Say báyo nin Bisa a magnayon nin mampiikapan sa Pilipinas para kunran san´ili nin Foreign Nationals a mapaitágay a pangikunan lutá
(Real Estate Investments)

Pag´irguwan sa pangikunan lutá sa Pilipinas

Nangibwat sa pr-inside.com
5/15/09

Si Prisidinti Arroyo kapinirma na tamó a pangulon biblin (executive order-EO) bilang 758 a nag´in gan-gan a mampaaburuyan saray san´ili nin mabatí sa Pilipinas a kasan mangangga dapot nin makaupaan saray mapuló nin Pilipino.

Mabistan udas nin gaw´en ti ta makatulong nin ipakayupá a kasaw nan duká a mangyayadí sa ikunumiko nan sansinakban a mantumunawan a maranod lí sa Pilinas sataon.

EO bilang 758, bilang sa gan-gan, main paaluyunan na sa mangiibi a mablin bisa kunran ambó-san´ili para sa pangwaan nin pangupaan.

Sa sirong nan sitin paaluyunan, say Bureau of Immigration mangibi sara lí a Mablin Bisa para sa pangwaan nin pangupaan (Special Visa for Employment Generation-SVEG) kunran san´ili a magkumirsyo sa Pilipinas a mangupaan sara a mapuló nin Pilipino udino abaw et.

Saray san´ili nin mangalap kunan sitin bisa ket naibilang saran mablin ambó-san´ili a kalamó nin pakayadí sa abaw nin pakasrepan tan anununruwen a pabatian a main pakatkapan nin kai ana matkap nin lumakwan sa Pilipinas yapó.

Sitin bisa ket maikalamó ray asawa tan ának ra a kai et nin 18 a taon, andibali no anak sara sa rarem, sa liwá, udino ampunan.

Say paaluyunan pakatkapan nay ambó tamó nin magkumirsyo, balé pakatkapan na saray magbisa a peteg nin apes a mabatí sa Pilipinas tan kai sara a makasanlá sa siguridad nan bayan.

Mákit yayti anamaet nin pakababá undino kanawa-nawa sa pamatágay nin panglakuan a pangikunan nin lutá tan pangupaan sa bayan kapresan nan panggulo nin pamangdaman sa sansinakban a wana nin Beth Collingz, pangulon diriktor sa Panglakó sa Rubarí Taaw nan PLC International Marketing Networks, saray lead marketing partners sa Pacific Concord Properties Inc.’s Lancaster Brand of Condo Hotel nin mamádengan sa Pilipinas.

Saray mamagana (investors) makapako sara sa Pilipinas, manaliw a Condo Hotel a pagkumirsyuan tan magkumirsyo sara sa bayan a ayupá nin bili a magkumirsyo tan ayupá a bili sa pakabyayan a wana ni Collingz.

Nipataros sa Binubolinao ni Oswí Castellano
Sumublí sa babo