Nanguyáyam Saray Israilita
1 Sarayti a ngaran ran ának nin lalaki nan Israil a nako sa Ihipto nin nikalamó kuna ni Hakob, saya tan say pati saray pamamali ra: 2 Si Ruben, si Simyon, si Lebi tan si Huda; 3 si Isakar, si Sabulon tan si Benhamin; 4 si Dan tan si Neptali; si Gad tan si Aser. 5 Saray puri na ni Hakob nabilang saran sarba nin piton-puló; si Husí itaw yayna sa Ihipto.

6 Sawanin si Husí tan sarban bubsat na tan sarban kapuryan na nati sarayna, 7 balé saray Isarilita masurok saran mibunga-bunga; maalaki saran inmabaw, pinakábaw sara sa bilang tan nag´in abaw tuloy nin pinnó rayay kamínan nin lutá.

8 Kaaram main báyon adí, sa kuna kasan kakanaan na ni Husí . 9 “Kikiten muyo,” wana kunran katutawo na, “Saray Israilita inmabaw saraynan tuloy sa kuntamo. 10 Parina pa, matkap tamon mailag sa pangadapen kunra udino mag´in sara lí nin umabaw tuloy tan, no main bakal nin mangyadí, kiayon sara kunran kabunó tamo, subag saran lumaban kuntamo tan lumakwan sara lí sa pakababalyan.

11 Kanyá nangiká saran amon aripen sa kunra pinggat mauyáyan sara sa nadagdag nin paggawá, tan nipádengan ra saray Piton tan Ramses a babalin pangaturan nin ipakuna ni Paraon nin Adí. 12 Balé sa abaw et nin panguyáyam sa kunra, inamabaw-abaw sara et tan tinmayak sara; kanyá saray Ihipsyo nag´in saran malínek kunran Israylita 13 tan pinaggawá ra sa kunra nin katay karumian. 14 Mapait pa a ginwá ra sa byay ra pati say masakit nin paggawá sa laryo tan murtiro tan say nagsikabarang nin gawá sa lalawak; sa sarban masakit nin paggawá ra saray Ihipsyo pinaggawá ra sa kunra nin katay karumian.

15 Si Adí nin Ihipto wana kunran tumulong sa panganganak, saray ngaran ra si Sipra tan si Puwa, 16 “No tumulong kamo kunran bubbayin Hibriyo nin mampangabing itaw sa tekrean muyo, no mákit muyo nin lalaki yay abing, patyen muya; balé no babayi yay abing, aburuyan muyan mabyay.” 17 Balé saray tumulong sa panganganak main galang nin kángap ra kunan Diyos tan kai ra ginwá a nibaritá nan Adí nin Ihipto; inaburuyan ra saray abing nin lalaki a mabyay. 18 Mísa si Adí nin Ihipto kinayab na saray tumulong sa panganganak tan tinmepet na kunra, “Mambalé ginwá muyuyti? Mambalé inaburuyan muyo saray abing nin lalaki a mabyay?”

19 Saray tumulong sa panganganak inumbat rayay Paraon nin Adí, “Saray bubbayin Hibriyo ambó sara bilang kunran bubbayin Ihipsyo; maksaw sara tan nayadí saraynan mangabing báyo saray rumaté nin tumulong.”

20 Kanyá si Dyos mapangawánan ya kunran tumulong sa panganganak tan saray tutawo inmabaw sara tan nag´in sabtan abaw et sa bilang ra. 21 Tan baná ta main galang nin kángap ra kunan Diyos saray tumulong sa panganganak, biniyan na saran pamamali sa kunran diri.

22 Kaaram si Paraon nin Adí binyan naytin binibilin kunran sarban katutawo na: “Sarban ának nin lalaki a naiyanak matkap muyon ibantak sa Ilog nin Nilo, balé aburuyan muyoy sarban ának nin babayi a mabyay.

Palakwan

Kapitulo 2

Say Nikaiyanak na ni Muyses
1 Sawanin main tawon lalaki sa kapupuryan nan Lebi a nangawasa kunan babayi nin Lebita, 2 tan ginmuktot ya tan nanganak yan anak nin lalaki. Sin nákit naya nin marigsa yay anak niyadi nayan tulon bulan. 3 Balé sin kai nayayna makaiyadi, nangalap yan babakon papiro nin ipangwan kuna tan nipulapod nayan alkitran. Mísa nipaidá nayay abing sa rarem na tan niká naya sa pibutlayan ran tambó kaampad sa pandel nan Nilo. 4 Si busat nan babayi nakádeng ya sa kaadayuan pinggat mákit na no ani mangyadí kuna.

