Ikarwa (Diyuturunumiyo) 1
Say Gagan nin Lumakwan sa Hureb
1 Sarayti a susaritá a nibaritá na ni Muyses kunra ngámin nin Israil sa makrang a kamimínan baytan nan Hurdan-itaw sa Araba-sa rubarí nan Sup, pisálean ran Paran tan Tupel, Laban, Hasirot tan Disahab. 2 (Mangibuwat sa Hureb nin mako sa Kadis-Barniya sa dalan nan Talutog Seir ket matkap a labin-sayan awro a makudtaw.)
3 Sa apat-apuló nin taon, sa núnan awro sa labin-sayan bulan, si Muyses nibaritá na kunran Isralita a ngámin a ginan´gan nan Katawan kuna maipáká kunra. 4 Nangyadí ti kayadí nan tinalo na si Sihon, adí ran Amuritos, síyay nanguray sa Hesbon, tan sa Edri, tinalo naya si Og, adí ran Bashan, síyay nanguray sa Astarot.
5 Sa baytan nan Hurdan sa sakop nan Muab, si Muyses tinmaraná yan nangibaritá kunan sitin gan-gan, wana: 6 Si Katawan a Diyos tamo ket wana kuntamo sa Hureb, "Náteng ana kamo nin mampiikap kunan sitin talugtog. 7 Baluten a agamiren muyo tan mako kamudtaw sa bayan a pupurod ran Amuriyo; mako kamo kunran ngámin nin tutawo sa kabaraybayan nan Araba, itaw sa tutalugtog, itaw sa amyanan nin pupurod, itaw sa Nigueb tan itaw sa rigrig baybay anggan sa kamínan ran Kananiyo tan Libano, anggan sa kaadayuan nan alakin ilog, say Eyupratis. 8 Kikiten muyo, ibi kuyayti a lutá kumuyo. Mako kamo ta kalapen muyoyti nin lutá ta si Katawan ket sinambawan na a ibi na kunran kukap´unan muyo-si Abraham, si Isaak tan si Hakob-tan saray susuyot ra."
Say Pamilian nin Pangungulo
9. Intaw nibaritá ko kumuyo, "Nabyatan akon tuloy a áwiten kon bukod. 10 Si Katawan muyon Diyos ket linamúnan nay bibilang kumuyo kaniyá sawanin abaw kamuyna bilang sa bubituen sa langit. 11 Sawá pa kumon a si Katawan, si Diyos ran kap´unan muyo, lummúnan kamo nin misanribo tan bindisyunan kamo a nipangakó na. 12 Balé páno kon anusan nin bukod a gulo muyo tan kabyatan muya tan pupurya muyo? 13 Pumilí kamo tawo a madunong, síyay makatarusan tan manggalangen ran tawo a nagibuwat sa sása ran dudupong muyo, tan ipababo ko sara kumuyo."
14 Inumbat kamo kungko, "Say rabay mon gaw´en ket mabista ya."
15 Kaniyá kinalap ko saray pangugnulo sa dudupong muyo, saray madunong tan ginalang ran tawo tan sinuyó ko sara nin main pakayadian kumuyo- sísara a bumibilin sa ribu-ribo, sa yasut-yasot, sa limampupuló tan sa mapupuló tan bilang sa pangungulo nin dupong. 16 Tan pinipyawen ko saray umuukom kumuyo intaw: Marngé kamo sa pupurpya ran bubsat muyo tan ukumen muyon matunong, abirno no say purpyawan ket sa busel ran busat nin Isralita udino sa busel ran sayan Isralita kunan sayan san´ili. 17 Andí muyo ipákit nin kararabayan muyo sa man´umukom; ingaren muyo ngámin abirno daikleng ya undino alaliki ya. Andí kamo malímo kunan animan tawo, ta say ukuman ket kamamain nan Diyos. Awiten muyo saray pupurpya nin makapaidapan kumuyo ta reng´en ko sara lí. 18 Tan intaw ket nibaritá ko kumuyo ngámin nin matkap muyon gaw´en.
Nibakí Saray Bumabantay (Tiktik)
19 Mísa, sa binibilin na a Katawan tamon Diyos, nibuwat kamin mampakudtaw sa Hureb tan linmabas kami sa bayan nin pupurod ray Amuriyo itaw sa alalawang tan sangkadukaan nin makrang a kamínan nin mákit mo, anggan rinmaté kami sa Kadis-Barniya. 20 Mísa nibaritá ko kumuyo, " Naipatben muyo anaod a bayan nin pupurod ran Amuriyo, ket si Katawan nin Dios a mampaibi na kuntamo. 21 Kikiten muyo, si Katawan a Diyos tamo ket nibi nay lutá kuntamo. Mako kamuyna tan kalapen muyuyti bilang sa wanan Katawan, si Diyos ran kap´unan muyo, a nibarita na kumuyo. Andí kamo malímo; andí kamo matapó."
