1 Sa taraná, si Dyos ginwá na saray lulangit tan say babon lutá. 2 Sawanin say babon lutá kasa et dimlog na tan kasan laman na et, say dedlem itaw ya sa babó nan ararem, tan si Kararwa nan Dyos manlumpad yan lumibed-libed sa babo ran ruranom.

3 Tan wanan Dyos, “Main pa kumon nin palaway,” tan nagkamain nin palaway. 4 Si Dyos nakit nayay palaway nin maabig ya, tan inisyay nayay palaway sa konan dedlem. 5 Si Dyos pinangaran nayay palaway “awro” tan say dedlem “yabi.” Tan nagkamain a yabi, tan nagkamain a buklas—siti pay ikataraná nin awro.

6 Tan wanan Dyos, “Main pa kumon a kamínan nin leas a naisálé sa konran ruranom pinggat maisyay yay ranom sa konnan ranom.” 7 Kanyá si Dyos ginwá nayay kamínan nin leas tan inisyay nayay ranom sa sirong nan kamínan nin leas sa konan ranom nin itaw sa tágay na. Tan nagkamain saryaytin pagé. 8 Si Dyos pinangaran nayay kamínan nin leas “langit.” Tan nag´in yan yabi, tan nag´in yan buklas—say ikarwan awro.

9 Tan wanan Dyos, “Main pa kumon ranom sa sirong nan langit nin madidinep sara sa sayan kamínan, tan main pa kumon nin makrang nin kamínan a maipákit.” Tan nagkamain saryaytin pagé. 10 Si Dyos pinangaran nayay makrang nin kamínan “lutá,” tan saray nadidinep nin ruranom pinangaran nasara “taaw.” Tan nákit nan Diyos nin maabig yayti.

11 Mísa wanan Dyos, “Tumubó pa kumon saray tutanaman sa konan lutá: saray bumungan biní nin tanaman tan saray kayo sa lutá nin bumungan bunga nin main bikoy sa rarem ra, kumaná sa konran nagsikababarang ra.” Tan nagkamain saryaytin pagé. 12 Tinmubó saray tutanaman sa konan lutá: saray tanaman a manbumungan biní kumaná sa konran kababarang ra tan saray kayo a manbumungan bunga nin main bikoy sa rarem ra kumaná sa konran kababarang ra. Tan nákit nan Diyos nin maabig yayti. Tan nag´in yan yabi, tan nag´in yan buklas—say ikatlon awro.

14 Tan wanan Dyos, “Main pa kumon nin pupalaway sa kamínan nin leas sa langit a mangisyay nin awro sa konan yabi, tan maikalamó sara pa kumon sa panlawan nin makaaram sa pananaon nin makatawan, tan saray uawro tan saray panaon, 15 tan mag´in sara pa kumon nin palaway sa kamínan nin leas sa langit pinggat maipalaway ya sa babon lutá.” Tan nagkamain saryaytin pagé. 16 Si Dyos nangwá yan rwa ray alalaki nin palaway—say alalaki nin palaway mag´uray sa awro tan sa madidintek nin palaway mag´uray sa yabi. Ginwá na anamaet saray bubituen. 17 Si Dyos niká na sara sa kamínan nin leas sa langit pinggat maipalaway ya sa babon lutá, 18 pinggat mag´uray sara sa konan awro tan yabi, tan pinggat maisyay yay palaway sa konan dedlem. Tan nákit nan Diyos nin maabig yayti. 19 Tan nag´in yan yabi, tan nag´in yan buklas—say ikápat nin awro.

20 Tan wanan Dyos, “Mapnó pa kumon a mabyay nin kuna-kuná sa ranom, tan lumumpad sara pa kumon saray manuk-manok sa tágay nan babon lutá nin rumubarí sa kamínan nin leas sa langit.” 21 Kanyá si Dyos ginwá na saray alalaki nin kuna-kuná sa taaw tan sarban mangkabyay nin bagay a namnó sa ranom tan saray kumimey sa rarem, kumaná sa konran kababarang ra. Tan nákit nan Diyos nin maabig yayti. 22 Si Dyos binasbasan na sara tan wana, “Mibunga-bunga kamo tan umabaw kamo sa bilang tan pun´en muyoy ranom sa konran saray tutaaw, umabaw sara pa kumon saray manuk-manok sa babon lutá.” 23 Tan nag´in yan yabi, tan nag´in yan buklas—say ikaliman awro.

