Kumpyuter
 
AMIRIKA PAGLAKUAN PAKATANDAAN TIKNULUHIYA PAKAINGARAN IIKAPAN IISIPAN ARTI ISTILO PASYAR LUTÁ RURANAN
  Kumpyuter   |

Say Asya-US a kabli nin dadalan a wanran gateway adanin mayadí yayna lí sa Agusto:Dupong Pilipinas

Nangibwat sa GoogleNews/AFP
Hunyo 17, 2009

Manila—Sa rarem taaw say kabli a sistima nin fiber-optic a mangisuldong sa Bagatanan-Baytan Asya anggan sa US mayadí yayna lí sa Agusto, wanan dupong sa Pilipinas a sakop sa International Consortium of telecom firms sa Myirkulis.

Sara sa dupong nin Philipines Long Distance Telephone Company wanra nayadí anay gagawá ninpaikwaan a kabli sa lutá nin sistima a 20,000 kilumitro (12,430 milya) nin kaanruwan tan say natrá gagawá nin paikwaan sa rarem taaw ket mailalwan nin mayadí kunan sitin bulan.

“Say pangusisaan sa network mailalwan tumaraná tampor mayadí sa natrá paikwaan nin gagawá sa rarem taaw,” wanran nikalamó nin dupong sa pinatandaan ra.

Sitin pruyikto a mapaspas nin kabli a wanran high-bandwith tinmaraná sa Mayo 2007 sa dandani a bili nin 500 milyon dulyar. Maisuldong saray Pilipinas, Malaysia, Singapore, Thailand, Brunei, Vietnam, tan Hong Kong sa US tan maikalamó et saray Guam tan Hawaii.

Nipataros sa Binubolinao ni Oswí Castellano

Sumublí sa babo

• • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • •

Dudungawan (Windows) 7
a báyon nikaliwá nin
maong yan talaga

Nangibwat sa Houston Chronicle
DWIGHT SILVERMAN
5/19/09

Saray kaduyon ruway sinsurat kon patandaan, nasurat kon ruwa ray nipakákitan ko sa Dudungwan 7: main mangipaligwasan sa báyo a Kandidaton Paliwaan tan sa pakayadí nan ipangred sa panganganruwan (virtually) báyon prugrama a máran nan prugraman dudungawan a wanran XP sa umnu-umnon kumpyuter udino urdinator.

Sawanin ana a udas a ipayupá nin ani talaga a rabay mon tandá: Pánon kaungan nan Dudungawan 7 sawanin nan kapangwaan, tan magwá anan saliwen no lumwá yayna lí, layi kunan sitin pananon nin pangyataban?

Say ubat nan únan tepet: Ua, sitin nailiwaan nin inusisá a nayadí tamó ket mabista ya. Talagan mabista ya. Pagé a mabista yayna ket no rabay rayna sara sa Microsoft nin tawagen yayti a nayadí ana tan ipaliwá rayaynan talaga, mabibista ya et nin prugrama dyan sa man´agamiren ra sawanin nin Papákitan nin Dudungawan (Windows Vista) sin limuwá ya sa masakbay nan 2007.

Man´agamiren koy panarínan (beta) nin Dudungawan 7 sin masakbay nan Iniro, tan sa Kadidaton Paliwaan (Release Candidate) a linumwá sa Mayo 5. Niká kuya sa nagsikabarang nin kukumpyuter, sa HP Netbook, sa Alienware gaming notebook, tan sa maksaw a Desktop (padunguwan) nin kumpyuter a ginwá kon bukod. Niká ko yaet sa umnu-umnon panganruwan makina (virtual machine) a kumpyuter nin Mansanas (Apple) sa iMac tan sa Macbook. Sa ngámin a nikaan nin kumpyuter, sabtan daikleng tamó a kaguluwan udino kasa gapo et, tan say pagawaan nan Dudungawan 7 ket mapaspas ya.

Maagamiren nin paaligwasan

Kunan pakaulitan nin sinurat ko sa Iniro kunan Dudungawan 7 nin panarínan (kikiten yay www.chron.com/w7betareview), nipákit koy únan nasisilyan sa Dudungawan 7. Say Candidaton Paliwaan ket naaligwas saradti. Umnu-umno tamo a báyon magawá na, bilang sa Mudon (mode) Dudungawan XP a naipákit sa pakaulitan ko sin sayan linggo.

