Say Kadinepan
1 Si Katawan nag´irgo ya kuna ni Muyses sa sirungan nin pidudupong sa kamínan nin makran itaw sa Sinay sa ikataraná nin awro sa ikarwan bulan nan ikarwan panaon nayadí saray Israylita nin linmakwan sa Ihipto. Wana: 2 “Kalapen moy kadinepan ta isurat mon napuruk-purok sa umnoy dupong kunran sarban gumabali ran Israylita sa kunran kakanayon tan pamamali, sarban tawo kunan ngaran na, sayan kunan saya. 3 Síka tan si Aron mamilang kamo a kumaná sa kunran pitatao sarban tutawo nin lalaki sa Israil a ruwam-puló nin taon udino matataon et tan makakibiang sa buyutan. 4 Sayan tawo nangibwat sa barang nin kapupuryan, barang sara nin pangulo kunran pamamali ra, sísary tumulong kumo. 5 Sarayti a ngaran ran tutawo nin lalaki a tumulong kumuyo:

nangibwat kunra ni Ruben, si Elisor anak nin lalaki na ni Sedeor;
6 nangibwat kunra ni Simyon, si Selumyel anak nin lalaki na ni Surisaday;
7 nangibwat kunra ni Huda, si Nason anak nin lalaki na ni Aminadab;
8 nangibwat kunra ni Isakar, si Natanel anak nin lalaki na ni Suwar;
9 nangibwat kunra ni Sabulon, si Elyab anak nin lalaki na ni Helon;
10 nangibwat kunran ának nin lalaki na ni Husi:
nangibwat kunra ni Eprain, si Elisama anak nin lalaki na ni Amyod;
nangibwat kunra ni Manases, si Gamalyel anak nin lalaki na ni Pedasor;
11 nangibwat kunra ni Benhamin, si Abidan anak nin lalaki na ni Hedyon;
12 nangibwat kunra ni Dan, si Ayeser anak nin lalaki na ni Amisaday;
13 nangibwat kunra ni Aser, si Pagyel anak nin lalaki na ni Ukran;
14 nangibwat kunra ni Gad, si Elyasap anak nin lalaki na ni Dewel;
15 nangibwat kunra ni Neptali, si Ahira anak nin lalaki na ni Enan. ”

16 Sarayti pa a tutawon lalaki a nasuyó sa kunran gumabali, saray pangulo sa kunran kapupuryan. Sísara pay pangulo kunran kakanayon nan Israil.

17 Si Muyses tan si Aron kinalap ra saray tutawon lalaki kunran saray ngaran a naisuyó, 18 tan kinayab ra saray sarban gumabali nin mikalalamó sara sa ikataraná nin awro sa ikarwan bulan. Saray tutawo nipasurat ray kapupuryan ra nin naipuruk-purok sa kunran kakanayon ra tan pamamali ra, tan saray tutawon lalaki nin ruwam-puló udino matataon et naisurat ray ngaran ra nin naipuruk-purok, saya kunan saya, 19 leg´an nan ginan-gan ni Katawan kuna ni Muyses. Kanyá binilang na sara sa makran nin kamínan itaw sa Sinay:

20 Nangibwat sa kapuryan na ni Ruben saray kakan ának nan Israil:
Sarban tutawon lalaki a ruwan-puló udino matataon et nin makakibiang sa buyutan naisurat ray ngaran ra nin naipuruk-purok, saya kunan saya, kumaná sa kasuratan ran kakanayon tan pamamali ra. Nangibwat sa kapupuryan na ni Ruben say bilang ra nag´in nin 46,500.

22 Nangibwat sa kapuryan na ni Simyon:
Sarban tutawo nin lalaki a ruwam-puló nin taon udino matataon et nin makakibiang sa buyutan naibilang sara tan naisurat ray ngaran ra nin naipuruk-purok, saya kunan saya, kumaná sa kasuratan ran kakanayon tan pamamali ra. 23 Nangibwat sa kapupuryan ra ni Simyon say bilang ra nag´in nin 59,300.

24 Nangibwat sa kapuryan na ni Gad:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 25 Nangibwat sa kapupuryan ra ni Gad say bilang ra nag´in nin 45,650.

26 Nangibwat sa kapuryan na ni Huda:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 27 Nangibwat sa kapupuryan ra ni Huda say bilang ra nag´in nin 74,600.

28 Nangibwat sa kapuryan na ni Isakar:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 29 Nangibwat sa kapupuryan ra ni Isakar say bilang ra nag´in nin 54,400.