24 Tan wanan Dyos, “Mangiyanak ya pa kumon a lutá nin saray mankabyay nin uayep kumaná sa konran kababarang ra: uayep sa pagtatalon, saray kumayam-kayam sa lutá, tan saray uayep sa tatalon, saya tan saya kumaná sa konran kababarang ra.” Tan nagkamain saryaytin pagé. 25 Si Dyos ginwá na saray uayep sa tatalon kumaná sa konran kababarang ra, saray uayep sa pagtatalon kumaná sa konran kababarang ra, tan sarban kumayam-kayam sa lutá kumaná sa konran kababarang ra. Tan nákit nan Diyos nin maabig yayti.

26 Mísa wanan Dyos, “Mangwá tamo pa kumon nin tawo sa konan aninagan tamo, sa konan bakas tamo, pinggat makauray sara konran kuna-kuná sa taaw tan konran manuk-manok sa langit, sa konran uayep sa pagtatalon tan sa konran uayep tatalon, tan sa konran sarban kumayam-kayam sa lutá.”

27 Kanyá si Dyos ginwá nayay tawo sa konan aninagan nan diri, sa aninagan nan Dyos ginwá na sara; lalaki tan babayi a ginwá na sara.

28 Si Dyos binasbasan na sara tan wana sa konra, “Mibunga-bunga kamo tan umabaw kamo sa bilang; pun´en muyoy babon lutá tan ipanumbukan moya. Mag´uray kamo sa konran kuna-kuná sa taaw tan sa konran manuk-manok sa langit tan sa konran sarban mangkabyay nin kumayam-kayam sa lutá.”

29 Mísa wanan Dyos, “Ibi ko komoyo sarban tutanaman a bumungan biní sa rupa nan babon lutá tan sarban ku kayo a bumungan bunga nin main bikoy sa rarem na. 30 Tan sarban uayep sa babon lutá tan sarban manuk-manok sa langit tan sarban kumayam-kayam sa lutá—sarban main inawa nin biyay sa rarem ra—ibi ko komoyo sarban malibuyong nin tanaman a kanen moyo.” Tan nagkamain saryaytin pagé

31 Si Dyos nákit na ngámin a ginwá na, tan nákit nan maabig yaytin talaga. Tan nag´in yan yabi, tan nag´in yan buklas—say ikánem awro.

Pangibwatan 2

1 Kanyá saray lulangit tan say babon lutá nayadí sarayna sa sarban unon kalakyan nin pididinep ra.

2 Sa ikapiton awro si Dyos nayadí naynan gawá a man´gaw´en na; kanyá sa ikapiton awro nagpainawa ya sa sarban gawá na. 3 Mísa si Dyos binasbasan nayay ikapiton awro tan ginwá nayan makatawan, baná sa konan siin nagpianawa ya sa sarban gawá-gawá na.

Si Adan tan si Iba

4 Siti pay naisurat nin nangyadí sa konran lulangit tan say babon lutá sin nagwá sara, sin ginwá na ni Katawan nin Dyos saray babon lutá tan saray lulangit.

5 Sawanin kasa et nin palungpong a mákit sa babon lutá tan kasa et nin tanaman a tumubó, baná ta si Katawan nin Dyos kai na et nipáwit a rapeg sa babon lutá tan kasa et gumagawá sa lutá, 6 balé main subor nin linumwá sa babon lutá tan nambó yay sarban babo nan lutá . 7 Mísa si Katawan nin Dyos ginwá nayay tawo nangibwat sa tápok nan lutá tan ninawa na sa konan árong na say inawa nin byay, tan si tawo nag´in yan mangkabyay nin tawo.

