Anda
 
AMIRIKA PAGLAKUAN PAKATANDAAN TIKNULUHIYA PAKAINGARAN IIKAPAN IISIPAN ARTI ISTILO PASYAR LUTÁ RURANAN
  ANDA   |   BOLINAO   |   DAGUPAN   |   IBALI (MANILA)   |   Lingayen (Pangasinan)   |   Mindanao  |   Sagada   |   Sambuanga   |   SIBo (CEBU)   |

Man´galaten rayayna a Pispin
sa sayan babali sa Pangasinan


                                                                                                                                                             FoNgEtZ

Nangibawat sa Philippine Daily Inquirer 4/18/08

Saray pispin tan saray tahungan (talabaan) bubarang sarayna lí a nangyadí sin saytaw itaw sa puro a babali nin Anda. Wana ni Alkaldi Nestor Pulido kai nayayna ipabáyo saray aburuyanan nin magpispin tan binibilin nay galaten ngámin a tahungan sa babay a lumibed sa babali na.

Rabay mi nin galaten ngámin a pispin sa sayan taon. Baná ta saray pispin kai makaagos a ranom sa baybay, a wana ni Pulido.

Say únan peteng mi ket rabay mi nin ipatuloy say agos nan baybay kanyá galaten ana saray tahungan, a wana.

Sa Hunyo sin sayan taon, sitin babali ket namet a dandanin P100 milyon a bili nin bangus sa sabtan alaki nin pamatyan nin kuná itaw sa Baybay nin Kakiputan a ipasyay nay sitin bababli kunan kabaraybay nay babali nin Bolinao.

Saray upisyalis binintang rayay naseseksekan tuloy saray nipádeng nin pangungunaan ket kai makaagos a ranom sa baybay anggan sa taaw. No mangyadí ti, kumayupa a uhigina tan ayupá yan tuloy a makáti a nangyadí intaw.

Sitaw say makáti ket ayupá yan tuloy baná kunan bulan-bulan, mangyadí ti sa kalla-ikarwan tan kalla-ikápat ran kukakápat nan bulan.

Wana ni Pulido, aburuyan ana edet a piskids undino karungan nin kuná baná ta makaagos a ranom sa baybay.

Saray ikspirto udino talagan maong a nibaritá ra kuna no say ranom taman makasamá ya basta umagos ya, saray bangus makapabyay sara, a wana.

Wana et, saray tahungan matkap saran galaten ta sambenan rayay ranom nin makaagos.

Saray magtahungan agamiren ray tulos, saraytin anununron kawayan nin naisaksa-saksak sa yupá nan baybay a kapikngá mitro anggan sayan mitro a kadanyan.

Balé, dumalit anan dumalit saray tahong (talaba) isen. Say daikleng nin kawayan umalalaki saran dadaité anggan masalban ana a ngamin nin ranom, a wana ni Pulido

Wana, say panglatan nin pupispin ket matkap nin inut-inuten a gaw’en ta pigaw kai ya madali a kabyayan nin magbangus sa babali.

Say babali umabang yan kwarta kunan siin, a wana nin Piludo.

Bubabali nin Anda tan Bolinao mapag´wá sara a ánem-apuló nin tunilada a bangus nin inawru-awro.

Nipataros sa Binubolinao ni Oswí Castellano

Sumublí sa babo

Patandá nagibwat
sa Anda

No main nin kuminto muyo kunran saraytin patandá, suratan muyay Binubolinao.com udino magpusto kamo sa Mag´irgo Atamo nin siksyon pigaw maikalamó saray kuminto muyo.

Síkami      |      Pakánuan      |      Nangyayadian      |      Inglis      |      Raruma