Balé saraytin aaligwasan ket abaw saran paagamiren. Bilang wadí sa bináyon pagawaan nin papanditan (taskbar) tan say padunguwan nin kumpyuter (desktop) sa Dudungawan 7 tumulong sa kaguluwan nin abaw tuloy a prugram nin nabukaan. No masupurta nay Aero (say wanran Graphical User Interface-GUI a say ngaran nangibwat sa Authentic, Energetic, Reflective tan Open) —siti pa a makapakákit sa rarem a kapákitan nin núnan limwá sa Papákitan nin Dudungawan—mísa no ipaiyalis may pangituduan sa yupá nin wanan sa rigrig udino pingir nan dudungawan nin kumpyuter, mag´in saray nabukaan nin dudungawan nan prugrama nin kwadron alambri tano mákit may padunguwan nan kumpyuter sa sirong ra.
Sa pakaulitan nan panarínan, inirgo koy pangiyalisan nan pangituduan sa babo nan pagawaan nin papanditan tano mákit a pakayadí nin tangan kuko (dynamic thumbnails) a mampangred nin puprugrama tan say maabaw nin tab sa Mamangkit nin Internit (IE). Balé no ilumtaw may patuduan mo sa babo nan tangan kuko, maipákit lí a naipapnó nin dudungawan na sa padunungan nan kumpyuter tan saray raruman dudungawan mag´in saran kwadron alambri. No abaw a prugrama mon mampangred sa notebook nin kumpyuter a daikleng yay dudungawan na sitin magawá na ket pinaraté nan dyos ti.

Inaligwas ra anamaet sara sa Microsoft a pagawaan nin ipapay´an et a mangipyawan kunran aagamiren sa kumpyuter nin ikalalamó udino ikunikta sa kumpyuter mo. Sa panarínan, siti pa a wanran Device Stage balé sinilyan ray ngaran na nin Devices (aagamiren sa kumpyuter) tan Printers. Maikalamó a abaw nin patandaan maipáká sa iibot, papapanditan (keyboards), puprinter, mumunitor, mangungupya, tan raruman aagamiren nan kumpyuter. Iti anamaet nin mamilí ka a printer nin sipod (default), mangikalamó a mamapyawan (drivers) ran aagamiren nin kumpyuter (components) tan sumrep et sa mamangikalalamuan (network) nin dumadalan (router) mo sa bali. Sarayti a masilyan kunan mamapyawan nin aagamiren (device manager) balé saray mamaringgas (purists) kai sara matkap masalak, kai ra ginlat a mamapyan nin aagamiren.

Sumumrep sa Mamangikalalamuan

Sara sa Microsoft nikalamó ra anamaet a magawá a mangagos (stream) nin tugtog tan sini a mainum´ay nin gaw´en sa sayan kumpyuter nin Dudungawan 7 anggan sa raruman kumpyuter, bilang sa raruman aagamiren nin masupurta na. Kikiten mayti et: Magwá et lí nin mangikunikta sa kumpyuter mo sa bali tan mangagos kan tugtog udino sini sa internit.
Magwá ti sa pakalamuan sa raruman báyon magawaan a wanran grupon pamalian (homegroups). Leg´an nin iká maynay Dudungawan 7 sa kumpyuter mo, tepetan raka lí nin mangwá ka a grupon pamalian, ket aburuyan naka lí nin pilien no síno a rabay mon makakiramá sa mamangikalalamuan sa bali mo. No main nin maawit-awitan (portable) mo nin kalamó sa grupon pamalian mo, mísa kan magwá sa bilang wadí nin mako ka sa rabay-rabay mon pamagkapian a main a wanran Wi-Fi undino kasan alambri kunuktawan tan makakunikta ka sa Internit kunan mamangikalalamuan sa bali mo. Say maawit-awitan mon Notebook ket maalilbí ya lí sa grupon pamalian mo tan makakalap moy agamiren mo.

Sa babo ngámin, say Dudungawan 7 mamasilengan yaet tan mapetegan ya, mabubugá yaet nin makapasnepan dyan say Papákitan nin Dudungawan. No síkay umaagamiren nin Papákitan ket napasnep kaya kunan sitin mampangupira nin sistima (Operating System), marabay mo lí a mangipaligwas nin madalí no lumwá yayna lí. No síkay umaagamiren a Dudungawan XP ket mariga ka sa kasan pasisilyan, marabay mon layi nin kikiten yay Dudungawan 7. No say makagawaan na sa suyot nan pangwaan ket mákit sa Kanditaton Paliwaan, say Dudungawan 7 a paaligwasan sa babo nan Dudungawan XP nin paaligwasan na kumon nin Papákitan.

Nipataros sa Binubolinao ni Oswí Castellano

Sumublí sa babo

 

Patandá nin Kumpyuter

No main nin kuminto muyo kunran saraytin patandá, suratan muyay Binubolinao.com udino magpusto kamo sa Mag´irgo Atamo nin siksyon pigaw maikalamó saray kuminto muyo.

• • • • • • • • • • • • • • • • • • • • • • • • • • • • • • • • •

Síkami      |      Pakánuan      |      Nangyayadian      |      Inglis      |      Raruma