Isayas
Kapitulo 1
1 Say pangikitan na maipáká
sa Huda tan sa Herusalen nin nákit na ni Isayas anak
nin lalaki na ni Amos sa leg´an nin nag´uray
sara si Usiyas, si Hutam, si Akas tan si Esikayas, sísary
uadí nan Huda.
Makasuknadan
nin Pakababalyan
2 Marngé kamo sa kungko, síkamon lulangit!
Marngé kamo sa babon lutá! Baná ta
nibaritá naynan Katawan: “Pinagawan koy ának
tan pinaalaki ko sara, balé sinmuknad sara subag
sa kungko. 3 Say baka tandá nayay mangingikon kuna,
tan say asno tandá nay lalabangan nan mangingikon,
Balé si Israil kai na tandá, saray tutawo
ko kai ra mataros.”
4 Ay! Makapabereng kunran saray pakababalyan
nin makasalanan, saray tutawo nin alaki yay kasalan ra,
saray ának nan duká tawo,
saray ának nin naibi sa pakasauran! Nalingatan rayayna
a Katawan; inuryan rayayna a síyay Sayan Madyusan
nan Israil tan ginurutan rayayna.
5 Mambalé balbalen kamo kumon sawanin?
Mambalé ipas´et kamo sa pakasuknadan? Say masibulot
nan ulo muyo ket nangno sarayna, say masibulot nan pusó
muyo ket nadyádyá saryayna. 6 Nangibwat sa
ayupá nan ayi muyo anggan sa ababo nan ulo muyo kasa
gapo nin pakarigsawan--sugat tan bunel tamó tan buká
nin dunor, kai et naringgasan udino natápal udino
napakpá sa ladak nan uliba.
7 Say babalyan mo ket napuryan ya, saray
bubabali ket napuuran sara; saray lalawak muyo ket rinúpó
rayayna saray taga rikor sa adapan muyo, nasidá-sidá
bilang nin nadaegan ran san´ili. 8 Anak nin babayi
si Siyon natrá ya bilang nin abung-abong sa nakamulawan
ubas, bilang nin bálag sa lalawak nin pipino, bilang
nin babali a sinaneban. 9 Dapot no nangibatí yay
Katawam nin Makapangyayadí a umnu-umon mabyay et,
mag´in tamon bilang a nangyadí sa Suduma, mag´in
tamon bilang a nangyadí sa Gumura.
10 Reng´en muyoy saritá nan
Katawan, síkamon nag´uuray sa Suduma, mangingar
kamo kunan bibilin nan Dyos, síkamon tutawo sa Gumura!
11 Say muyek nin pangatangan muyo— ani sara kungko?”
wanan Katawan, sadag main et abaw a napuuran nin dáton,
nin mimí tan say tabá ran pinatabaan nin ayep;
kasan kaririktan ko sa dayá ran turo, say mimí
tan say kanding. 12 No mako kamudti nin mipadar sa adapan
ko, síno a nangibaritá kumuyo nin gaw´en
ti, sitin man´italma-talmak muyo sa kamimínan
nan simbawan ko? 13 Tumgen kamuyna nin mampangíras
a dáton nin kasan gagará! Say insinso muyo
sabtan makagurá sa kungko. Saray Báyon Bubulan,
saray Uawron Painawa tan saray pidudupungan muyo--Kai ko
gapo maanos saray pidudupong nin mangmang. 14 Saray pakan
nin Báyon Bulan tan saray nasuyó nin pista
muyo ket gurá kon talaga sa sarban pagkamain ko.
Nag´in saraynan mabyatan sa kungko; mablay akuynan
man´anusen sa kunra. 15 No ipánat saray gamet
muyo nin dumasal, iyadi a mata ko sa kumuyo; taman no mangidáton
kamon abaw dudasal, kai ko ingaren.
Saray gamet muyo napnó nin dayá!
16 Manguyas tan magringgas kamo sa kumuyon
bukod. Kalapen muyoy duká gawá sa liwá
nan pangikit ko; tumgen kamo sa kamalí nin gaw´en.
17 Mag´adal kamo sa matunong nin gaw´en, sumirsit
kamo sa katunungan. Ayunan muyo saray nauyáyaman.
Antabayen muyo saray ulilan siblot; mangayat kamon tumulong
kunran balo.
18 “Pari kamuyna, makikidunong atamo,”
wanan katawan. “Taman wanin a kasalanan muyo ket bilang
nin múdit, mag´in sara lí bilang maputí
nin nyibis; taman wanin saran múdit a mararem nin
sangkaudit-uditan, mag´in sara lí nin lilanlana.
19 No matalek tan matukid kamo, mangan kamo lí nin
maandá nin bubarang sa lutá; 20 balé
no teplan tan suknadan kamo, mangkápusen kamo lí
sa gayang.” Baná sa bebey nan Katawan ket nag´irgo
yayna.
21 Kikiten muyo páno yay matalek nin
babali a nag´in yan balangkantis! Napnó ya
pa intaw nin katunungan; miikap intaw a kinamapteg sa kuna--balé
sawanin miikap saray mangmamati sa kuna! Say pirak muyo
nag´in natrá nin yatá, say napilian
nin arak muyo ket naranuman yayna. 23 Saray mag´uuray
muyo ket manunuknad sara, mitagem sara kunran mananakaw;
rabay-rabay ray lagay tan mangamat nin pangingibyan. Kai
sara gapo mangantabay kunran ulilan siblot; kai sara gapo
mangayat nin tumulong kunran balo.
24 Kanyá si Katawan, si Katawan nin
Makapangyayadí, síyay Saya nin Makapangyayadí
nan Israil, ipantandá na: “Ay! Ibusngaw ko
lí a sager ko kunran kabunó ko tan mamálem
yay kadiryan ko kunran kagurá ko. 25 Italikdas koy
gamet ko subag sa kumo; ganap kon galaten sarban natrá
nin yatá tan galaten ngámin nin ambó
maringgas. 26 Pabáyuwen ko lí saray pangungulo
bilang intaw, saray mag´uuray muyo sin saytaw sa kataranaan.
Mísa kamo lí nin tawagen a Babali nin Kinamapteg,
say Babali nin Mailalwan.”
27 Si Siyon maaon ya lí a makalamó
nin katunungan, saray magbabawí na makalamó
nin kinamapteg. 28 Balé saray manunuknad tan magkasalanan
sísaran rway mabarí lí, tan sísaray
malingatan kunan Katawan mati sara lí.
29 “Mading´ey kamo lí
baná sa sagrado nin kayon diraan a pinaririkten muyo;
mámet muyo lí a galang baná sa pangmulawan
nin pinilí muyo. 30 Bilang kamo lí nin kayon
diraan a maandipat nin bubulong na, bilang nin pangmulawan
nin kasan ranom. 31 Si makapangyayadí nin tawo mag´in
yan sapsap tan say gawá na mag´in nin leyew;
siran rwa ket mikalamó saran mapuuran, nin kasan
saya a dumepdep nin puor.”
Ipatuloy et...
