Say sayan ibali imarka ran
Pista nin Bangus a pagmahon

Nangibawat sa Sunstar.com 4/1/08

Saray sangkabistawan nin bangus a nangibwat kunran mangalilá nin kuná sa ibalin Dagupan tan saray raruman kamínan sa Pangansinan ket maipatandá lí sa Abril 29.
Sitin pista a wanran “Bangusfest Rodeo” ket saya yan aktibidad kunan sitin taon sa Ibalin Dagupan a Pistan Bangus. Ipapákit lí a sangkabistawan nin bangus sa sitin ibali.

Si Kunsihal Lino Fernandez sa Dagupan tan panguluwan sa pagmahon nin bangus, wana nin mangkit sara nin sangkalakyan nin bangus, sangkaanruwan nin bangus tan sangkabistawan nin pakákitan nin bangus ta main nin tumong udino primyo nin kwarta sa saraytin katiguryo.

Main et lí nin pagmahon a sangkapaspasan nin mangitandaan a nagsikabarang nin bangus, say mamut´ol nin bangus, tan say mangan nin bangus a naibaya.

Wana ni Fernandez, say pagmahon ket tumaraná nin alas syis a buklas sa kamínan nin Malimgas Palingki itaw sa dalan nin Galvan Street tan saray ABS-CBN magprugraman “Umagang Kayganda” udino Buklas nin Kaibista.

Wana et saray mangalilá nin bangus ket makaluuban sara tamó a saya nin bangus kunra a sayan-saya a katiguryo nin sangkalakyan, sangkaanruwan, tan sangkabistawan nin pakákitan.

Si Fernandez, síya anamaet a mangalilá nin bangus, wana say kabyatan nay nanalo nin bangus sa katiguryo nin sangkalakyan intaw sa núna-núnan Pista nin Bangus ket saya tan kakawalo a kilo. Balé sin sayan taon, say nanalo kabyatan ket pito tan kakarwa a kilo. Wana et saray kaluuban sawanin makabyatan sara layi nin walo a kilo.

Say kwartan tumong a sangkalakyan tan sangkaanruwan nin bangus makakalap saray manalo nin labin-liman ribo a pisos (P15,000) tan mapuló ribo nin pisos (P10,000) tan (P5,000) liman ribo a pisos kunran núnan tan ikarwan sumunor a manalo anamaet.

Main edet nin mangalilá bangus a tinmaraná saraynan tinmubó nin bangus sin saytaw et a tinmaraná yay pistan bangus.

Wana ni Fernandez, main et sayan tawo si Mr. Caning a nangibi yan liman yasot a natubó nin bangus kunran pamanalayan (hatcheries) sa Bolinao tan Saul tan kunra sa BFAR (Bureau of Fisheries and Aquatic Resources) itaw sa Bonuan Binlok.
Sawanin, saray kumiti nin Bangusan Street Party mansumadyá saran abaw et a rwam-puló ribo nin bangus a maibaya lí sa Abril 30.

Wana ni Fernandez, kai ya bumibilin a “Guinness World Record,” balé kapada sa nangyadí sin saytaw, mangipádeng saray pamamayawan (grills) itaw sa dalan nan AB Fernandez Avenue, tumaraná sa kamínan nan Café Du Marc anggan sa kamínan a plasa nan ibali.

Say gastos nan saya a mitro nin pamamayawan ket rwam-puló yasut a maikalamó saray rwam-puló nin bangus, uring, bidang, tan say parilya.
Wana ni kunsihal ipahiwatig na kuna ni ikarwan Alkaldi Belen Fernandez, síyay pangulo sa Pistan Bangus, nin saray pamalakuan a naibaya nin bangus ket maipádeng sara pigaw saray bisita tan saray tutawo a nangibwat sa raruman barangay makapasaliw sara anamaet a luto nin bangus.

Say Bangusan Street Party abaw lí a paliwaan tan buya-buyawan. Main lí pito nin intablado udino pamabuyawan a naitayak maong sa dalan nan AB Fernandez Avenue.

Ikalamó et, piton banda a mabantog nin mirngan a tumugtog sa pista, sara si Spongecola, Bamboo, Parokya ni Edgar, Kamikazee, Blackdyak, ABS-CBN One Team, tan GMA Kapuso.

Nipataros sa Binubolinao ni Oswí Castellano