Nahom - Máran Tarato nan Biblya

Sager nan Katawan subag sa Ninibe
2 Si Katawan maimon ya tan síya a Dyos nin mampangalap nin balé; si Katawan mangalap yan balé tan napnó yan mabayanin sager. Si Katawan kalapen nay balé na kunran kabunó na tan ibusngaw nay mabayanin sager na kunran kagurá na. 3 Si Katawan eteng-etengan ya sa sager balé maksaw ya sa kapangyadian na; si Katawan kai na ibatí a magkasalanan nin kai madusa. Say padalan itaw ya sa ulimbusabos tan bagyo, tan saray gumen tápok sara sa ayi na. 4 Ikapuet nayay taaw tan mátyanan naya; pátyanan na sarban ilog. Kumbet sara sa Basan tan sa Karmel tan saray busyag maparot sa Libanon. 5 Saray talugtog rumayon kunan adapan na tan saray purod matunaw nin makasa. Kumayegkeg a babon lutá sa pangimaton na, say sansinakban tan sarban mampiikap kuna. 6 Sínoy makaitpel kunan matunong nin pagkasager na? Sínoy makapangirangep kunan mabayanin sager? Say sager na naibúbó bilang nin apoy; nawatak saray bato sa adapan na.

7 Maabig yay Katawan, síyay salimbeng sa panaon nin pakagulwan. Mangampyá ya kunran saray matalek kuna, 8 balé ikalamó nay napakaalakyan nin lanip tan ipanganggawan na sara lí sa Ninibe; mangamat ya lí kunran kabunó na sa pag´adian nan kadedleman.

9 Animan ibalak ra subag kunan Katawan mangíras ya lí nin panganggawan; say gulo kai rumaté nin pirwa. 10 Maigawet kamo lí sa pibutlayan ran susurot tan mabok kamo lí kunran arak ra; mápos sara lí bilang nakrí nin aday. 11 Sa nangibwat kumuyo, sa Ninibe, main sayan sumulong a mamalak nin duká subag kunan Katawan tan panggepen nay duká nin bubalak.

12 Siti pa a wanan Katawan:

“Mataman main saran kaayon ra tan abaw sara, mapatyan sara lí tan mati sara. Mataman dinyá-dyá takamo, sa Huda, kai takamuyna lí dyá-dyaen anamana. 13 Sawanin barien kuyay babalataynan sa iley muyo tan bulsuten koy pusas muyo.”

14 Si Katawan nangibi yayna nin gan-gan maipáká kumuyo, sa Ninibe: “Kasa lí gapo nin kapupuryan a makaisuyo nin ngaran muyo. Sidaen ko lí saray aninagan tan uanito nin sa rarem ran simbawan ran didyusen muyo. Isadyá kuyna lí a tabon muyo, baná ta madawal kamo.”

15 Kikiten muyo, itaw sa tutalugtog, say ayi nan saya nin mangíras a maandá nin patandá, síyay mangipatandá nin katinekan! Paririkten tamoy paka-pakanan tamo, sa Huda, tan tumukid kamo sa samba muyo. Saray maraet kai rayna lí nin rumaot kumuyo; ganap sara lí nin mapatyan.

Ipatuloy et...