Tungtong nin Binubolinao |
|
Bibliya Maipaliwanag: Máran Nin Testiminto Mumangukuman Rut Núnan Samwil Ikarwan Samwil Núnan Uadí Ikarwan Uadí Núnan Pakasuratan Ikarwan Pakasuratan Esra Nihimaya Ester Dyob Eklisiyastis Tugtugan ni Solomon Isayas Hirimaya Pag´ebet-ebetan Esikil Daniyel Osiya Dyuwel Obadiyas Dyuna Mika Nahum Habakkuk Sepanaya Haggay Sekaraya Malakay ] ] ]
|
Pakabilingan 1Say Pamamilangan 1 Si Katawan pinairgo naya si Moyses sa Kamínan (Tulda) nin Pagpupulong itaw sa kabuyanginan a makran nin Sinay sa núnan awro nan ikarwan bulan nan ikarwan taon a pakayadí ran linmakwan sa Egipto. Wana, 2 “Bilangen mo ngamin saray tutawo sa babaliyan nan Israyil sa kakanayunan tan kapamilyawan ra, ta ilista mo sara ngámin a ngaran ra, saya tan saya. 3 Síka tan si Aaron ipabilang muyo sa kapataw´en saray ngámin nin lullaki nan Israyil nin ruwan-puló a taon udino mataon et ket humukbo sarayna. 4 Sayan lalaki nangibuwat sa sayan-sayan kapúnan, say sayan-sayan pangulo nin pamiliya na ket tumulong ya kumo. 5 Sísarayti a ngungaran nin lullaki nin tumulong kumo: sa kakanayon nan Ruben, si Elisur anak nan Sediyur; 6 sa kakanayon nan Simiyon, si Selumiyel anak nan Surisaddayi; sa kakanayon nan Dyuda, si Nason anak nan Amminadab; 8 sa kakanayon nan Isakar, si Netanil anak nan Suar; 9 sa kakanayon nan Sebulon, si Eliyab anak nan Helon; 10 sa ának nin lullaki ni Hoseph: sa kakanayon nan Eprayim, si Elisama anak nan Ammihud; sa kakanayon nan Manase, si Gamaliyel anaka nan Pedasur; 11 sa kakanayon nan Benhamin, si Abidan anak nan Gideyoni; 12 sa kakanayon nan Dan, si Ahiyeser anak nan Ammisaday; 13 sa kakanayon nan Aser, si Pagiyel anak nan Okran; 14 sa kakanayon nan Gad, si Eliyasap anak nan Deyuwel; 15 sa kakanayon nan Naptali, si Ahira anak nan Enan.” 16 Saraytin lullaki a napipilí sa babaliyan, pupangulo nan pakapuunan ran kakanayon. Sísary pupangulo nan pakanayunan nin Israyil. 17 Si Moyses tan si Aaron ket kinalap rayay ngungaran ran lullaki nin nabiyan, 18 tan kinnayab nasara ngámin nan babaliyan nin magkalalamuan sa nunan awron nan ikarwan bulan. Saray tutawo ket nipákit ray pakapuunan sa kakanayunan tan kapamiliyawan ra, tan saray lullaki nin ruwan-puló nin taon udino mataon et ket nailista rayay ngaran ra, saya tan saya, 19 sa panabilin nan Katawan koni Moyses. Tan binilang na sara edet sa kabuyanginan a makran nin Sinay: 20 Saray nangibuwat sa pakapuunan ni Ruben, sara ay núnan ának nan Israyil: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, saya tan saya, bilang wantaw sa pakasuratan ran kakanayunan tan kapamiliyawan ra. 21 Say bilang nin nangibuwat sa kakanayon nan Ruben ket main nin 46,500. 22 Saray nangibuwat sa pakapuunan ni Simiyon: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 23 Say bilang nin nangibuwat sa kakanayon nan Simiyon ket main nin 59,300. 24 Saray nangibuwat sa pakapuunan ni Gad: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 25 Say bilang nin nangibuwat sa kakanayon nan Gad ket main nin 45,650. 26 Saray nangibuwat sa pakapuunan ni Dyuda: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 27 Say bilang nin nangibuwat sa kakanayon nan Dyuda ket main nin 74,600. 