Manila, Pilipinas—Makapakángap a say sangkalakyan nin pamamaglakuan a wanran retail chain sa bayan ket kasa gapo et a buyawan nin pangaysingan sin 10 nin taon ana.

Balé sa yabi nan Martis, sara sa SM Department Store tinmaraná sara anamana sa náteng nin pakasawan ra sa pamalayuwan sin sísaray nangipitágay nin kurtina sa buyawan nan Pista a Linggon Pangaysingan sa Pilipinas 2009 itaw sa SMX Convention Center, Mall of Asia Complex sa Ibalin Pasay.

Báyo nay SM nin nag´in a wanran mall chain nin pamamaglakuan, panemtemen muyo nin pamamaglakuan yan department store tan say pangaysingan a maksaw nin makapákitan na,” wana ni Millie Dizon, VP nan SM sa pangilakuan tan pangipatnagan.

“Rabay mi nin mikalamó sa dupong nin ayunan a pangaysingan nin Pilipinas.” Nikalamó na.

Siti pa a ikarway taon nan SM sa pikakalamuan ra sa Pagagawaan nin Pamalayuwan (Runway Productions) nin dupong ran Linggon Pangaysingan, tan saray kapamamali nin Sy, sísaray mangikon sa SM, itaw sara ngámin nin mangipagáget ra sa núnan yabi sa bubuyawan ra.

Nákit ya sa núnan nin pamabuyawan, si pangulo tan namamundar si Henry Sy Sr. Saray asawa tan ának na itaw sara anamamet, balé kai sara anamaet nin naasikaswan ta itaw sara sa gurot nan pamabuyawan.

“Rabay mi nin ipataraná sa SM a pamamaglakuan nin pangaysingan ya tan saraytin naipataraná maipaligwas sara sa pamamaglakuan mi,” wana nin Anthony Nocom, ilakó nay aysing nin lalaki a naguguritan (labeled) nin ngaran na sa SM tan síyay bumibibilin sa panglakuan kunan SM.

Si Nocom pinangulo nay pangawá-gawaan nan buyawan sa SM a mangyadí lí sa Martis, tan mampitao nay gawá nin nangipyawan kuna ni Joey Espini sa Pamalayuwan (Runway), síyay sayan pangungulo sa Linggon Pangaysingan.

“Rabay mi nin ipaligwas a pakarabayan kumi sa kunran alalakin panglakuan a wanran mass market. Man´ipatandaan mi a guguritan (label) nin masansinakban (global/international). Man´ituloy mi a kapadan bili sa paglakuan balé say pamuntawan nin istilo mangibwat sa mapatandaan a guguritan nin masansinakban,” wana ni Nocom. “Saray kukákitan nin istilo makarabay-rabayan saran maksaw balé makasaliwan sara anamaet.”

Nocon nikakalamó nay 101 a kukákitan nin istilo sa Martis, pinataraná nay buyawan nin nangipákit a pasulutan sa pamapasyaran a nangibwat sa rarem-bali nin guguritan Coco Cabana—tunika, kaptan, pasulutan nin tumangoy—“baná ta bayan tamon pamapasyaran ket makalakó tamo sa kalibedan nan taon.”

Say pasulutan ran anak-anaken, pasulutan ran upisina, tan pasulutan yabi ket niluk-laok tan nibagay-bagay sa ngámin nin main ra sa pamamaglakuan,” wana, nikalamó et a ikunan SM a sulut-ayi udino sapatos nin kabakas ran taga Paris a wanran iconic Parisian.

Kayadí tamó, sara sa SM nikapatandaan ray guguritan nin masansinakban bilang nin Miss Couture tan BCBG sa kunran kalakuan nin pangayingan tan say paninepan nin kakalamuan a nangibwat sa raruman bayan itaw sa SM Makati. Wana ni Nocom sara sa SM pinapagketan mi a pitutunwen sa guguritan nan pamamaglakuan kunan sitin buyawan sa linggo, itágan yay paninepan ran gumagumwá (designers) a wanran SM Boutique designer collections sa Linngo nin Pangaysinan sa Uktubri.

“Tandá mi nin saray mamanaliw tumarana saray nan isip-isipen a guguritan, balé ambó ngámin a makapasaliw nin guguritan ran gumagumwá. Balé anamaet, man´ikalamó mi a guguritan nin masansinakban sa paninepan mi. Siti pa a dalan nan mabantog sa pamamaglakuan mi,” wana, sa kunan man´ibaritá na a saray pamamaglakuan nan SM itaw sa Makati, Ortigas tan Mall of Asia.

“Kai mi anamaet nin likwanan a laman nan panglakuan mi,” nikalamó na ni Nocom, “Rabay mi tamó nin ipaaligwas a pakákitan mi.”

Nipataros sa Binubolinao ni Oswí Castellano

Sumublí sa babo

Patandá sa
Pangaysingan
& Istilo

No main nin kuminto muyo kunran saraytin patandá, suratan muyay Binubolinao.com udino magpusto kamo sa Mag´irgo Atamo nin siksyon pigaw maikalamó saray kuminto muyo.

Síkami | Pakánuan | Nangyayadian | Inglis | Raruma