Hagyo
Kapitulo 1
Say Tawag a Mamáding
nin Bali nan Katawan
1 Sa ikarwan panaon na ni Adí
Daryo, sa ikataraná nin awro sa ikánem nin
bulan, say saritá nan Katawan rinmaté ya baná
sa kuna ni Hagyo nin padles a nako kuna ni Surubabel anak
nin lalaki na ni Salatyel, gubernador nan Huda, tan si Huswí
anak nin lalaki na ni Husadak, síya atágay
nin sanguti.
2 Siti pa a wanan Katawan nin Makapangyadian:
“Saraytin tutawo wanra: ‘Kai et udas nin mamádeng
a bali nan Katawan.’”
3 Kaaram say saritá nan Katawan rinmaté
ya baná sa kunan padles si Hagyo: 4 “Udas ana
pa a síkamo kamon bukod nin mampiikap sa bubali muyon
napadir nin maaandá, leg´an nan sitin bali
ket nakádeng ya et sa sidá?”
5 Sawanin siti pa a wanan Katawan nin Makapangyadian:
“Isepen muyon maong kunan pitatawo muyo. 6 Nangmula
kamon abaw, balé daité tamó a nayatab
muyo. Mangan kamo, balé kai kamo gapo mabsoy. Minom
kamo, balé milatá kamo et. Isulot muyoy aysing
muyo, balé kai kamo gapo marangrang. Main matingkapan
muyo, balé say mákitan muyo ket iká
muyo sa nabutbutan nin pitaka.”
7 Siti pa a wanan Katawan nin Makapangyadian:
“Isepen muyon maong kunan pitatawo muyo. 8 Mako kamo
sa tutalugtog tan mangayupá kamon kukayo tan mamádeng
kamon bali ko, pigaw makakalap koy karigawan sa kuna tan
magalang ako,” wanan Katawan. 9 “Abaw nailalwan
muyo, balé kikiten muyo, nag´in yan daité
tamó. Animan a níras muyo sa bali muyo, nitángay
nan siri. Mambalé?” nipatandá nan Katawan
nin Makapangyadian. “Baná kunan bali ko, ket
nasidá-sidá ya et, leleg saya tan saya kamo
abaw gawá muyo kunran bubali muyon diri. 10 Kanyá,
baná sa kumuyo saray lulangit man´itawer nay
dyang tan sa babon lutá say pamula. 11 Tinawag kuyay
ligat nin mako sa lalawak tan sa tutalugtog, sa rinakay,
say báyon arak, say ladak nan ulibo tan sarban raruma
et nin tumubó sa lutá, kunran tutawo tan kunran
bubaka, tan sa sarban gawá nan gamet muyo.”
12 Kaaraam si Surubabel anak nin lalaki na
ni Salatyel, si Huswí anak nin lalaki na ni Husadak,
si atágay nin sanguti tan sarban natrá nin
tutawo tinukid rayay busngaw nan Katawan nin Dyos ra tan
sa patandá nan mamamadles si Hagyo, baná ta
si Katawan nin Dyos ra nibakí naya. Tan saray tutawo
nipákit ray magalang nin kángap ra kunan Katawan.
13 Kaaram si Hagyo, síyay ibabakí
nan Katawan, nami yan patandá nan Katawan kuran tutawo:
“Isen ako nikikalamo kumuyo,” nipatandá
nan Katawan. Kanyá pinukaw nayay nakem na nin Surubabel
anak nin lalaki na ni Salatyel, gubernador nan Huda, tan
say nakem na ni Huswí anak nin lalaki na ni Husadak,
síyay atágay nin sanguti, tan say nakem ran
natrá nin tutawo. Rinmaté sara tan tinmaraná
rayay gawá kunan bali nan Katawan nin Makapangyadian,
si Dyos ra, sa ikaruwam-puló tan ápat nin
awro nan ikánem nin bulan.
Sa Pangakó
nin Kaalagawan nan Báyon Bali
Sa ikarwan panaon na ni Adí Daryus,
Ipatuloy et...
