10 nin Sini sa Pilipinas
a bantayen sa 2011

Nangibwat yayti sa Blazin100.com
Pebraro 12, 2011

Sa 2011 kaririktan nin taon sa Sinima nin Pilipino. Mampangwá a nangibwat sa pakagámuran nin paganansyaan tan pakagawaan sin sayan taon, man´ikalamó et a únan kaanruwan a pakaliwaan nin CGI animasyon RPG: Metanoia a ginwá ra sa Star Sinima tan sa kábawan a sangkabantugan nin sini bilang sa Si Agimat at si Enteng Kabisote. Sarayti e a 10 a báyon sini.

In The Name Of Love ( Sa Ngaran Nan Adó)—Saray uaktor sara si Angel Locsin tan si Aga Muhlach, kalapen nay pakadanyan nin paipákan bilang sa "Dirty Dancing (Makasamá nin Dumukdok)". Sitin sini lumiwá ya sa Mayo 2011.

Here Comes the Bride 2 (Rumaté Yaynay Ipakasalan 2)— Siti pa a kasuldong kunan mabantog sini nin makapakális sa 2010 a uaktor sara si Angelica Panganiban, Eugene Domingo tan Tom Rodriguez. Sin sayan taon sa Desyimbri, nipaneknek na ni Tom a sumublí ya nin asawa ya kuni Angelica sa kasuldong nan sini.

Ikaw Ang Pag-Ibig (Síkay Pangadó)—Siti pay sini nin drama a maipáká sa nagawá nin 300 tutaon kunan Babayi nan Penafrancia, patrunis ra sa Bikol. Sara si Jomari Yllana, Marvin Agustin, Jamie Fabregas tan si Eddie Garcia sísary uaktor kunan sitin sini.

Catch Me I’m In Love (Saladuken nako ta nakaadó ako)— Pitageman saray Viva Films tan Star Sinima nin man´ipadar ya si Gerald Anderson, síyay kursunadan aktor sa awro, tan si Sarah Geronimo, síyay Prinsisa nin Bantog sa Viva. Say sini ket nagámor yan bugá a balaw kunran maneneed baná sa paulo nan sini a wanran "lame".

Maalaala Mo Kaya (Panemtem Muko Kadí) ^ika20 nin Anibersaryo— Sara sa Star Sinima kai ra et nipatnag a tarúman. Say únan sini nan MMK intaw ya sa 1994.

Ang Mundo Ni Andong Agimat (Say Mundo ni Andong Agimat) Siti a sini nin pipapasaya ra sara sa VIVA Films tan sa GMS Films tan nibi rayay únan aktor kuna ni Dingdong Dantes. Saray raruman uaktor sara si Jennylen Mercado, Michael V, Paolo Contis tan si Mark Herras.

Ouija: Ang Pagbangon (Widya: Say Pamangon)— Sumublí saran mikakalamó sa sini sara si Jolina Magdangal tan si Judy Add Santos. Kasuldong yayti nin sini kunan 2007 mabantog a makapalímo nin sini.

Private Benjamin-2010 pa a taon kuna ni Vice Ganda tan sitin taon abaw et a pruyikto nin tumágan kunan kumidyan. Saray raruman uaktor sara si Jimmy Santos, Malou De Guzman, Paolo Hubalde tan si DJ Durano.

Temptation Island (Puró nin Tukso)— Siti a ginwá ra anamana nin sini a magámuran sa tutaon nan 1980 a máteng ana nin marnge-marngé balé kabwat-bwat yayna nin lumiwá kunan sitin taon. Maipákit saray umno ran sangkaandaan nin rupa sa kumirsyo nin paliwá sa Pilipinas: Sara si Marian Rivera, Angelica Panganiban, Carla Abellana, Lovi Poe, Andi Eigenmann, Pokwang, Tricia Santos, tan si Iya Villana.

Who’s That Girl (Síno yain nin Babayi)— Sumublí sara si Luis Manzano tan si Anne Curtis sa alakin sini kunan báyo ran mikalamó sa "Who's that Girl". Say únan pikalamó ra sa sini sitaw nin All about Love (Maipáká gámin sa Adó).