8 Sawanin si Katawan nin Dyos nangmula yan lalawak sa baytan, sa Iden; tan niká nayay tawo itaw nin nadimlog na. 9 Si Katawan nin Dyos ginwá na saray nagsikabarang nin kukayo a tumubó sa lutá—saray kukayo nin maandá sa mata tan mataway nin kanen. Sa butlay nan lalawak itaw yay kayo nin byay tan kayo nin pakatandá sa abig tan duká.

10 Main ilog nin mampambó sa konan lalawak nin inmagos nangibwat sa Iden; nangibwat itaw naisyay saran ápat nin pangibwatan ran uilog. Pison a ngaran nan ikataraná nin ilog; umagos yan tumikú-tikó sa sarban kamínan nan Habila, nin main itaw a balitok. 12 (Maandá yay balitok sa konan itaw nin kamínan; say mabanglon yatek tan baton unisi mákit saradtaw anamaet.) 13 Gihon a ngaran nan ikarwan ilog; umagos yan tumikú-tikó sa sarban kamínan nan Kus. 14 Tigris a ngaran nan ikatlon ilog, umagos ya sa abay nan Asor sa baytan. Tan Iyupratis a ngaran nan ikápat nan ilog.

15 Si Katawan nin Dyos kinalap nayay tawo tan niká naya sa Lalawak nin Iden pinggat main gawá na tan alilaen naya. 16 Tan si Katawan nin Dyos binibilin nayay tawo, “Magwá kan mangan sa konran animan nin kayo sa lalawak; 17 balé andí ka mangan sa konan kayon pakatandá nin abig tan duká, baná ta no mangan ka mati ka lí nin talaga.”

18. Wanan Katawan nin Dyos, “Ambó maandá nin bukod yay tawo. Mangwá ako lí a manepeg nin katulong na.”

19 Sawanin si Katawan nin Dyos dinimlog na sa konan lutá sarban uayep sa tatalon tan sarban mumanuk-manok sa langit. Niká nasara sa konan tawo pinggat mákit na no ani nasara nin ipangaran; tan animan nin nipangaran nan tawo sa konran saya tan saya a mangkabyay nin uayep, sitaw a ngaran na. 20 Kanyá si tawo pinangaranan na sara sarban uayep sa pagtatalon, saray mumanuk-manok sa langit tan sarban uayep sa tatalon.

Balé sa kona ni Adan kasan nadumog a manepeg nin katulong na. 21 Kanyá si Katawan nin Dyos pinakálek nayay tawo a málek yan ararem; tan legleg nan mangkálek, kinalap nayay sayan tagyang nan tawo tan mísa pinikmí nayay laman sa riking nan lalaman. 22 Mísa si Katawan nin Dyos ginwá nayay tawon babayi a nangibwat sa tagyan nin kinalap na sa konan tawon lalaki, tan níras naya sa konan lalaki.

23 Wanan lalaki, “Siti pa sawanin a but´ol nan but´ol ko tan laman nan laman ko; pangaranan ya lí nin ‘babayi,’ baná ta kinalap naya sa konan tawon lalaki.”

24 Kanyá si tawon lalaki lumakwan ya sa konan tatay tan nanay na tan mikalamó ya sa konan asawa na, tan mag´in sara nin sayan laman.

25 Si Adan tan si Iba lus´ok-labos saran rwa tan kasan ding´ey nin kaingaran ra.

Pangibwatan 3

Say Pakanabuan

1 Sawanin si ulay nin manunukso ket masisirib ya et dyan saray animan uayep sa tatalon a pinagkamain nan Katawan nin Dyos. Wana sa konan babayi, “Nibaritá na talaga ni Dyos, ‘Andí ka mangan sa konran animan kukayo sa lalawak’?”

2 Si babayi wana konan ulay, “Magwá kamin mangan bunga nangibwat sa kukayo sa lalawak, 3 balé say wana ni Dyos, ‘Andí kamo mangan bunga sa kayodtaw sa butlay nan lalawak, tan andí moyo kuditen, udino mati kamo lí.’”

4 “Kai kamo pay talagan mati,” wanan ulay konan babayi. 5 “Baná ta tandá nan Dyos no kanen moya mabuká lí a mata moyo, tan bilang kamo lí nin Dyos, makatandá sa abig tan duká.”

