2 Uadí - Máran Tarato nan Biblya

1 Nayadí patiti na ni Akab, si Muab kai ya matukid kunan Israil. 2 Sawanin si Ukusiyas nanabó ya kunan pala-pala nangibwat sa atatágay nan kamínan na sa Samarya tan nango a kadiryan na. Kanyá nangibakí na saray mangingíras, man´ibaritá na kunra, “Mako kamuyna tan ikíngat muya si Baal-Sibob, si dyos nan Ekron, pinggat mákit no umandá ako kunan sitin kasakitan.”

3 Balé si anghil nan Katawan wana kuni Eliyas nin Tisbita, “Mako ka sa atágay tan masnaan mo saray mangingíras nan Adí nan Samarya tan tepeten mo kunra, ‘Baná nin kasan Dyos sa Israil ket mako kamo mikíngat kuna ni Baal-Sibob, si dyos nan Ekron?’ 4 No wanin edet siti pa a wanan Katawan: ‘Kai mo gapo lí nin makalakwan a man´idaan mo. Talaga kan mati lí!’” Kanyá nako yayna si Eliyas.

5 Sin sinmublí saray mangingíras kunan adí, tinepet na sara, “Mambalé sinmublí kamo?”

6 “Main pa nin tawo a nasnaan mi,” nangumbat sara. “tan wana kumi, ‘Sumublí kayna kunan adí a nangibakí kumuyo tan ibaritá mo kuna, “Siti pa a wanan Katawan: ‘Baná nin kasan Dyos sa Israil ket man´ibakí mo saray mangingíras nin mikíngat kuna ni Baal-Sibob, si dyos nan Ekron? No wanin edet kai mo lí makalakwan a man´idaan mo. Talag ka lí nin mati!”’”

7 Si adí tinepet na kunra, “ Ani bagay nan tawo a nasnaan muyo tan nangibaritá kumuyo kunan siti?’

8 Nangumbat sara, “Main kasulutan sa sabot na tan main barkes nin katat sa awak na.”

Wanan adí, “Sitaw si Eliyas nin Tisbita.”

9 Kaaram nibakí na sara kuni Eliyas si pangulo ran mangingilaban tan saray makikalamó kuna a limampuló nin tutawo. Si pangulo nako ya sa atágay kuni Eliyas, síyay mantumekré sa ababon purod, tan wana kuna, “Tawo nan Dyos, wanan adí, “Kumayupá ka pa!”

10 Si Eliyas inubat nayay pangulo ran mangingilaban, “No tawo ako nan Dyos, kumayupá kumon a mapuuran nin nangibwat sa langit tan puuran ka tan saray makikalamó mon limampuló nin tutawo!” Kaaram nanabó yay mapuuran nangibwat sa langit tan napuuran sara si pangulo tan saray makikalamó kuna nin limampuló nin tutawo.

11 Kunan siti si adí nibakí na sara kuni Eliyas saray raruman pangulo ran mangingilaban tan saray makikalamó kuna nin limampuló nin tutawo. Si pangulo wana kuna, “Tawo nan Katawan, siti pa a wanan adí, ‘Kumayupá kaynan tampor!’”

12 “No tawo ako nan Dyos,” inumbat na ni Eliyas, “kumayupá kumon a mapuuran nin nangibwat sa langit tan puuran ka tan sara saray makikalamó mon limampuló nin tutawo!” Kaaram nanabó yay mapuuran nan Katawan nin nangibwat sa langit tan napuuran ya tan saray makikalamó nan limampuló nin tutawo.

13 Kanyá si adí nibakí nayay ikatlon pangulo ran mangingilaban tan saray makikalamó kuna nin limampuló nin tutawo. Sitin ikatlon pangulo nako ya sa atágay tan nitalimukod ya sa adapan na ni Eliyas. “Tawo nan Dyos,” inud´od na, “Pamaga-baga mo pa kumon a byay ko tan saray bubbyay ran makikalamó kon limampuló nin tutawo, saray aripen mo! 14 Kikiten mo, nanabó yayna a mapuuran a ngibwat sa langit tan napuuran saray rwaray ikataraná nin pangulo ran mangingilaban tan sara ngámin nin makikalamó kunra. Balé sawanin pamaga-baga mo pa kumon kunan byay ko!”

15 Si anghil nan Katawan wana kuni Eliyas, “Kumayupá kayna kuna; andí ka malímo sa kuna.” Kanyá si Eliyas inumdeng ya tan nikalamó naya nin kinmayupá a mako kunan adí.

16 Nibaritá na kunan adí, “Siti pa a wanan Katawan: ‘Baná nin kasan Dyos sa Israil ket mikíngat ka a nibakí kan mangingíras nin nikíngat kuna ni Baal-Sibob, si dyos nan Ekron? Baná ta ginwá mayti, kai mo gapo lí makalakwan a man´idaan mo. Talag ka lí nin mati!” 17 Kanyá nati ya, kumaná sa saritá nan Katawan nin inirgo na ni Eliyas.

Baná ta kasan anak nan lalaki, si Huram nag´in yay kasunuran nin adí sa ikarwan taon na ni Huram anak nin lalaki na ni Husapat adí nan Huda. 18 Kunan ngámin a a raruman nangyadí sa nag´adí na ni Ukusiyas, tan say ginwá na, kai para sara naisurat sa basawen nin nangyadí ran Uadí nin Israil?

Ipatuloy et...