1 Say susaritá na ni Amos, síyay sayan mangitalkan nin mimí itaw sa Tekwa—main sirmata nin nákit a maipáká kunan Israil ruway panaon báyo nan rayon, sin si Usiyas adí ya intaw sa Huda tan si Herubwam anak nin lalaki na ni Huwas síyay adí nan Israyil.

2 Wana:

“Si Katawan umungor yadtaw sa Siyon tan kumudor yadtaw sa Herusalen; say lalawak ran mangitalkan mimí kumrang sarayna tan sa babon talugtog nan Karmel kinumbet ana.”

Pangungukom kunran Kabaraybay ran Israil
3 Siti pay wanan Katawan:

“Kunray tulon pagkasalanan ra sa Damasko, taman kunan ápat, kai ko lí ipákit a kádwan. Baná ta inirik na sara sa Gilyad kunran ipangirik a main pasak nin ngipen, 4 ipáwit ko lí a apoy sa bali nan Hasael nin mamungpong lí a padil nin gaway nan Ben-Hadad. Yubaen ko lí a luuban nin padil ra sa Damasko; daegen kuya lí a adí nin itaw sa Singat nan Aben tan kunan saya a mampangáget nin pakayadí sa Bet Eden. Saray tutawo nan Aram mako sara lí sa pinakalayasan ra itaw sa Kir,” wanan Katawan.

6 Siti pay wanan Katawan:

“Kunray tulon pagkasalanan ra sa Gasa, taman kunan ápat, kai ko lí ipákit a kádwan. Baná ta dinakep na saray sarba sa gumabali tan nilakó na sara sa Idom, 7 ipáwit ko lí a apoy sa pupadil ra sa Gasa nin mamungpong lí a padil nin gaway na. 8 Daegen kuya lí a adí nan Asdod tan kunan saya a mampangáget nin pakayadí sa Askelon. Aritamtamen ko lí a gamet ko subag kunra sa Ekron, anggan nati yay sangkasuyutan nin Pilityo,” wanan Makapangyayadí nin Katawan.

9 Siti pay wanan Katawan:

“Kunray tulon pagkasalanan ra sa Tiro, taman kunan ápat, kai ko lí ipákit a kádwan. Baná ta nilakó ra saray sarba sa gumabali nin nadakpan kunra sa Idom, manlingatan ray piaayunan nin pibubsatan, 10 ipáwit ko lí a apoy sa pupadil ra sa Tiro nin mamungpong lí a padil nin gaway na.”

11 Siti pay wanan Katawan:

“Kunray tulon pagkasalanan ra sa Idom, taman kunan ápat, kai ko lí ipákit a kádwan. Baná ta kinamat nayay busat na kunan gayang tan linápak na saray tawon babayi a nangibwat sa kamínan nin lutá, baná ta say sager na tinmuloy nin kinmasaw tan say pananager nan mabayani dinmuta nin kai nadugá, 12 ipáwit ko lí a apoy sa Teman nin mamungpong lí a padil nin gaway nan Busra.”

13 Siti pay wanan Katawan:

“Kunray tulon pagkasalanan ra sa Amon, taman kunan ápat, kai ko lí ipákit a kádwan. Baná ta ginaygay na saran binuká saray nabuktot nin bubayi sa Gilyad pigaw maiyagwang yay keteg ra, 14 puuran ko lí a pupadil nan Raba nin mamungpong lí a padil nin gaway na sa pibutlayan ran umurangab nan bakal sa awro nan pakikilaban, sa pibutlayan nan maksaw siri sa mabagyon awro. 15 Si adí na mako ya lí sa pinalayasan na, síya tan saray pangungulo na nin mikakalamó,” wanan Katawan.

Ipatuloy et...