30 Nangibwat sa kapuryan na ni Sebulon:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 31 Nangibwat sa kapupuryan ra ni Sebulon say bilang ra nag´in nin 57,400.

32 Nangibwat kunran ának nin lalaki na ni Husi:

Nangibwat sa kapuryan na ni Eprain:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 33 Nangibwat sa kapupuryan ra ni Eprain say bilang ra nag´in nin 40,500.

34 Nangibwat sa kapuryan na ni Manases:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 35 Nangibwat sa kapupuryan ra ni Manases say bilang ra nag´in nin 32,200.

36 Nangibwat sa kapuryan na ni Benhamin:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 37 Nangibwat sa kapupuryan ra ni Benhamin say bilang ra nag´in nin 35,400.

38 Nangibwat sa kapuryan na ni Dan:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 39 Nangibwat sa kapupuryan ra ni Dan say bilang ra nag´in nin 62,700.

40 Nangibwat sa kapuryan na ni Aser:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 41 Nangibwat sa kapupuryan ra ni Aser say bilang ra nag´in nin 41,500.

42 Nangibwat sa kapuryan na ni Neptali:
Sarban tutawo nin lalaki a ruwam-puló nin taon udino matataon et nin makakibiang sa buyutan naisurat ray ngaran ra nin naipuruk-purok, kumaná sa kasuratan ran kakanayon tan pamamali ra. 43 Nangibwat sa kapupuryan ra ni Neptali say bilang ra nag´in nin 53,400.

44 Sarayti pa a tutawon lalaki a binilang ra ni Muyses tan si Aron tan saray labin-ruwa nin pangungulo nan Israil, barang saya nin man-ídengan a pamamali ra. 45 Sarban Israylita a ruwam-puló nin taon udino matataon et a makakibiang sa buyutan nan Israil naibilang sara kumaná kunran pamamali ra. 46 Say ngámin nin bilang nag´in nin 603,550.

47 Balé saray kapupuryan ran Lebita kai sara naibilang sa kalamó ran raruma. 48 Wanan Katawan kuna ni Muyses: 49 “Matkap mon kai bilangen saray kapupuryan nin Lebita udino ikalamó mo sara sa kadinepan ran raruman Israylita. 50 No kai, suyuen mo saray Lebita nin makúray sa pasirungan nan gan-gan nin pangakuan—sarban agamiren tan sarban pangikunan na. Awiten ra lí a pasirungan tan sarban agamiren; sísaray mangalagawan kuna tan ipádeng ray sirungan ra sa libed na. 51 Tepé nin maiyalis yay pasirungan, saray Lebita sísaray mamagbag kuna, tan tepé nin ipádeng yay pasirungan, saray Lebita siti a gaw´en ra. Sínuman et nin kumadani sa kuna patyen ya lí. 52 Saray Israylita, ipádeng ray sirungan sa puruk-purukan, barang sara sa kunran sirungan nin diri kumaná sa kunran panumbukan ra. 53 Balé saray Lebita, ipádeng ray sirungan ra sa libed nan pasirungan nan gan-gan nin pangakuan kanyá say mabayanin sager ko kai manabó sa gumabali nan Israylita. Saray Lebita sísaray makúray sa alagawan nan pasirungan nan gan-gan nin pangakuan.”

54 Saray Israylita ginwá rayayti ayon kunan Katawan a ginan-gan na kuna ni Muses.

Bubilang

Kapitulo 2

Say Unong nin Pisisirungan ran Kapupuryan
1 Wana ni Katawan kunra ni Muyses tan Aron: 2 “Saray Israylita pisisirungan sara sa libed nan sirungan nin pidudupong umnu-umnon kaday´an sa kuna, barang sa kunra kumaná sa kunran panumbukan ra tan manggágetan a laylay ran pamamali ra.”

3 Sa baytan, adap nan kabubuklas, say puruk-purukan nin pisisirungan ran Huda kumaná sa kunran panumbukan ra. Say pangulo ran tutawo nan Huda síya si Nason anak nin lalaki na ni Aminadab. 4 Say puruk-purukan nin bilang ra nag´in nin 74,600.

5 Say kapupuryan nan Isakar pisisirungan sara sa kadani ra. Say pangulo ran tutawo nan Isakar síya si Natanel anak nin lalaki na ni Suwar. 6 Say puruk-purukan nin bilang ra nag´in nin 54,400.