5 Kaaram si anak nin babayi nan Paraon kinmayupá ya sa Nilo nin maryó, tan saray katutulong na ampadan saran manlumalako sa pandel nan ilog. Nákit nayay babako sa pibutlayan ran tambó tan nibakí nayay aripen nan babayi nin kalapen naya. 6 Binuká naya tan nákit nay abing. Man´umakis ya, tan makapaundó ya kuna, “Siti pa layi a sayan abing ran Hibriyo,” wana.

7 Kaaram si busat nan babayi tinepet na kunan anak nin babayi nan Paraon, “Rabay mukon mangíras nin sayay kunran bubbayin Hibriyo pinggat maipasuso nayay abing?”

8 “Ua, mako kayna,” inumbat na. Kanyá si busat nin babayi nako ya tan níras nayay nanay nan abing. 9 Si anak nin babayi nan Paraon wana kuna, “Kalapen mayti nin abing ta ipasuswen kuya sa kumo tan upaan taka.” Kanyan si babayin Hibriyo kinalap nayay abing tan pinasuso naya. 10 Sin inmalaki yaynay abing, níras naya kunan anak nin babayi nan Paraon tan nag´in yan anak nin lalaki na. Pinangaran naya Muyses, wana, “Binirá kuya sa ranom.”

Tinmakris ya Muyses sa Midyan
11 Sayan awro, nayadí yaynan inmalaki si Muyses, linumwá yan nako itaw kunran katutawo nan diri tan namantay ya sa kunran idap nin paggawá ra. Nákit nayay sayan Ihipsyo nin manbalbalen nay Hibriyo, say sayan katutawo nan diri. 12 Linmingap yadti-yadtaw tan kasan tawo a mákit na, pinati nayay Ihipsyo tan niyadi naya sa buyangin. 13 Sa sumunor nin awro linumwá ya tan main nákit nan rwa ray Hibriyo nin mampiwangelan sara. Tinepet na kunan síyay nagkasalanan, “Mambalé manbikasen moy kababalyan mon Hibriyo?”

14 Wanan tawo, “Síno nangwá kumo nin mag´uuray tan mangungukom sa kumi? Man´isipen mo pa nin mamati kungko bilang mon namati kunan Ihipsyo?” Mísa linmímo ya si Muyses tan inisip na, “Say ginwá ko kai magwa matandaan.”

15 Sin narngé nayti ni Paraon, sinarí nayan patyen si Muyses, balé si Muyses tinmikras sa adayó nan Paraon tan nako ya miikapa sa Midyan, nin itaw ya tinmekré sa adani nan bubon. 16 Sawanin si sanguti nan Midyan main piton ának nan babayi, tan nako sara nanagó nin ranom tan pun´en ray sabsaban pinggat makapainum ra saray pangen nin ayep a ikunan tatay ra. 17 Main umnu-umnon mangangalagan ayep nin rinmaté tan tinaboy ra sara, balé si Muyses inmádeng ya tan niyaon na sara tan pinainom na saray pangen nin ayep ra.

18 Sin sinmublí sara kunran tatay ra si Rewel, tinepet na sa kunra, “Mambalé masakbay kamon tuloy nin miraté sawanin?”

19 Nangumbat sara, “Main Ihipsyo nin nangiyaon kumi kunran mangangalagan ayep. Nanagó ya et nin ranom a ikuntamo tan pinainom na saray pangen nin ayep.”

20 “Tan adti ya det?” Tinepet na ni Rewel kunran ának nan babayi. “Mamabalé nibatí muyudtaw? Sagyaten muyan mangan.”

21 Nikiayon ya si Muyses nin mabatí ya kunan tawo, nin inaburoy nayay anak nin babayi si Sipura a ipakasal ya kuna ni Muyses. 22 Si Sipura nanganak yan anak nin alalaki, tan si Muyses pinangaran naya Gerson, wana, “Nag´in akon san´ili sa san´ili nin lutá.”

23 Sin kunan siin a kátengan nin pananaon, si adí nan Ihipto nati yayna. Saray Israylita inmareng´eng sara sa pakaaripen ra tan inmurakis sara, tan say urakis ran mabyan tulong baná sa pakaaripen ra nako ya kunan Dyos. 24 Si Dyos nargné na saray areng´eng ra tan napanemtem nay nipangakó na kuna ni Abraham, pati si Isaak tan pati si Hakob. 25 Kanyá si Dyos tinmangar ya kunran Israylita tan mangkabiangan ya a maipáká sa kunra.

Ituloy et...