Nipataros sa Binubolinao ni Oswí Castellano

Sumublí sa atágay

• • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • •

Pilipino udino Amirikano? Say Sakalako nin Pangibwatan
sa Kataránan nan Pista a Matinek nin Sini.

Pista nin Sini
Ikaliman Pista a Sini nin Matinek sa Sansinakban
Agusto 26-28 Sinima 2, Shang Cineplex, Ikaliman tágay, Shangri-La Plasa Mall, EDSA mikanto nan Shaw Blvd., Mandaluyong
Kasan Bayad

Nangibwat yayti sa BusinessWorld Online
JEFFREY O. VALISNO
Agusto 25, 2011

Say Ikaliman Pista a Sinin Matinek sa Sansinakban—mampangyadí nin tinaon-taon sa Shang Cineplex, Shangri-La Plasa Mall sa Mandaluyong—guruy-guruyen a apes ran mararabaynin sini ta siti pa tamó a mampangyadian nin sini sa Bagatanan-bayan nan Asya nin mangipákit a umnu-umon sangkaandaan nin gawá sa sini a nangibwat sa panaon a kasa et nin tunoy sa sini.
Sawanin sa ikaliman taon na, say Ikaliman Pista a Sinin Matinek sa Sansinakban tumuloy ya kunan sitin duyon linggo a maikalamó saray pakaliwaan ran makapatandaan nin matinek sini a nangibwat sa Alimanya, Italya, Ispanya tan sa Hapon.

Taman sa pakakiramaan nan Grisya kunan sitin taon, masurok et nin pamamabli ta si Pilipinas ambó ya tamó nin mananadyá.

Say sayan matinek nin sini a wanan "Brides of Sulu" udino Saray Ipakakasalan na ni Sulo, pakataránan ya sa tulon awro nan pista, a main nin napakákitan sa alas 7 sa yabi (Agusto 26).

Saray uaktor nin Pilipino sara si Adelina Moreno tan si Eduardo de Castro, say 47-minuto nin sini a maipákit a pakaidapan sa byay a wanran drama maipáká ya kunan magana-ganan prinsisa nin Muro tan si kaaduan na, síyay mag´anito a manunum´et nin mutyá, ket tugaen rayay gan-gan nin pakateperan ra pigaw makapikakalamó sara.

Maandá a ginwá nin sini itaw sa kamínan nin Sulo a man´agamiren ra saray Muro, sitin naligwanan a matinek nin sini mami yan máteng ana sin nákit ya intaw sa námet nin pakaugalian.

Si mangingiyator tan kamaungan sa matinek nin sini, si Teddy Co nangibwat sa Dupong nin Pilipino a Mangingiyator nin Sini (Society of Filipino Archivist for Film) wana saray gumagawá nin sini sa Pilipinas intaw main a dandanin nin 75 a matinek nin sini a ginwá ra nangibwat sa 1912 anggan 1933 nin taon.

"Makapabereng ta sara ngámin a matinek nin sini intaw anggan-angga sarayna nin námet baná ta kasa gapo a mangalilaan nin pangiyaturan, anggan sa tutaon nan 1970,"
nibaritá na kuran mangingidarom nin patandá sin sayan linggo.

Wana et saray matinek sini nin Pilipino, kagaw´an sara ngámin nin katay makapuuran a wanran nitrate stock, tan nasidaan sara kano sa pupuuran, lulanipan tan sa mampanglaban sa Ikarwan Pakikilaban sa Sansinakban.

"Kanyá kai ya gapo a Pilipinas nin nangipákit a sini kapresan nan Pista a Sinin Matinek sa Sansinakban itaw sa Shangri-La Mall anggan sawanin," wana.

No kasa gapo a sini nin Pilipino a naligyasan sa panaon intaw, adti ya nangibwat a Saray Ipakakasalan na ni Sulo—aya a Pilipino nin matinek sini ya anamain. Ginwá ra kano nin Amirikano sa Pilipinas intaw.

Sitin sini kai ya gapo nailista sa panunuratan udino sa panunuratan nin sini a Pilipino nin sini ya, balé say babalyan intaw sin ginwá ray sini, sakop ya et sa Amirika," wana ni Mr. Co.

