Hana tan si raruma Penina. Main ának na ni Penina, balé si Hana kasa kuna.

3Tinaun-taon, sitin tawo nako ya sa atágay a nangibwat sa babali na nin sumamba tan mitayá sa kunan Katawan nin Makapangyayadí sa Silo, itaw sara si Upni tan si Pinies sísaray ának na ni Eli, ket sanguti sara kunan Katawan. 4 Tepé sa awro a mako ya si Elkan nin mitayá, byan na sara a tao nan laman ayep kunra ni Peniha nin asawa na tan kunra ngámin nin ának a lalaki tan babayi ra. 5 Balé si Hana binyan naya a mirwan tao baná ta niadó naya, tan si Katawan sinakeban nayay pianakan na. 6 Baná ta si Katawan sinakeban nayay pianakan na ni Hana, si mipalpagan na tinmuloy yan manpasagren pigaw mabaringet-nget ya kuna. Nangyadí ti pa nin tinaun-taon. Tepé ya mako si Hana sa simbawan nan Katawan, si mipalpagan na ket pinasagren naya anggan sinmangit ya tan kai yaynan mangan. 8 Si Elka-na nin asawa na bumanggit ya kuna, “Hana mambalé mansumangit ka? Mambalé kai ka mangan? Mamabalé mareré ka? Kai para maaalaga ako et dyan saray mapuló nin ának a lalaki?”

9 Mísa sin nayadí saraynan nangan tan ninum sa Syilo, si Hana inumdeng ya. Sawanin si Eli nin sanguti mantumekré ya sa tekrean na adani sa túdek nan liliwaan sa simbawan nan Katawan. 10 Sa maidap nakem nin ararem si Hanna dinmasal ya kunan Katawan, man´umabet-abet yan sabtan kaberengan. Tan nangwá yan panamba nin manbanggiten na, “ Katawan nin Makapangyayadí, no dumungdong ka lí pa kunan kaudádwan nan aripen mo panemtemen nako pa, tan andí mo lingwanan a aripen mo balé byan muya nin anak a lalaki, mísa kuya lí nin ibi kunan Katawan sa ngámin nan byay na, tan kasa gapon labahas nin umagamir lí sa ulo na.”

12 Sa paglayon na nin mandumasal sa Katawan, si Eli naimatunan nayay bebey na. Si Hana mandumasal ya sa pusó na, tan say labí na ket mangimey ya balé kasan gapon tunoy a marngé. Angan na ni Eli nin nabok ya si Hana tan wana kuna, “Paani káteng a tumágan kan mabok? Iyator munay arak mo.”

15 “Kai pa, Katawan ko,” nangubat ya si Hana, “Babayi ako a maararem nin nagunigon. Kai ko pa mampinum nin arak; man´ibúbó koy kararwa ko kunan Katawan. 16 Andí mo anganen nin say aripen mo a duká yan babayi; mandumasal akudti baná sa alakin maidap nakem tan kaberengan ko.”

17 Nangumbat ya si Eli, “Mako kayna sa katinekan, tan si Dyos nan Israil aburuyen na kumon a dinawat mo kuna.”

18 Wana, “Sawá pa kumon nin say aripen mo madumog nay pangangádo sa mata mo.” Kaaram nibwat ya tan main nin kinná na, tan say rupa na kai yayna mareré.

19 Mísa sa masakbay nin bukas nibangon sara tan nako sara nin sinmamba sa adapan nan Katawan and kaaram mugot saran sinmublí sa Rama. Si Elikana nangasawa ya kuna ni Hana nin asawa na, tan si Katawan napanemtem naya. 20 Sa labas nan panaon si Hana ginmuktot ya tan nanganak yan anak a lalaki. Nipangaran naya nin Samwil, rabay ibaritá, “Baná dinawat kuya kuni Katawan.”

Italaga naya ni Hana si Samwil

21 Sin si asawa na si Elkana nako ya sa atágay mikalamó na sara ngámin a pamamali na nin mangidáton a tinaon nin mitayá kunan Katawan tan tukiden a panamba na, kai ya nako si Hana. Nibaritá na kuni asawa na, “Mayadí yay lalaki nin manyay, iyater kuya lí tan iyarak kuya sa adapan nan Katawan, tan naynay yan miikap itaw.”

23 “Gaw´en mon maong wadí sa kumo,” nibaritá na ni Alkanah nin asawa na. “Mabatí kadti anggan nanyay maynay anak; si Katawan tamó a main pakayadí kunan saritá na.” Kanyá si babayi nabatí ya sa bali ra tan pinasuso nayay anak nin lalaki anggan sinyay nayan sumuso.

24 Nayadí nayan sinumyay, kinalap nayay anak nin lalaki, taman sabtan kalaguan na et, ket naikalamó nayay tulon taon a turiti, sayan kaban nin tapong supot katat nin arak, tan niyater naya sa simbawan nan Katawan sa Syilo. 25 Sin nayadí yaynan naita yaynan naitayá a turiti, inawit rayay anak nin lalaki kuni Eli, 26 tan wana kuna, “Palabasen mo pa, apo ko. Sa talaga nin tanda sa byay mo, síko pay babayi nin nakádeng sa kadani kumo nin mandumasal kunan Katawan. 27 Dinmasal ako kunan sitin anak, tan si Katawan inaburuyan naya nin dinawat ko kuna. 28 Kanyá sawanin ibi kuya kunan Katawan. Sa masibulot nin byay na maitalek ya lí kunan Katawan.” Tan sinmamba ya kunan Katawan itaw.

Ipatuloy et...