Bibliya
Si nangipataoy sa Binubolinao: Oswí Castellano

Maipaliwanag:
Saraytin naipataoy ket abaw et nin ayus-ayusen. Sarayti a núnan patauyan

Máran Nin Testiminto

Pakataránan

Pakalakwanan

Lebitikos

Pakabilangan

Ikaruwa

Huswí

Mumangukuman

Rut

Núnan Samwil

Ikarwan Samwil

Núnan Uadí

Ikarwan Uadí

Núnan Pakasuratan

Ikarwan Pakasuratan

Esra

Nihimaya

Ester

Dyob

Pangrayuwan

Alimbawaan

Eklisiyastis

Tugtugan ni Solomon

Isayas

Hirimaya

Pag´ebet-ebetan

Esikil

Daniyel

Osiya

Dyuwel

Amos

Obadiyas

Dyuna

Mika

Nahum

Habakkuk

Sepanaya

Haggay

Sekaraya

Malakay

] ] ]

Báyon Testiminto

 

Huswí 1

Si Katawan bumibilin ya kuni Huswí
1 Kayadí a patiti ni Muyses, síyay aripen nan Katawan, si Katawan nibaritá na kuni Huswí a anak na ni Nun, katulungan na ni Muyses: 2 "Si Muyses a aripen ko ket nati yayna. Sawanin, síka tan sara ngámin nin tutawo, sumadiyá kamuyna nin rumipay sa Ilog nin Hurdan a makudtaw sa lutá nin ipaibi ko kumuyo-kunran ának nin Israil. 3 Ibi ko ngámin nin kamimínan a madádaan nin ayi mo, bilang sa nipangakó ko kuni Muyses. 4 Say kamimínan muyo lí ket maabot yadtaw sa makrang a kamimínan anggan itaw sa Libanon, tan itaw et sa alalakin ilog, sa Yupratis-say ngámin nin bayan ran Hitiyo-anggan itaw et sa Alakin Baybay sa panrupa. 5 Kasa gapo lí nin tawo a makapaedeng kumo angga-anggan sa ngámin nin uawro a biyay mo. Bilang kuna ni Muyses, kalalamuan kata anamaet; kai kata gapo lí nin lakwanen."

6 "Magsen tan matpel kayna, baná ta iparaté mo saraytin tutawo tano tawiren ray luta' a sinambawan ko kunran kap´unan ra a ibi ko kunra. 7 Magsen ka tan matpel (tumepel) kan talaga. Ilagen mon tumulok sa ngámin nin gan-gan a nibi na ni Muyses, si aripen ko, kumo; andí ka nin bumring kunan siti abirno sa wanan undino sa wiri tano makakarmá ka lí no adti-adti ka mako. 8 Andí mo aburuyan kunan sitin Kasuratan nin Gan-gan a lumakwan sa bebey mo; isip-isipen (bulay-bulayen) mo inawro-awro tan yinabi-yabi, tano umilag ka nin gaw'en ngámin a nakasurat na. Báyo ka lí nin umabaw tan kumarmá sa ngámin nin gaw´e-gaw´en mo. 9 Kai ko paynay binibilin kumo? Magsen tan matpel kayna. Andí ka malímo; andí ka matapó, ta si Katawan mon Diyos kalalamuan naka no adtiman ka mako."

10 Kaniyá si Huswí ket binibilin na saray pangungulon tutawo: 11 "Mako kamo sa kampo tan ibarití muyo konran tutawo, 'Sadyaan muyoynay pinabalon muyo. Sa tulon awro nagibuwat sawanin, rumipay kamudti lí sa Ilog nin Hurdan tan kalapen muyoy lutá si Katawan muyon Diyos nin man´ibyen na kumuyo nin pamaikon muyo.'"

12 Balé saray Rubinita, saray Gadita tan saray kapikngá nin dupong nin Manasi, si Huswí ket nibaritá na kunra, "Panemtemen muyoy gan-gan a nibi na ni Muyses ket síyay aripen nan Katawan: 'Si Katawan muyon Diyos man´ibyen nakamon pakainawa muyo tan naibi nayayti nin luta kumuyo.' 14 Saray uasawa, saray ának tan saray uayep muyo ket magwá saran mabatí itaw sa lutá a nibi na ni Muyses kumuyo sa baytan nin Jurdan, balé sara ngámin nin tutawon manlumaban, a nakapamagetan nin abaw, matkap saran mangipaúna kunran bubsat muyo. Tulugan mo saray bubsat muyo 15 anggan maib´yan na sara si Katawan nin pakainawa ra, bilang sa naib´yan na kumuyo, tan anggan nakakalapan raynan lutá ra a man´ibyen nan Katawan kunra. No mayadí in, makasublí kamuyna tan kalapen yay lutá muyo anamaet a nibi na ni Muyses, síyay aripen nan Katawan, itaw sa baytan nan Hurdan kunan pumarbangon."

16 Mísa saran inumbat kuni Huswí, "Animan a binibilin mo kumi, gaw´en mi lí, tan adtiman mon ibakí mi, mako kamidtaw lí. 17 Bilang sa pangunuren (pagtulukan) mi kuni Muyses, maunuren ka lí ananamet. Sawá pa kumon tamó nin si Katawan mon Diyos ket makalamuan naka bilang kuni Muyses. 18 Sínuman a lumiput (tumultol) kunan sa saritá mo tan kai na unuren a susaritá mo, animan a binibilin mo kunra ket maipati sara lí. Magsen tan matpel kayna tana."

Ituloy et