Huwel - Máran Tarato nan Biblya

Say Pangraot ran Andudon
2 Marngé kamo kunan siti, síkamon matutuntawo; ingaren muyo, sarban mampiikap sa lutá. Main bilang wantin bagay a masabin nangyadí sa pupanaon muyo udino sa pupanaon ran pupuon muyo? Ibaritá muyo kunran ának muyo, tan aburuyen saray ának muyo nin ibaritá kunran ának ra, tan kunran ának ra anggan sa sumunor nin kararakan. 4 Animan a nibatí nan andudun saray sangkábawan nin andududon kinan rayayna; animan a nibatí ran sangkábawan nin andudon saray malagó nin andudon kinan rayayna; animan a nibatí ran malagó nin andudon saray raruman andudon kinan rayayna.

5 Mibangon kamuyna, síkamon mabubok, tan sumangit kamo! Umagrang kamo, sarban mangingimon nin arak; umagrang kamo baná sa báyon arak, bangta nagamrot yayna sa labí muyo. 6 Nangraot yaynay sayan pakababalyan sa lutá ko, say magsen a pididinep nin makilaban a kai maibilang; main ngipen nan lyon, say pangil nan lyuna. 7 Sinidá rayaynay wakay nan ubas tan nasidá ana saray kayon igos ko. Pinarúpó na saray ubak na tan tinampal rayayna, man´ibatí ra saray maputí nin sanga.

8 Bumaliwan kamo bilang nan sayan balasang nin miaysing kunan masarapsap nin abel ta síyay manbumereng kunan pinakaasawa na kumon sa patubó na. Saray dáton nin rinakay tan saray dáton nin inumen kasa sarayna sa bali nan Katawan. Saray sanguti manbumaliwan sara, sísaray mangiyagel sa adapan nan Katawan. 10 Nasidá saraynay lalawak, say lutá nakrí sarayna; nasidá anay rinakay, say báyon arak nakrí yayna, kurang anay ladak nan igos.

11 Rumeré kamo, síkamon magtatalon, umagrang kamo, síkamon mangmumula a wakay nan ubas; bumereng kamo kunran trigo tan sibada, baná ta nasidá yayna a yatab nan lalawak. 12 Nakrí yaynay wakay nan ubas tan kinumbet anay kayon igos; say granada, say anahaw tan kayon mansanas—sarban kukayo sa lalawak—nakrí sarayna. Saew say ririket ran tutawo ket kumbet nin makasa.

Say Pakayaban kunan Panganbet-abetan
13 Umaysing kamon masarapsap nin abel, síkamon sanguti, tan bumaliwan kamo; umagrang kamo, síkamon mangiyagel sa adapan nan altar. Mako kamuyna, málek kamo sa yabi nin miaysing kunan masarapsap nin abel, síkamon mangiyagel sa adapan nan Dyos; baná ta saray dáton nin rinakay tan saray dáton nin inumen napukpukan ana sa bali nan Dyos muyo. 14 Ipatandá muyoy pangilin nin manepeg sa Katawan; mangayab kamon pidudupong nin maneg sa Katawan. Kayaban muyo saray matutuntawo tan sarban mampiikap sa lutá kunan bali nan Katawan a Dyos muyo, tan itáway muyo kunan Katawan.

15 Ay sa kaberengan kunan siin nin awro! Kunan awro nan Katawan adani yayna; rumaté ya lí bilang sa pakasidaan a nangibwat sa Makapangyadian.

16 Kai para nin nakasa saraynay kanen sa adap nan mata tamo—say pakaririktan tan say gayágá a nangibwat sa bali nan Dyos tamo? Saray biní nakbet sarayna sa rarem ran matitib´ey nin lutá. Saray kamarin mayubá-yubá sarayna, saray kamarin nin rinakay nayubá sarayna, bangta nakrí sarayna rinakay. 18 Umareng´en saraynay bakid nin baka! Umalis-alis sara sa lalawak baná ta kasan pukrido ra; taman saray bakid nin karniro mampamadyá-dyá sara.

19 Sa kumo, Katawan, tawagan taka, baná ta nakápos anay pukrido nin napuuran itaw sa kaatapan tan say apoy ket napuuran anay sarban kukayo sa lalawak. 20 Taman saray ayep talon umal´al sara sa kumo; saray subor nin ramon nakrang sarayna tan nakápos saraynan napuuran saray pukrido sa kaatapan.

Ipatuloy et...