22 Misa kamon ngámin a nako kungko tan wamuyo, "Ibakí tamo a umno-umno tawon lalaki ta bumabantay sara yapó kunan sitin lutá tan isublí ray susuratan nin dumadalan a matkap tamon lumabastan say bubabali nin rumatean tamo."
23 Say isep ti ket lalon mabista yayna kungko; kaniyá pinilí koy labin-ruwa sa kumuyo, sayan lalaki a nagibuwat sa sásan dupong. 24 Nako sara tan nulí sara sa bayan nin pupurod, tan rinmaté sara sa Alog nin Iskol tan pinasyaran raya. 25 Sinmublí sara a nangangáwit a bubunga nan lutá tan wanra, "Mabista yayti nin lutá a nibi nan Katawan nin Diyos kuntamo."
Tumutol sara kunan Katawan
26 Balé kai muyo rabay nin mako; tinmutol kamo sa gangan nan Katawan muyon Diyos. 27 Nagbere-bere kamo sa tutulda muyo and wamuyuet, "Si Katawan gurá na tamo, kaniyá liniwá na tamo sa Egipto tan nibi na tamo sa pagágetan ran Amuriyo tano patye-patyen ra tamo. 28 Adti tamo kadí mako? Saray bubsat tamo ket ginwá ra tamon matapó. Wanra et, "Saray tutawo ket magsen tan atatágay sara et dyan sítamo; say bubabali ra ket alalalyan sara, main et papadil ran umabot sa langit. Nákit mi et saray tutawo a taga-Anak itaw."
29 Mísa kon nibaritá kumuyo, "Andí kamo makapasalak, andí kamo malilímo kunra. 30 Si Katawan muyon Diyos, síyay isen kumuyo, lumaban ya para kumuyo, bilang sa ginwá na sa Egipto, sa adapan muyon mákit, 31 tan itaw et sa makrang kamimínan. Itaw ket nákit yay Katawan muyon Diyos a inawit nakamo, bilang sa sayan tatay nin umáwit kunan anak na, sa dudalan muyo anggan rinmaté kamudti."
32 Balé kunan siti, kai muyo et nin tinalek si Katawan muyon Diyos, 33 síyay nangúna sa pamalalako muyo, sa puor nin yabi tan sa rerem in awro, síyay mangkit a kamimínan nin kumampo muyo tan ipákit nay dalan nin matkap muyon labasan.
34 Sin narngé naya, si Katawan, sinmager ya tan sinamba-sambawan na: 35 "Kasan tawo kunan sitin duká nin panaon a mákit lí a mabistan lutá a sinambawan kon ibyen kunran kap´unan muyo, 36 balé síya tamó si Kaleb anak na ni Hipuni. Mákit na lí tan saray pupuri na a lutá nin nadádaan na, baná ta síyay matunong sa panunumbok na kunan Katawan."
37 Baná ta si Katawan ket sinmager ya kungko ananamet tan wana, "Síka anamaet a kai makaluob itaw. 38 Balé si katutulong mo, si Huswí anak na ni Nun, síyay makaluob lí. Tulungan ma, ta síya lí a mangiraté kunan Israil a tawiren raya lí. 39 Tan saray daikleng nin ának a nakapukok, saray ának a kai et makatandá nin maong tan duká-sísara li a makaluob sa lutá. Ibi kuya lí kunra tan kalapen raya lí. 40 Balé síka, tumikó kanayna ta mako kadtaw sa makrang nin kamimínan sa dalan nan Múdit Baybay.
41 Mísa inumbat muyo, "Nagkasalanan kami kunan Katawan. Mako kami lí nin lumaban, baná ta ginan-gan nan Katawan tamon Diyos." Kaniyá síkamo ngámin ket nangarmas (nangigam udino nagsandata) kamo, man'umisip muyo nin mainum'ay nin mulí itaw sa bayan nin pupurod. 42 Balé si Katawan nibaritá na kungko, "Ibaritá mo kunra, 'Andí kamo muli itaw tan lumaban, baná ta kai ko kamo nin ikalalamuan. Tal´wen rakamo lí nin kaaaway muyo."
43 Kaniyá nibaritá ko kumuyo, balé kai kamo rumngé. Tinmutol kamo kunan gan-gan nan Katawan tan sa rangas muyo nulí kamudtaw sa bayan nin pupurod. 44 Saray Amuriyo nin mampiikap sa pupurod ket linumwá sara kumuyo; kinamat rakamo bilang sa abaw nin aaluleng tan tinalo rakamo sa Seir anggan sa Hurma. 45 Sunmublí kamudti tan inumabet-abet kamo kunan Katawan, balé kai na asikaswen a abet-abet muyo tan tinmelek ya kumuyo. 46 Kaniyá máteng kamon nabatí sa Kadis, sa ngámin nin pananaon muyudtaw.
Ituloy et