6 Sin nákit naya ni babayi say bunga nan kayo ket maandá yan kanen tan makapaayat ya sa mata, tan makarabay-rabay a mampangámor anamaet nin kadunungan, nangalap ya pa tan nangan ya. Binyan naya anamaet si asawa na, síyadtaw nin kinalamó na, tan nangan ya. 7 Mísa saray mumata ran rwa ket nabuká sara, tan nadalepdep ra nin lus´ok-labos sara; kanyá nanayí saray bubulong nin igos tan nangwá saran panakeban ra sa konran bukod ra.
8 Mísa si lalaki tan si asawan na nargé ray busngaw nan Katawan nin Dyos legleg yan manlumalako sa lalawak sa ray´ep nan awro, tan inmadi sara sa konan Katawan nin Dyos sa pibutlayan ran kukayo sa lalawak. 9 Balé si Katawan nin Dyos kinayab nayay lalaki, “Adti ka anamaet?”

10 Nangumbat ya, “Narngé taka sa lalawak, tan nalímuwan ako baná ta lus´ok-labos ako; kanyá inmadi ako.” 11 Tan wana, “Síno balé nin nangibaritá komo nin lus´ok-labos ka? Nangan ka pa sa konan kayo nin binibilin ko komon andí kanen?”

12 Wanan lalaki, “Si babayi a niká modtin kalamó ko—binyan nakon bunga sa konan kayo, tan kinan koya.”

13 Mísa si Katawan nin Dyos wana konan babayi, “Ani kadí nin ginwá mo?’
Wanan babayi, “ Say ulay nabalúnan nako, tan nangan ako.”

14 Kanyá si Katawan nin Dyos wana konan ulay, “Baná ta ginwá moyayti,
“Nisamba ka pa sa tagay ray sarban uayep sa gagawá tan sarban uayep sa tatalon!
Kumayam-kayam ka lí sa tyan mo tan kanen mo lí a tápok sa ngámin uawro nan byay mo.

15 Iká ko lí a gurá sa pisálean mo tan sa konan babayi, tan sa pisálean ran kapuryan mo tan sa kapuryan nan babayi; rekreken naya lí a ulo mo, tan degten ma lí sa bued na.”

16 Sa konan babayi wana, “Unon irot lí a sakit mo sa mampangabing mo; maikalamo a sakit nan panganak nin ibi mo lí sa konran ának.

Say apes mo lí ket sa konan asawa mo, tan síya lí nin mag´uray sa komo.”17 Kona ni Adan wana, “Baná tan iningar may asawa mo tan kinan may bunga sa konan kayon maipáká nay ayin nin binibilin ko komo, ‘Andí moyain nin kanen.’ “Nasamba yay lutá baná sa komo; sa konan idap nan gawá mangan ka lí konaya sa ngámin uawro nan byay mo. 18 Tumubó li a diwi tan say makasurot nin magámor mo, tan kanen mo lí a tanaman a nangibwat sa gagawá. 19 Sa konan saygnet sa kiri mo mangan ka lí a kanen mo anggan submublí ka sa lutá, sin sa konadsen nin nakalap ka; baná ta tápok ka tan sa tápok nin sumublí ka.”

20 Si Adan ningaran nayay asawa na Iba, baná ta mag´in yan ina sa sarban mampabyay.

21 Si Katawan nin Dyos nangwá yan apin nin katat a nagámor ra ni Adan tan si asawa na tan sineketan nasara. 22 Tan wanan Katawan nin Dyos, “Si tawo nag´in yayna sawanin bilang nin saya sa kontamo, makatandá sa abig tan sa duká. Matkap yayna a kai maaburuyan nin igawang nay gamet na tan mangalap anamaet sa kayo nin byay tan mangan ya, tan mabyay ya anggan angga.” 23 Kanyá pinalakwanan naya sa Lalawak nin Iden pinggat adadwen nayay lutá sa pangibwatan nan nakalap. 24 Mísa nayan pinalakwanan a tawo, niká naya sa baytan rigrig nan Lalawak nin Iden, saray anghil nin kirubin tan say mandumtan beneng a sumulong ran sumublí nin mangibantay sa dalan a mako sa kayon byay.

Ipatuloy et...