Alimbawaan 1
1 Saray iti a ualimbawaan na
ni Sulumon anak nan lalaki ni Dabid, síyay adí nan Israyil:
2 Pigaw matandaan ran tawo say napnó nin katandaan tan say
dunong nin main sililímo kunan Diyos tan say pagbibilin, maalilbí
tan mataros ray susaritá nin mangkatarusan tan pakákitan
nin katutúwan,
3 Maakó nay bibilin sa gaw´e-gawén nin madunong
tan sa pakaurayan nin napnó a pakaisipen nin madunong, sa pakapaptegan,
sa pakatunungan tan sa pakatutúwan,
4 Pigaw maibyan a pakadunungan kunran mangaayuyupá, tan maibyan
anamaet kunran ának say pakatandaan, say pakailagan, tan say
pakaalilbian ra.
5 Maingar na lí anamaet a madunong tan umabaw ya sa man´adalen
na, tan makalap na lí a katandaan tan maabot nay kunran mabista
nin magbibilin.
6 Pigaw saray tutawo ket mataros ray alimbawá tan say maidap
a makatarusan nin pakasaritaan balé kalamó a pakatarusan
na, tan saray susaritá ran madunong tan saray madedlem nin
pakasaritaan ra udino saray tutamlimbukaya ra.
7 Say pakalímuwan nin magalang tan napnó nin rayo kunan
Katawan ket saray iti a kataránan tan kaúnan tan kapilian
nin pakatandaan; balé saray kalawakaw balawen tan guraen ray
napnó nin katandaan tan say dunong nin main sililímo
kunan Diyos, say bibilin, tan say pakaurayan.
8 Anak ko, ingaren moy pabibilin nan tatay mo, andí ma ipulisay
undino uryan a pangakay nan nanay mo.
9 Ta sísara a bubalanget nin pasalubong a nagibwat sa Diyos
nin isulot sa ulo mo tan sa liey mo.
10 Anak ko, no ipakaayat raka nin saray mumagkasalanan, andí
mo aburoyen.
11 Ket no wanra, mayi ka kuntamo, tano tumágan tamo a manuró
nin dayá, tuklawen tamon bigrá nin kasan puon síyay
kasan kasalanan tan ipákit yay pakapaungan na ket kasan ganaan
na.
12 Amilen tamo sara nin mabyay et tan kakasaya, barámo itaw
sa Syeol a kamínan nin nati, bilang kunra itaw nin kumayupá
sa tabon.
13 Mangkit tan mangalap tamo lí nin nagsikabarang a mablin
kamamain, pigaw pun´en saray bubali tamo nin kamamain a natakawan.
14 Ikalamó mayna a tao mo kuntamo tan mag´in kayna nin
naisamban busat tan kumpadri, pigaw main saya tamó a pitaka
tamo nin kapada.
15 Anak ko, andí kayna nin mikalamó kunra nin lumalako
sa padalan ra, andí muyna idádá a ayi mo sa dalan
ra;
16 Ta say ayi ra ket malayo sa duká, tan madalí saran
manuró nin dayá.
17 Ta kasan ganaan a eket nin niaprak sa pangingiten ran animan a
manuk-manok.
18 Balé tumágan sara tamó kunran dayá
ran diri, ta mangwá saran tuklawen nin bigrá ta tuklawen
ra lí a byay ran diri.
19 Wanin pa a gaw´e-gaw´en ran ngámin nin maasam
sa magkamain, ket saray iti pa a mangalap nin bubyay ran saray nagkamain.
20 Si dunong ket umakis yan maksaw itaw sa dalan, tan ipaksaw na
et a paek na itaw sa pupalingki,
21 Umakis ya itaw sa adapan a magar-gar nin dudalan nin sumná,
itaw et sa pasrepan nan babali tan sa adapan nan padir ket mag´irgo
ya:
22 Umno a panaon ana, síkamo a mangaayuyupá, nin tumuloy
kamo a marabay nin ayuyupá kamo tamó in tawo? Tan saray
manuyá-tuyá rumiga sara sa mantumuyá-tuyá
kumuyo tan saray kalawakaw guraen ray pakatandaan?
23 No tumikó kamo ana tan pakandaan muyoy asikaswen sa nainimánuwan
ko, kikiten mo, ta ipabúbuan taka lí a kararwa udino
ispirito ko isen sa kumo, ta ipakatandaan taka lí a susaritá
ko sa kumo.
24 Baná ta tinawag taka tan nagbadá kan nangubat,
nipánat koy gamet ko tan kasan tawo nin nangasikaso kunan siin,
25 Tan bilang kasan ginwá mo sa pagbibilin ko kumo tan kai
mo gapo nin inakó a nainimánuwan ko kumo,
26 Síko anamaet kakálisan taka lí sa duká
nin mangyadí kumo; tuyá-tuyaen taka lí no rumaté
a gumwá nin pakalímuwan tan pakasalakan mo;
27 No rumaté a pakasalakan mo bilang sa bagyo tan sa pakabukudan
tan say duká nin mangyadí kumo ket rumaté lí
bilang sa buhawi udino ipu-ipo, no rumaté lí a pakaidapan
tan pakairangepen sa kumo.
28 Mísa sara lí nin tumawag kungko balé kai
ko sara umbatan; masakbay tan maseseg sara lí nin maningkap
kungko balé kai rako gapo mákitan lí.
29 Baná ta ginurá ray pakatandaan tan kai ra pinilí
a pakabilangan tan napnó nin pangrayuwan sa sililímo
kunan Katawan,
30 Kai ra gapo akuen a pagbibilen ko, tan kai ra gapo kinabilangan
ngámin nin nainimánuwan ko kunra,
31 Kanyá mangan sara lí nin bunga sa kunran ginwá
ra tan mabsoy sara lí sa kunran pagsiriban ra.
32 Ta say pasublian sa kadukaan ra saray mangaayuyupá ket
sísara lí a mangipati kunra, tan saray kalawakaw nin
kasan kailagen ra ket sísara lí a manidá kunra.
33 Balé sínuman a mangingar kungko, miikap ya lí
nin maligtas sa susudí udino marindi tan sa pagmatalek tan
matinek et lí, kasan sililímo sa kadukaan.
