Tungtong nin Binubolinao |
|
Maipaliwanag: Mumangukuman Rut Núnan Samwil Ikarwan Samwil Núnan Uadí Ikarwan Uadí Núnan Pakasuratan Ikarwan Pakasuratan Esra Nihimaya Ester Dyob Eklisiyastis Tugtugan ni Solomon Isayas Hirimaya Pag´ebet-ebetan Esikil Daniyel Osiya Dyuwel Obadiyas Dyuna Mika Nahum Habakkuk Sepanaya Haggay Sekaraya Malakay ] ] ]
|
Kapataránan 1Sa Taránan 1 Sin saytaw, sa núnan taránan, si Diyos a nangwá ngámin nin saray lulangit tan say babon lutá. 2 Intaw say babon lutá, kasa gapo et nin kalulutaan na, madelem sa babó nan rareman tan si Kararwa nan Diyos itaw ya sa tagay nan ruranum. 3 Wanan Diyos, “Ipaaburuyen ma a main nin pumalaway,” tan napalaway ya edet. 4 Nakit nayay palaway ni Diyos nin main maong na. Inisiyay nayay palaway tan say padelem. 5 Si Diyos, pinangaran nayay palaway nin “awro” tan say padelem nin “yabi.” Tan naiyabi ya edet misa ya nin naibuklas, siti yay núnan awro. 6 Wanan Diyos, “Ipaaburuyen ma a main nin kamínan a makapalawang sa kabubutlay nan ruranum ta ipasiyay yay ranum sa ranum.” 7 Si Diyos a ginuwá nayay kamínan a makapalawang tan inisiyay nayay ranum sa sirong nan kamínan a makapalawang nin nagibuwat sa ranum itaw sa babó na. Tan nanyadí yaytin pagé. 8 Si Diyos pinangaran nayay kamínan a makapalawang nin “langit.” Tan naiyabi ya anamana mísa yan naibuklas, siti yay ikaruwan awro. 9 Wanan Diyos, “Ipaaburuyen ma saray ruranum sa sirong nan langit ta ipadenep sara sa sayan kamínan tan ipaliwá yay makrang a kalulutá.” Tan nangyadí yaytin pagé. 10 Si Diyos pinangaran nayay makrang a kalulutá nin “lutá,” tan say nadedenep nin ruranum pinangaran nan “baybay.” Tan nákit nan Diyos nin maong yayti. 11 Wanan Diyos et, “Ipaaburuyen may lutá nin pamulawan, tano tumubó a nagsikabarang nin tutanaman a mabikoy tan kukayo a mabunga nin main bikoy.” Tan nanyadí yaytin pagé. 12 Tinmubó a pamulawan sa lutá, say nagsikabarang nin tutanaman a mabikoy tan say nagsikabarang nin kukayo a mabunga nin main bikoy. Nákit nan Diyos nin maong yayti. 13 Naiyabi ya anamana mísa yan naibuklas, siti yay ikatulon awro. 14 Tan wanan Diyos, “Ipaaburuyen ma nin ipala-palaway yay kamínan nin langit ta no makapaisiyay yay awro sa yabi, tan sayti lí a makapalilbí say pupanaon, say uawro tan tutaon. 15 Ipaaburuyen maet nin ipala-palaway yay kamínan nin langit ta no maipalaway yay babon lutá.” Tan nanyadí yaytin pagé. 16 Si Diyos ginuwá nay ruwa ray malawang nin pupalaway, say sabtan mapalaway ay mabilinen nayay awro tan say mapalaway bugá mabilinen nayay yabi. Ginuwá naet a bituen. 17 Si Diyos naiká na sarayti sa kamínan nin langit tano maipalaway way babon lutá, 18 ta no maibilinen yay awro tan yabi, tan maipasiyay yay palaway sa padelem. Tan nákit nan Diyos nin maong yayti. 19 Naiyabi ya anamana mísa yan naibuklas, siti yay ikápat nin awro. 20 Tan wanan Diyos, “Ipunu-punó yay ruranum a mabiyay nin kukuná, tan ipalumpad saray mumanuk-manok sa atágay nan babon lutá tan sa kateteben nin kamimínan nan langit.” 21 Nanguwá yadet si Diyos nin malawang a mabiyay nin kukuná nan baybay, say ngámin a nagsikabarang nin kagumuwaan napnó yay ruranum tan say ngámin a nagsikabarang nin mumanuk-manok a mapakpak. Tan nákit nan Diyos a maong sarayti. 22 Nipamaungen na sarayti nin kagumuwaan tan wana, “Magbunga tan umabaw sarayti tan ipunu-punó saray bubaybay tan umabaw saray mumanuk-manok sa babon lutá.” 23 Naiyabi ya anamana mísa yan naibuklas, siti yay ikaliman awro. 24 Tan wanan Diyos, “Ipaaburuyen may lutá ta manguwá ya nin say nagsikabarang a mabiyay nin kagumuwaan, saray kapag´ayepan, saray kagumuwaan nin kumarayen sa lutá tan saray uayeo nin masirib, sayan-saya a nagsikabarang.” Tan nangyadí yaytin pagé. 25 Si Diyos ginuwá na saray nagsikabarang a uayep nin masirib, saray nagsikabarang nin kapag´ayepan tan sara ngámin nin nagsikabarang a kagumuwaan nin kumarayen sa lutá. Tan nákit nan Diyos a maong yayti. 26 Mísa wanan Diyos, “Ipaaburuyen ma nin manguwá tamo nin tawo barámo nin pamakákitan tan kalarawan atamo. Ta ipaaburuyen sara nin mabilinen ra saray kukuná sa baybay, saray mumanuk-manok sa siri, saray kapag´ayepan, say babon lutá tan saray ngámin nin kagumuwaan nin kumarayen sa lutá. 27 Ginuwá nadet ni Diyos nayay tawo sa pamakákitan na, sa pamakákitan na síyay nanguwá kuna; lalaki tan babayi ginuwá na sara. 28 Nipamaungen na sara tan wana konra, “Bumunga tan umabaw kamo, ipunu-punó muyay babon lutá tan gamit-gamiten muya et. Ipabilinen muya saray kukuná sa bubaybay tan saray mumanuk-manok sa siri tan sa ngámin nin mabiyay a kagumuwaan nin kumarayen sa lutá. 29 Misa si Diyos wana, “Ibi ko sarayti ngámin nin tutanaman a mabikoy sa rupa nan babon lutá tan saray ngámin nin kukayo a mabunga nin main bikoy na. Sarayti lí a ngámin a kukanen muyo. 30 Tan saray ngámin nin uayep sa babon lutá tan saray ngámin nin mumanuk-manok sa siri tan saray ngámin nin kagumuwaan nin kumarayen sa lutá—saray ngámin nin main manawan biyay—Ibi ko sarayti ngámin a maatá nin tutanaman a kukanen muyo.” Tan nangyadí saraytin pagé. 31 Nákit na ngámin ni Diyos a ginuwá na tan nákit na sarayti a main sabtan maong ra. Tan naiyabi anamana mísa yan naibuklas—siti a ikánem nin awro. Ipatuloy et... |