Balé anamaet, wana ni Mr. Co say pangangadalan namin pruwibas maipáká ni sínoy nangwá a sini.

Makakalap sa bidyo nin pamamalian sin ruwampuló nin tutaon sin saytaw, nakatayak-tayak yayna pa sa panglakuan nin sini sa Amirika, man´ilakó ra kunran manenep tan saray mararabay nin sini.

Anta main tunoy nan bidyo a nailaok ana, wana nin Mr. Co kasa nin mag´irgo kunran uaktor, balé main mag´irgo sa ababo sa sini nin Amirikano.

"Lalun-laluyna, kasa nin naibaritá nan sini no síno yay nagwá a tunoy, wá lamang sitin sini nin Saray Ipakakasalan na ni Sulo a pagé yayti a sini nin Pilipino sa núnan pakaliwaan na," nipapalaway na.

Wana et ni Mr. Co banglí Saray Ipakakasalan na ni Sulo ket pinakandá yayti nin barang a nangibwat sa ruway sini nin matitek a ginwá ra sa 1931 nin maipáká kunran saray Muro a taga Sulo. Sarayti a ruwan sini; Prinsisa Tarhata (Princess Tarhata) a ginwá na nin Jose Domingo Badilla, síyay manglilitrato nin sini tan Say Tulisan sa Taaw nin Muro (The Moro Pirate) a ginwá tan naitagad na ni Jose Nepomuceno, síyay natandaan a Tatay nin Pangwaan Sini sa Pilipinas.

Wana ni Mr. Co sa Prinsisa Tarhata si únan aktor síya si Adelina Moreno, anta yay únan aktor sa Say Tulisan sa Taaw nin Muro síya si Eduardo de Castro. "Sa makapadan mangyadí, saran ruwa si Moreno tan de Castro sísaran ruwa a pangúnan uaktor sa Saray Ipakakasalan na ni Sulo," wana.

Sa kadayuan kunan siti, wana nin Mr. Co anamaet nin Saray Ipakakasalan na ni Sulo makapakákitan a ruwa ray sakop a napurok nin say sini a maipáká nan pagbuya a wanran dramatiko tan say sini nin nasakupan a maipáká nin nangyadí a peteg, ket banglí angangko sitin sini kapuryan ya nin sakalakuan a wanran "mutant offspring" a nakarti-kartiban tan ginwa-ginwaan anamana a nangibwat kunran núnan nin sini a tagadti.

Si Mr. Co main et lí nin ipákit na kapresan sa mampaliwaan nan Saray Ipakakasalan na ni Sulo sa yabi (Agusto 26) sa Shang Cineplex tan say kasakupan nan mangingitagad sa sini, si John Nelson, nin makapadan mangyadí, makapisabot a makapada ya sa únan litra a ngungaran nan mangingitagad nin Pilipino si Jose Nepomuceno.

Nabyay Tugtog

Bilang sa gindat nin pakaliwaan sa pista, saray matinek nin sini maipákit lí nin naikalamó a nabyay nin tugtog a manginugtog kunran sangkaungan a dudupong nin tugtog tan manginginugtog sa babalyan.

Kunan Saray Ipakakasalan na ni Sulo, si bukod nin manginginugtog, si Armor Rapista, síya lí a mamin tugtog, kapresan saray Panday Pandikal Cultural Troupe, sísara lí a manunugtog nin tugtog Muro a maikalamó yay tunoy nan pakákitan sa kamimínan.

Saray kababalyan nin mamantay manrabay-rabayan ra a pista nin matinek sini sin 2004, sin sa Núnan Pista Alemanya nin Matinek Sini a ginwa-ginwá ra sa Goethe Institute German Cultural Center.

Say pangubatan kunan Pista ket katay andá a wanra-wanra ket main ginwa-ginwá ran sumunor a pista nin matinek sini sa 2007. Baná ta naikalamó saray sini a ngibwat sa Hapon, Espanya, sa kadayó nan Alemanya, naingaran yan báyo nin International Silent Film Festival (Pista nin Matinek Sini sa Sansinakban).