9 Sarban tutawon lalaki napilí sa pisisirungan nan Huda, kumaná sa kunran puruk-purukan ra, say bilang ra nag´in nin 186,400. Sísara yapó a mako sa kamínan ra.

10 Sa bagatanan itaw lí a puruk-purukan nin pisisirungan ra ni Ruben kumaná sa panumbukan ra. Say pangulo ran tutawo nan Ruben síya si Elisor anak nin lalaki na ni Sedyor. 11 Say puruk-purukan nin bilang ra nag´in nin 46,500.

12 Say kapupuryan nan Simyon pisisirungan sara lí sa kadani ra. Say pangulo ran tutawo nan Simyon síya si Selumyel anak nin lalaki na ni Surisaday. 13 Say puruk-purukan nin bilang ra nag´in nin 59,300.

12 Say kapupuryan nan Gad sísara lí a sumunor. Say pangulo ran tutawo nan Gad síya si Elyasap anak nin lalaki na ni Dewel. 15 Say puruk-purukan nin bilang ra nag´in nin 45,650.

16 Sarban tutawon lalaki a napilí sa pisisirungan nan Ruben, kumaná sa kunran puruk-purukan ra, say bilang ra nag´in nin 151,450. Sísaray ikarwan mako sa kamínan ra.

17 Kaaram say sirungan nin pidudupong tan say pisisirungan ran Lebita mako sara lí sa butlay ran pisisirungan. Mako sara lí sa kapadan unong no ipádeng ray sinrungan ra, barang sa kamínan ran diri kumaná sa kunran panumbukan.

18 Sa panrupa itaw lí a puruk-purukan nin pisisirungan ra ni Eprain kumaná sa panumbukan ra. Say pangulo ran tutawo nan Eprain síya si Elisama anak nin lalaki na ni Amyod. 19 Say puruk-purukan nin bilang ra nag´in nin 40,500.

20 Say kapupuryan ran Manases sísara lí a sumunor sa kunra. Say pangulo ran tutawo nan Manases síya si Gamalyel anak nin lalaki na ni Pedasor. 21 Say puruk-purukan nin bilang ra nag´in nin 32,200.

22 Say kapupuryan ran Benhamin sísara lí a sumunor. Say pangulo ran tutawo nan Benhamin síya si Abidan anak nin lalaki na ni Hedyon. 21 Say puruk-purukan nin bilang ra nag´in nin 35,400.

24 Sarban tutawon lalaki a napilí sa pisisirungan nan Eprain, kumaná sa kunran puruk-purukan ra, sa bilang ra nag´in nin 108,100. Sísaray ikatlon mako sa kamínan ra.

25 Sa amyanan itaw lí a puruk-purukan nin pisisirungan ra ni Dan kumaná sa panumbukan ra. Say pangulo ran tutawo nan Dan síya si Ayeser anak nin lalaki na ni Amisaday. 26 Say puruk-purukan nin bilang ra nag´in nin 62,700.

27 Say kapupuryan ran Aser sísara lí a sumunor sa kunra. Say pangulo ran tutawo nan Aser síya si Pagyel anak nin lalaki na ni Ukran. 28 Say puruk-purukan nin bilang ra nag´in nin 41,500.

29 Say kapupuryan ran Neptali sísara lí a sumunor. Say pangulo ran tutawo nan Neptali síya si Ahira anak nin lalaki na ni Enan. 30 Say puruk-purukan nin bilang ra nag´in nin 53,400.

31 Sarban tutawon lalaki a napilí sa pisisirungan nan Dan say bilang ran nag´in nin 157,600. Sísaray ikasuyot mako sa kamínan ra, kumaná sa kunran panumbukan ra.

32 Sarayti pa a Israylita nin naibilang kumaná sa kunran pamamali. Sarban tutawon lalaki sa pisisirungan, kunran puruk-purukan ra, say bilang ra nag´in nin 603,550. 33 Balé saray Lebitas kai sara naibilang sa kalamó ran raruman Israylita, kumaná kunan Katawan a ginan-gan na kuna ni Muyses.

34 Kanyá saray Israylita ginwá ra ngámin a ginan-gan nan Katawan kuna ni Muyses; wanin pa a ginwá ra sa pisisirungan ra kumaná sa kunran panumbukan ra, tan wanin pa a ginwá ra nin mako sa kamínan ra, barang sa kunra pati saray kakanayon tan pamamali ra.

Ituloy et...