Usiyas
Kapitulo 1
1 Say saritá nan Katawan rinmaté
ya kuna ni Usiyas anak nin lalaki na ni Beeri sin saytaw
sa pag´aadí ra ni Usiyas, si Hutam, si Akas
tan si Esekyas, sísaray uadí nan Huda, tan
sin saytaw sa pag´adí ni Hirubwam anak nin
lalaki na ni Was adí nan Israil:
Si asawa
tan saray ának na ni Usiyas
2 Sin tinmaraná ya si Katawan nin mag´irgo
sa manpalakbatan na ni Usiyas, si Katawan wana kuna, “Mako
ka mangasawan babayi nin magkilalaki tan mikiának
ka kuna, bilang kunan kamalala nin asawan babayi sitin lutá
makasalanan yan malamang kunan Katawan.” Kanyá
pinakasal naya si Gumer anak nin babayi na ni Diblaim, tan
nabuktot ya tan pinanganak ya a nangibwat sa kuna a sayay
anak nin lalaki.
4 Mísa si Katawan wana kuni Usiyas,
“Ipangaran muya nin Hesreel, baná ta dusawen
ko lí a bali nan Hiho kunan pangmati nin abaw sa
Hesreel, tan ipanganggawan kuya lí a pag´adian
nan Israil. 5 Kunan siin nin awro barien ko lí a
paná na sa singat nan Hesreel.”
6 Nabuktot ya anamana si Gumer tan nanganak
yan anak nin babayi. Mísa wana ni Katawan kuni Usiyas,
“Ipangaran muya nin Lu-Ruhama (wanan ibaritá
“kai nakawánan”), baná ta kai
kuyna lí nin ipákit a pangawánan ko
sa Israil, bangta síko wanin man kumon nin palabasen
ko sara. 7 Anta ipákit ko lí a pangawánan
ko sa Huda; tan iligyas ko sara lí—ambó
sa paná, sa gayang udino sa laban, udino sa kunran
kabayo tan kunran rumuran sa kunra, balé síko,
si Katawan nin Dyos ra, iligyas ko sara lí.”
8 Nayadí nayaynan syayen si Lu-Ruhama,
si Gumer nanganak ya anamanan anak nin lalaki. 9 Mísa
wana nin Katawan, “Ipangaran ma nin Lu-Ami (wanan
ibaritá “ambó tutawo ko”), baná
ta ambó kamo a tutawo ko, tan ambó ako a Dyos
muyo.
10 Anta saray Israilitas barámo
sara lí nin buyangin sa baybay, ket kai sara masukat
tan maibilang. Sa kamínan nin itaw a naibaritá
sa kunra, ‘Ambó kamo a tutawo ko,’ ipangaran
sara lí nin ‘ának nan mangkabyay nin
Dyos.’ 11 Saray tutawo nan Huda tan saray tutawo nan
Israil mikakalamó sara lí; manuyó sara
lí a sayan pangulo tan mulí sara lí
sa liwá nan lutá, baná ta maandá
ya lí a awro nan Hesreel.
Ipatuloy et...