Kunan sitin taon, say Alemanya paliwaan rayay pakalímuwan nin sini a wanran Nosferatu (1922). Siti pa a wanran puon ran sini nin aswang ket say Nosferatu kano a kai naiburuyan a pakiulatan nin Dracula na ni Bram Stoker.

Baná ta kai ra sa istudyo nin nakakalap a pakaaburuyan kunan pamasawan, si mangingitagad si Friedrich Wilhelm Maurnau tan si manunurat sini si Henrik Galeen sinilyan ra a ngungaran tan say raruman kasakupan nan tungtong kunan sini.

Say sini nin Nosferatu itungtong nay sakalako nin nangyadí kunan manglalakó nin kamínan tan bali báyo nan nipagket nin ilakó a bali na kuni Count Orlok, síyay aswang a main apes kunan asawa na.

Paliwaan yay Nosferatu (Agusto 26) sa alas 9 nin yabi mayadí nan Saray Ipakakasalan na ni Sulo.

Saray manunugtug kunan Nosferatu sara sa Far Eastern University Chorale tan si Alemanyan manunurba tan manunugtug nin pyano si Stephan von Bothmer.

Si Luisa Zaide, síyay mangangayus-ayos nin prugrama sa Goethe Institut, wana si Mr. Bothmer mako ya sa Pilipinas a nangibwat sa Alemanya para kunan pakaliwaan nan sini tamó.

Kapresan nan siti, say Pundasyon nan Hapon sa Ibali, ipaliwaan ray miludrama nin Akeyuku Sora (Mamparbangon nin Langit) dilap (Agusto 27) alas 5 nin patpaapon. Sitin 71 minuton sini, núna yan napaliwaan sa 1929) maipáká ya kunan ulila tan nanay na a naisyay sara balé mainsan nakapikalamó sara anamana.

Saray pakaliwaan sa Sabado, manugtog saray Bandang Malay, sísaray manunugtog nin tugtog katutubó.

Say pakaliwaan ran Italya sa pista kunan sitin taon, say anron tungtung a wanran L´Inferno (Impyerno na ni Dante), ayan mapakaliwaan dilap (Agusto 27) alas 7 sa yabi tan maikalamó a tugtog ran Razorback, sísaray dupong nin tugtog a wanran rock band.

Napnó a kalalwan nin mangyayadí a wanran special effects, pakanemteman, kalwaan tan kaksawan, huhiganti, dudragon, dudimunyo, tan raruman pugot nangibwat sa impyerno, say Impyerno na nin Dante main layi a alakin ayat na kunran mamamantay sin sa núnan pakaliwaan na sa Napolis sa Teatro Mercandante sa Marso 1911.

Dandani maipáká kunan gawá nin literaryo na ni Dante Alighieri, nayadí rayay ginwá a sini nin tulon taon tan naibilang ya a núnan lapag nin kaanruwan a mablin sini a ginwá ran Italyano.

Say maandá nin nayadí ket ambó tamó nangyadí sa Italya-- naibantog ya sa sansinakban, nakaganansya nin $2 milyon bukod sa Amirika.

Mapakaliwaan ya sa Linggo sa alas 5 nin patpaapon, say The Greek Miracle (Milagro ran Griyigo), naikalamó a tugtog na ni Heliodoro “Dingdong” Fiel taga kunran HDC Trio. Say sinin a nangibwat sa 1921 maitungtong nay pamalian nin taga Atinas a marabay nin mikikalamó sa pakikilaban, kunan asawan lalaki a múnan magbuluntaryo tan sumunor yay asawan babayi nin nangarigan a mangangalilá a nasaktan sa pakikilaban. Sistin sayan sasay sini nin wadí-wadí (say wanran "staged documentary film") ginwá ya bayo sa Ikarwan Pakikilaban sa Sansinakban sa Griyigo tan main et peteg nin manglalaban udino sundaló a nangibwat sa talagan kamimínan nan pakikilaban.

Say mampanadá kunan pista nin sini kunan sitin taon say pakaliwaan ra sa Instituto Cervantes, say rabay-rabayan ran Kastilá, Pilar Guerra (1926), naikalamó a tugtog ran HDC Trio, sísaray wanran jazz fushion supergroup.

