Pangabet-abetan
Kapitulo 1
1 Páno yan linakwanan sitin babali
a naidá, ket napnó yan tutawo intaw! Páno
ya bilang nin balo, ket makapangyayadí ya intaw kunran
pakababalyan! Síya intaw bayadí ya sa puprubinsya
ket sawanin nag´in yayna nin aripen.
2 Sa paitan umabet-abet ya sa yabi, saray
luwá na tumuró sa pispis na. Sa pibutlayan
nan sarban pangaduan na kasa gapo nin manguyong kuna. Sarban
kamuko na ket inupit raya; nag´in sarayna nin kabunó
na.
3 Mayadí sa dyá-dyá
tan masakit nin gawá, si Huda nako yayna sa pakalayasan
na. Miikap ya sa pibutlayan ran pakababalyan; kasa gapon
madumog nay kamínan nin makapainawa. Sarban mangamat
kuna ket sinambot rayayna sa pibutlayan nan pakasalakan
na.
4 Saray dudalan a mako sa Siyon ket bumaliwan
sara, baná ta kasa gapo a mako sa nasuyó nin
pakapakanan. Sarban pasrepan sa kamínan na ket nalakwanan
sara, umagrem saray sanguti na, ginmereng saray bubalasang
na tan sabtan pait tan maidap nakem na.
5 Saray kabunó na nag´in saraynan
mag´uuray kuna; saray kagurá na ket kasan pakibian
ra. Si Katawan nangíras yan kaberengan kuna baná
sa kábawan nin kasalanan na. Saray ának na
nako sarayna sa pakalayasan ra, napukok sara sa adapan nan
kabunó ra.
6 Sarban andá nibwat sarayna kunan
Anak nin Babayi si Siyon. Saray pnangungulo na bilang saraynan
uysa a kasan lalawak a mákit ra; sa kakapuyan ra
tinmakris sarayna sa adapan ran mangangamat.
7 Sa panaon nan dyá-dyá tan
mankumamang say Hersusalen mapanemtem ra ngámin a
kayamanan nin ikuna sin saytaw. Sin nanabó saray
tutawo na kunran gamet nin kabunó ra, kasa gapon
saya nin tumulong kuna. Saray kabunó na pinastangan
raya tan kinakálisan ray pakasidá na.
8 Say Herusalen nagkasalanan yan alaki kanyá
nag´in yan makasamá. Sarban nangalang kuna
balawen rayayna, baná ta sara ngámin nákit
rayayna nin lus´ok labos; síyan bukod ket umagrem
tan umanunor yayna.
9 Say kaduuyan na dumalit sa ruramit na;
kai naya gapo naibilang a tunglo na. Say pakadaegan na ket
makapakángap ya; kasa gapo nin saya a nanguyong kuna.
“Kikiten mo, Katawan, kunan dyá-dyá
ko, baná ta nanalo saraynay kabunó.”
10 Saray kabunó kinalap rayna ngámin
nin kayamanan na; nákit na saray maatap nin pakababalyan
a sumrep sa simbawan na—saraytaw a binawal mo nin
sumrep sa pidudupong mo.
11 Sarban tutawo na umagrem sara leg´an
a mangrap nin tinapay; tawaran ray kayamanan kunan kanen
ra pinggat makabyay saran bukod. “Kikiten mo, Katawan,
tan maibilang mo, baná ta nabalawan ako.”
12 “Kasayna palayi ti sa kumuyo, ngámin
muyon lumabas? Mangikit-kikit tan kikiten muyo. Main sayan
pangirangepan bilang kunan pangirangepan ko nin pinaidapan
ra kungko, nin níras nan Katawan sa kungko sa awro
a sager nan maksaw?
13 “Nangibwat sa atagay namáwit
yan puor, nipáwit naya sa ayupá kunan but´ol
ko. Inaprak nay katkat sa kunan ayi ko tan nisublí
nako. Ginwá nakon mareré, mikakaawro akon
maulaw.
14 “Saray kasalanan ko naigawet sara
kunan babalataynan; kunan gamet na sinara na saran mikakalamó.
Kinatin na sara sa liey ko, tan si Katawan sinitsit nayay
kagsenan ko. Binyan nako kunran saray gamet ra nin kai ko
makapítengan.
15 “Si Katawan nipulisay na saray sarban
makilaban sa kalibed ko; kinayaban na saray pididinep nin
makilaban subag sa kungko pinggat mekmeken na saray tububáyo
nin makilaban ko. Itaw pa sa pamespesan nin ubas si Katawan
nidádá naya si Balasang a Anak nin Babayi
si Huda.
16 “Baná kunan siti pa nin sumangit
ako tan saray mata ko ket lumapwas yaynan luwá. Kasa
gapon saya a manguyong kungko, kasa gapon saya a mamabáyon
kapusuan ko. Saray ának ko kaidapan sarayna baná
ta nanalo yaynay kabunó.”
17 Si Siyon inabot nayay gamet na balé
kasa gapo nin manguyong kuna. Si Katawan nipataoy na nin
kuni Hakob saray kabaraybay na mag´in kabunó
na; say Herusalen nag´in yayna a bagay nin kai maringgas
sa pibutlayan ra.
18 “Si Katawan matunong ya, anta sinuknad
kuya subag sa gan-gan na. Marngé kamo sarban tutawo;
kikiten muyo a dyá-dyá ko. Saray tububáyo
tan saray bubalasang ko nako sarayna sa pakalayasan ra.
19 “Tinmawag ako kunran kaaayon ko
balé liniputan rakuyna. Saray susanguti tan saray
pangungulo ko ket nati sarayna sa babali antaran sara nin
maningkap nin kanen pinggat tumuloy saran bukod nin mabyay.
20 “Kikiten mo, Katawan, páno
kon nasalak! Nakagulwan ako sa rarem, tan nagunigon yay
pusó ko, baná ta nagkamain ako nin sangkasuknadan.
Sa liwá, say gayang maulila; sa rarem, main tamó
nin patiti.
21 “Saray tutawo narngé rayna
a man´umagrem ko, balé kasa gapo nin manguyong
kungko. Sarban kabubunó ko narngé raynay salak
ko; rumiriket sarayna sa ginwá mo kungko. Sawá
pa kumon nin rumaté yay awro nin nipatandá
mo pinggat mag´in ya lí bilang kungko.
22 “Aburuyan mo
sarban kadukan a mako sa adapan mo; gaw´en mo kunra
bilang sa ginwá mo kungko baná sa ngámin
nin kasalanan ko. Abaw saray uagrem ko tan makapoy yaynay
pusó ko.”
Ipatuloy et...
