Danyel
Kapitulo 1
Say Adal
na nin Danyel sa Babilunya
1 Sa ikatlon panaon nan uray na ni Wakim adí nan
Huda, si Nabukudunusor adí nan Babilunya nako ya
sa Herusalen tan liniktop naya. Tan si Katawan niligyas
naya si Wakim adí nan Juda sa gamet na, maikalamo
nin umnu-umnon gargaret nangibwat sa simbawan nan Dyos.
Inawit na sarayti sa simbawan nan dyos na sa Babilunya tan
niká na sa balin kayamanan nan dyos na.
3 Kaaram si adí binibilin naya si
Aspenas, síyay pangulo na kunran saray main kapangyadian
sa balin adí, nin mangíras yan uaripen kunan
adí saray umnu-umnon Israilitas a nangibwat sa pamamalin
adí tan sa dupong nin pangungulo—4 saray tububáyo
nin kasan pagkurangan, maandá bakas, man´ipákit
a pakaagmes sa nagsikabarang nin pag´adal, makatandá
maong, madalí nin makataros tan main nepeg nin mag´aripen
sara sa balin adí. Iyakay na sara lí a saritá
tan pakasuratan ran Babilunyos. 5 Si adí pinilí
na sarban kanen tan arak ra sa inawru-awro a nangibwat sa
panganan nan adí. Mag´adal sara kumon lí
nin tulon taon, tan mayadí kunan siin tumaraná
sara sa pag´aripen kunan adí.
6 Sa pibutlayan ran saray napilí umnu-umno
saray nangibwat sa Huda: si Danyel, si Ananyas, si Misael
tan si Asaryas. 7 Si pangulon main kapangyadian binyan na
sara báyon ngungaran: kuna ni Danyel, say ngaran
nayna Beltsasar; kuna ni Ananyas, Sadrak; kuna ni Misael,
Mesak; tan kuna ni Asaryas, Abid-nigo.
8 Balé si Danyel maksaw nakem nin
kai na rabay samaan a kadiryan na kunran kanen tan arak
a nangibwat sa balin adí, tan tinepet nayay pangulon
main kapangayadian a mamin pasantabi kunra pinggat kai na
masamaan a kadiryan na kunan wanin a man´gaw´en
ra. 9 Sawanin si Dyos main ginwá na kunan pangulon
main kapangyadian nin mamákit yan pangingádo
tan pangungundó kuna ni Danyel, balé si main
kapangyadian nibaritá na kuni Danyel, “Malímo
ako kunan apo kon adí ket síyay namilí
nin kanen tan inom mo. Mambalé mákit na kamo
kumon nin manlumuod dyan kunran saray raruman tububáyo
nin kataon muyo? Si adí mísa naya lí
putulen a ulo ko baná sa kumuyo.”
11 Kaaram wana ni Danyel kunan bantay nin
nasuyó nan pangulon main kapangyadian kunra ni Danyel,
si Ananyas, si Misael tan si Asaryas, 12 “Sarínen
mo pa kumon kunran saray aripen mo sa mapuló nin
uawro: Byan mo kami tamó a pupising nin kanen tan
ranom nin inumen. 13 Báyo mo lí nin makaipada
a bakas mi kunran tububáyo a mampangan nin kanen
nangibwat sa balin adí, tan gaw´en mo lí
kunran aripen mo nin maitukoy sa mákit mo,”
14 Kanyá nikiayon ya kunan siti tan nasarínen
sara sa mapuló nin uawro.
15 Sa anggawan nan mapuló nin uawro
maririgsa sara et tan maong et a nipákan nin main
sustansya kunra dyan síno man saray tububáyo
a nangan nin kanen nangibwat sa balin adí. 16 Kanyá
si bantay kinalap na saray kanen nin napilí tan arak
nin inumen ra kumon tan no kai edet binyan na sara a pupising.
17 Kunran saraytin ápat tububáyo
si Dyos binyan na sara nin pakatandá tan pakataros
sa sarban nagsikabarang nin pakasuratan tan pakaadalan.
Tan si Danyel makataros nayna saray nagsikabarang nin sirmata
tan taynep.
10 Sa anggawan nan udas nin nitalaga nan
adí nin írasen sara sa pag´aripen na,
si pangulon main kapangyadian nipadar na sara kuna ni Nabukudunusor.
19 Nag´irgo yay adí sa kunra, tan kasan nákit
na a makapada kuna ni Danyel, si Ananyas, si Misael tan
si Asaryas; kanyá sinumrep sara sa pag´aripen
nan adí. 20 Sa sarban pakatungtungan nin kadunungan
tan pakatarusan maipáká nin tinepet nan adí
sa kunra, nákit na sara nin mipuló a maong
et dyan sarban magsasalamangka tan mangingingkanto sa ngámin
nin pag´adian na.
21 Tan si Danyel nabatí yadtaw
anggan sa ikataraná nin panaon na ni Adí Siro.
Ipatuloy et...