Sitin sini a 63 nin minuto, itungtong nay pakaidapan sa adó nin anak-anaken tan iyawaan. Mákit tamuya si Luciano, síyay anak nan pangulon babali nin mayor ket pinalakwanan naya ni tatay na nin kai mampiaburoy pigaw maisyay yay anak sa ado na kunan mangangaakay na si Pilar Guerra.

Saray gámin nin pakaliwaan nabukaan sara kunran tawo sa babali. Naitayak saray tutikit nin kasan bayad kunran nakiramá nin pangibakian udino embahada tan saray dupong nin pakaugalian. Kunan Saray Ipakakasalan na ni Sulo tawagen muyo si Mylene Narciso-Urriza sa National Commission for Culture and the Arts sa 527-2209. Kunan Nosferatu, tawagen muyoy Goethe Institut sa 817-0978. Kunan Akeyuku Sora, tawagen muyoy Japan Foundation sa 811-6155 anggan 58. Kunan L’Inferno, tawagen muyoy Italian Embassy sa 892-4531 lukal 143. Kunan The Greek Miracle, tawagen muyoy Greek Consulate sa 526-1482. Kunan Pilar Guerra, tawagen muyoy Instituto Cervantes sa 526-1482. Kunran raruman panepetan, tawagen muyoy Shang Cineplex sa 633-7851 lukal 113 udino mako kamo sa www.shangrila-plaza.com.

Nipataros sa Binubolinao ni Oswí Castellano

Sumublí sa atágay

• • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • •

Páno ana Kadí (Paano na Kaya): Ribyu nin Sini

Nangibwat yayti sa reeladvice.net
Iniro 28, 2010

Marngé mo pa tamó nin sayan kansyon sa tibi tan radyo tan saray raruman kansyu-kansyon nin pulitikal sawanin – sitaw si kansyon a nangibwat sa sinin Paano Na Kaya. Sa kapatutúwan, makarngé moy kansyon nan sini mataman adti ka mako ket nag´in napsaan na kamin marabay mamantay kunan sini. Sara sa Bituen Sinima (Star Cinema) gumwá sara anama a wanran purmula nin gaw´en ra anamanaet sa manpinapatágayan nin báyon sini ra: manurba ka a mabantog nin kasyon a nangibwat sa sini, ipangaran may sini kunan kansyon, tan ipanugtog mon anamanan anamanaet anggan saray ngámi-ngámin nin tutawo kai sarayna makatágan nin mamantay kunan sini. Matepren muyti udino kai, náteng ana a gaw´en rayti nin makaayat ta dandanin ngámi-ngámin a man´gaw´en ran sini sa Bituen Sinima siti pa a pamakábawan nin lakó ran tikit. Tumuloy kamon mamasa tano mákit muyo no saray sangkabantugan a mitra-miadó sa sini sawanin, si Kim Chui tan si Gerald Anderson, nin maalaga a gastos nan tikit.

Saray kalla tutawo a mangibaritá, si sangkaandaan tawo nin mipaaduan síya si sangkaungan kamuko mo. Sara si Mae Chua (Kim Chiu) tan si Bogs Marasigan (Gerard Anderson) náteng saraynan mikakamuko balé si Mae sa nakem na rabay nan umabaw et dyan mikakamuko sara tamó. Nayadí ya tamó nin nisyay si Bogs kunan kaadó na si Anna (Melissa Ricks), ket si Mae kasa gapo nin gaw´en no kai itaw ya kuni Bogs nin manliwa-liwaen naya, pati pangiká a patkapan na ni Bogs báyo sa patkapan na. Sa kalansuyutan, si Mae nibaritá nay adó na kuni Bogs tan saray ruwa tumaraná saran dumalan sa báyon natingkapan nin piaduan ra. Sawanin mag´in magulo sin si Anna sumblí ya kuni Bog ta rabay nan pakandaen a piaduan ra anamaet.

