Say Tarúman nan Kaliteptep

Sin saytaw main pay tububáyo nin magsen a mampanaynep ya nin mangasawa ya lí a sangkaandaan nin balasang a matingkap na balé marangas tan malambong yan tuloy.

Say rangas na ket masaktan nakem rasaray bubalasang. Balawen nasara sa adapan ra nin kai ya gapo mauyamó sa kunran kanakman ra no animan ibaritá na sa kunra.

Sayan awro kapres nin mampako ya sa talugtog nin mamuti bungan ratan main nakasná nan magana-gangay balasang nin nakaseket a sangkaputian nin aysing, mapalaway bilang sa sinag nan awro. Sa kuna, síyay sangkaandaan balasang nin natingkap na.

“Unon andá na,” wana kunan bukod na nin tumuloy yan kumadani kunan balasang. Karam-aram si balasang nakasa ya sin kinmadi ya. Bigrá yan naandipat.

Nako ya naningkap kuna sa ngámin nan tatalon balé kai naya nákit. Makapoy karmá nayna tan mapagal yaynan tuloy a mampaninkap kunan magana-ganan balasang. Baná sa káteng tan kaidap na nin mampaningkap ket sinmager and tinmáway ya:
“Kai ka anamaet nin magana-gana! Marngé nako? Darumakmak yay árong mo, duling ka tan sangkalakyan a tutulyan mo nin nakapákit ko.”

Báyo yan inmidá sa sirong nan atágay nin kayo tan nakakálek ya baná ta unon pagal na. Ani kadí nákit sin nimata ya? Si sangkaandan balasang a nákit naon nin bigrá yan naandipat tan síyay kai na natingkap. Tandá nayna nin unon andá na talaga. Tan say ngámin duká nin nibaritá na sin sinmager ya ket kai gapo peteg.

“Inulug-ulog nako naon. Kanyá mangibwat sawanin, mag´in kaynan makalupad nin mangayam-kayam !” wana kuna. “No rabay mon sumublí nin tububáyo matkap mon tingkapen a balasang nin magana-gana et sa andá ko. Mako kayna tan maningkap kaynay balasang nin wangko pinggat makasublí ka lí nin tububáyo,” wanay dikot babon lutá nin nakapirupan balasang a nangibilin kuna.

Sawanin makalupad nin mangayam-kayam yayna, lumpa-lumpad yadti-yadtaw mantikapen nay balasang nin magana-gana et dyan kunan dikot babon lutá. Awro and yabi nako ya mantikapen tan mangilalo nin makatikap nay balasang. Nangawit yan apoy na nin makatulong sa tikap na sa yabi pinggat makatikap nay balasang nin magana-gan et dyan kunan dikot babon lutá nangibwat sa tatalon nin nanamba kuna.

Nag´in ya pa tamó a makalupad nin mangayam-kayam a main apoy nin mankumuyep-kuyep, kaudá-dwan na sa paningkap nan balasang pinggat makasublí ya lín nin tububáyo. Balé sínoy balasang nin magana-gana et dyan kunan dikot babon lutá?

Anggan sawanin mampaningkap ya et a magana-ganan balasang tan sitin makalupad nin mangayam-kayam siti pay kaliteptep a tandá tamo.

Tarúman nin Binubolinao

Mapanemtem mo intaw say tarúman a nibaritá nin lulang mo? No iká tamo saray tarúman iti, maitungtong sara lí anamana kunran ának tamo. No ani-ani rabay muyo iká nin tarúman iti, ipáwit muyudti sa Binubolinao.com.