Si Yang kalapen nay kuruna
nan Buká nin Pilipinas

Nangibwat sa AZBilliards
5/31/09

Báyo sa Pananaluwan nin Bilyar sa Buká nin Pilipinas kunan sitin linggo, sabtan talag sa liwá nan bayan na a makatandá sa ngaran na. Sawanin baná ta mansusúnen naynan kuruna a Buká nin Pilipinas, saray ngámin nin tutawo makatandá ra lí no síno ya si Ricky Yang tan taga Indonesia ya.

Sa Linggo, si Yang nangwá yan nangyadian sa sansinakban nan bilyar sa mampayadí nay maanti-anting nin mampanaluwan sa Buká nin Pilipinas, tinalo naya si Jeff de Luna a taga Pilipinas sa sabtan kaungan a bibilang nin 11-4 a panaluwan na itaw sa SM Megamall sa Ibalin Mandaluyong.

Síya pa tamó a mangingikap nin kai ya gapo nangno, sitin madunong nin taga Indonesia nipákit na ngámin nin padunungan na sa bibilyaran tan kunan kaiikap na. Sa masakbay a bibilang nin 1-2 a kurangan, nipada nay bilang sa bibilang nin 2-2, ket kinalap nay pagun-gunawan na kunan kai nadegket na ni de Luna. Mísa nayan linumbá sa bibilang nin 6-2 a kaúnawan tan kai yayna gapo a naiketeg kunan siin.

Sa bibilang nin 9-3 ana, si Yang nirikurda nay makrang supak (dry-break). Si de Luna nipáwit nay pakapabyayan kunran mamasupurta na nin man´upusen (running out) nay bibilyaran. Balé sa ikalabin-ápat a sakop (“rack”) nan palibedan, kai na nadegket a 9-bula. Tan nangipatutuo nin nayadí ana. Si Yang nápusan ya, tan sa ikalabin-lima nin sakop, nanupak ya tan nápusan a anamana ket nipayadí nay naikunan ikap.

“Nangikap yan talagan maong sa ababo nin nailalwan na tan nakángap ya nin nag´in yan kai mataluwan kunan sitin ikapan,” wana ni Adrian Goh, síyay mangingitaros na ni Yang. “Síya pay sayan kai ra mailalwan nin manalo baná ta kábawan a maong nin mumangingikap, nikalamó et si Bilang 1 sa Sansinakban nin mangingikap si Ralf Souquet tan si mapuló bula nin kampyon sa sansinakban si Darren Appleton.”

Sa mampanalo sa únan iikap nan WPA (World Pool-Billiard Association) World Ranking Tour, si Yang nibulsa nay babon patumangan undino primyo nin $20,000 tan nitágay nay man´edengan na sa mampagbutangan ra sa iikapan (ranking sysytem).

Si de Luna nako ya tampor sa susuyutan báyo nan nayadí a nakapaidapan 9-7 nin panaluwan kunan kababayan na si Demosthenes Pulpul sa sayan suyut-suyutan nin iikap a wanran semi-finals a nangyadí sa pasakbay et, ket nakalap nay $10,000 ikarwan patumangan.

“Sabtan riga ko nin mansumumrep sa susuyutan sin tinalo kuya si Pulpul, ” wana ni de Luna. “Balé sabtan pagal ko tan kai ko gapo nin nakapainawa. Adayó yay asiskaso (focus) ko.” Si Pulpul tan si Lu Hui Chan sinusása ran nakalap a $5,000 nin nikalamó saran naikatlo tan naikápat.

Nipataros sa Binubolinao ni Oswí Castellano

Sumublí sa babo