28 Saray nangibuwat sa pakapuunan ni Isakar: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 29 Say bilang nin nangibuwat sa kakanayon nan Isakar ket main nin 54,400. 30 Saray nangibuwat sa pakapuunan ni Sebulum: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 31 Say bilang nin nangibuwat sa kakanayon nan Sebulum ket main nin 59,300. 32 Sa ának nan Hosep: Saray nangibuwat sa pakapuunan ni Eprayim: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 33 Say bilang nin nangibuwat sa kakanayon nan Eprayim ket main nin 40,500. 34 Saray nangibuwat sa pakapuunan ni Manase: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 35 Say bilang nin nangibuwat sa kakanayon nan Manase ket main nin 32,200. 36 Saray nangibuwat sa pakapuunan ni Benhamin: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 37 Say bilang nin nangibuwat sa kakanayon nan Benhamin ket main nin 35,400. 38 Saray nangibuwat sa pakapuunan ni Dan: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 39 Say bilang nin nangibuwat sa kakanayon nan Dan ket main nin 62,700. 40 Saray nangibuwat sa pakapuunan ni Aser: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 21 Say bilang nin nangibuwat sa kakanayon nan Aser ket main nin 41,500. 42 Saray nangibuwat sa pakapuunan ni Naptali: Saray ngámin nin lullaki a ruwan-puló udino mataon et nin makahukbo ket nailistawen sara sa ngaran, bilang wantaw sa pakasuratan ran kakanayunan tan kapamiliyawan ra. 43 Say bilang nin nangibuwat sa kakanayon nan Naptali ket main nin 53,400. 44 Sarati a lullaki nin binilang ra ni Moyses tan Aaron tan saray labin-ruwa a pupangulo nan Israyil, sayan saya a naipakalalaman rayay pamiliya ra. 45 Saray ngámin nin lullaki nin ruwan-puló a taon udino mataon et nin makahukbo sa Israyil ket nakabilang sara bilang sa pakapamiliyawan ra. Saray ngámin nin nabilang a main nin 603,550. 47 Balé saray kapamiliyawan nan kakanayunan nan Libay, kai sara naikalamó sa bilang ran raruma. 48 Wanan Katawan koni Moyses: 49 “Andí mo sara bilangen sara sa kakanayunan nan Libay udino andí mo sara ikalalamó sa pamamilangan sa raruman manga Israyil. 50 Imbis, pilien mo sara nin mangumbaten rayay Kamínan (Tulda) nin Napakabaritaan—sa ngámin nan kukasangkapan tan sa ngámin nin kamaikon na. Sísaray mangangáwit nin kamimínan tan saray ngámin nin kukasangkapan na; sísaray mangisakaso kuna tan kumampo sara sa liben na. 51 Makánuman no matkap ya nin iyalis yay kamimínan saray manga Libay nin mangiyupá, tan makánuman nin ipapádeng yay kamimínan, saray manga Libay a gaw´en ralí. Sínuman et lí nin kumadani nin ambó a manga Libay, ay maipati saralí. 52 Saray manga Israyil mangiká rayay kamimínan (tutulda) ra sa kapataw´enan, sayan tawo sa ikunan kampo nin ikunan pakaugalian na. 53 Balé, saray manga Libay, sísaray mangikampo sara sa libed nan Kamínan (Tulda) nin Napakabaritaan tano kai mako say pasagran sa babaliyan nan Israyil. Saray manga Libay nin sísaray mangalilá sa Kamínan nin Napakabaritaan.” Saray manga Israyil ket ginuwá rayayti ngámin nin nipabilin nan Katawan koni Moyses. |
