Herimyas
Kapitulo 1
1 Saray susaritá na ni Herimyas anak
nin lalaki na ni Hilkiyas, síyay sayan sanguti sa
Anatot itaw sa sakop nan Benhamin. 2 Say saritá nan
Katawan rinmaté kuna sa labin-tulon panaon nan uray
na ni Husiyas anak nin lalaki na ni Amon adí nan
Huda, 3 tan tumuloy sa uray na ni Wakim anak nin lalaki
na ni Husiyas adí nan Huda, anggan sa ikaliman bulan
sa ikalabin-saya nin panaon na ni Sedekiyas anak nin lalaki
na ni Husiyas adí nan Huda, sin saray tutawo nan
Herusalen nako sara sa pinangírasan ra.
Say Tawag
na ni Herimyas
4 Say saritá nan Katawan rinmaté sa kungko,
wana,
5 “Báyo ka nagkamain sa pianakan
katandaan takayna, báyo ka naiyanak nipurok takayna;
sinuyó takaynan mamamadles kunan pakababalyan.”
6 “Ay sa kaberengan, Mag´adi
kon Katawan,” wangko, “Kai ko tandá nin
mag´irgo, malagó akon tuloy.”
7 Balé si Katawan wana kungko, “Andí
mo ibaritá in, ‘Malagó akon tuloy.’
Matkap mon mako kunran sarban tutawo nin adti taka ibakí
tan ibaritá mo animan a binibilin ko kumo. 8 Andí
ka malímo kunra, baná ta kalamuen taka tan
aunen taka et,” nipatandá nan Katawan.
9 Kaaram si Katawan niabot nayay gamet na
tan kinudit nayay bebey ko tan wana kungko, “Niká
kuyayna saray susaritá ko sa bebey mo. 10 Kikiten
mo, sawanin sinuyó taka sa ababo ran pakababalyan
tan pag´adian nin bulawen tan tumbawen, sidaen tan
daegen, pádengen tan mulawen.”
11 Say saritá nan Katawanin rinmaté
sa kungko: “Ani mákit mo Herimyas?”
“Mákit koy sanga nan kayon pili,”
inumbat ko.
12 Wanan Katawan kungko, “Sadag a nákit
mo, baná ta mampamantay taka ta nin kikiten no matukid
a saritá ko.”
13 Say saritá nan Katawa nin rinmaté
sa kungko anamana: “Ani mákit mo?”
“Main mákit kon dabá
a mansumbo,” inumbat ko. “Mankumiling ya kuntamo
nangibwat sa amyanan.”
14 Wanan Katawan sa kungko, “Nangibwat
sa amyanan nin maibúbó a duká mangyadí
kunran sarban miikap sa lutá. 15 Ngali-ngali kon
kayaben sarban tutawo kunran saray pag´adian nan amyanan,”
nipatandá nan Katawan.
“ Saray uadí mako sara lí
tan ipádeng ray tekrean nin pakayadian ra sa serpan
nan padir sa Herusalen; mako sara lí nin subag sa
sarban padir sa libed tan subag sara kunra ngámin
nin babali sa Huda. 16 Ipatandá ko lí a pakaukom
ko kunran tutawo ko baná sa kadukaan ra nin mampalingatan
ra sa kungko, sa mampuuran nin insinso kunran raruman dyos
tan sa mansumamba sa ginwá nan gamet ra.
17 “Sumadyá kamon bukod!
Umdeng kamo tan ibaritá muyo kunra animan nin binibilin
ko kumuyo. Andí kamo malímo kunra, udino límuwen
takamo sa adapan ra. 18 Sawanin nangwá ako a babalin
pinágetan, main túdek nin bakal tan padir
nin tansó a makádeng subag sa sarban lutá—subag
kunran uadí nan Huda, saray pangungulo, saray sanguti
tan saray tutawo nan lutá. 19 Lumaban sara subag
sa kumuyo balé kai sara lí makadaeg kumuyo,
baná ta kalamó takamo tan aunen takamo lí,”
nipatandá nan Katawan.
Ipatuloy et...