Sa kábaw pag´irgu-irguwan nan “Paano Na Kaya,” kai kami nakángap nin ambó maandá yaytin sini. Nangibwat ngámin a pag´irgu-iguwan sa ngámin nan pagpatágayan nan sini, ambo sa tutawon namantay a nangibaritá nin maandá ya. Balé anamaet rabay mi a mangibaritá nin ambó ya a talagan duká. Taman abaw a makapangakuan na, say matáreman nan sini sa kapanuratan na ket pinaratean a katumbawan na. Main ruwa ray nangyadian nin napanemtem mi anta maaraman nin mabyat a táreman tan kaingaran nan sini ; ket main saray maandá a daikleng udas nin isen balé nasidá sara tamó baná sa pakairguwan nin marngé mon anamanaet udino say umnu-umnon duká nin panuuratan na. Alimbawá, síno a main kuston isip nin manurat a pag´irguwan, “Ambó ka, síko?!” sa sini? Ay anaod, siti pa a marngé mon anamanaet sa pangisyayan mo kunan kaaduan mo. Napakaandá ya kumon no linaok ray saritá nin Tagalog. Nabiguan kami et kunan pagwaan tan pagpatágayan nan sini, wanra ket “mikakaadó kunan sangkaungan nin kamuko mo” nin tungtong balé nayadí yaytin tampor sa únan 20 minutos nan sini. Say tungtong nan sini nag´in ya nin pikaawayan ran karakter a mankikiten ra no say rilasyon ran kukamuko-nag´in-pikaaduan banglí sa paipulisayan tamó nan saya mísa naya nin pinakaaduan tampor a kamuko na a wanran “rebound.” Nakapasnep kami et, mambalé saray karakter ran sini a nangibwat iti ket main anamanay gulo sa pamalian ra? Tagalan matkap ti a gulo?

Nakángap kami kunan akting na ni Kim Chiu. Maong ya talaga laluyna sa kapákitan nan kaingaran na. Peteg talaga. Si Gerald Anderson anamaet ket makapoy yan bugá, main maandá a daikleng nin udas na balé main sayan páki-pákitan a kai ya gapo nin makaakis. No kai ya mabantog tuloy a mitra-miadó sa sini, main layi raruman lalaki nin aktor a nangikap nin karakter na ni Bogs. Dapot síkay sayay alaki nin kateprenan ra ni Kim-Gerald udino rabay mon talaga a mamin pikabyay sa sini nangibwat sa Pilipinas, no kai lingwanan mo ngámin a alalaki nin pag´irguwan tan palabasan mo yaytin saya. Banglí abaw saray “mikaaduan nin kamuko” a sini nin maaandá et.

Kunan sitin ribyu nan sini binyan mi tamó nin ruwa ray bituen.

Mambalé marabay muyo nin buyawen a sini:
-nangyadí kumuyo nin pinakaaduan a kamuko muyo, banglí makikapada kamo kunan siti
-kasan badánan kai buyawen a sini no alaki kan kateprenan kunra ni Kim-Gerald.

Mambalé kai muyo marabay nin buyawen a sini:
- mabatí kamon madayó no kai muyo marabay a pakapuyan a wanran “cheesy” tan sa ngámin nin sabtan makapaingar-ingaran a wanran “mussy”
- sabtan duká a panuratan na; makángap kami no ibaritá ran nin abaw udas a binyan ra.

Nipataros sa Binubolinao ni Oswí Castellano

Sumublí sa atágay

• • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • •

Si Pilipino a mammangwá nin sini nanalo yan Sangkaungan nin Diriktor itaw sa Cannes Film Festival

Center for Asian American Media

Nangibwat sa Channel News Asia
CHRISTINE ONG
Hunyo 4, 2009

Manila—Si Pilipino gumugumwá nin sini, síya si Brillante Mendoza, inawit nayay pagalangan sa Pilipinas nayadí yan nanalo a Sangkaungan nin Diriktor kunan sini na “Kinatay” a naipákit sa Cannes Film Festival.

Balé saray kababayan na ket kai raya layi lí nin makabuya kunan sitin nairgu-irguwan nin sini.

Si Mendoza kai naya et mamper a nanalo ya sa Sangkaungan nin Diriktor kayadí nan Cannes Film Festival.

Nayadí yan nakakalap maduká nin pakabalawan kunran bumabalaw a nakalamó ran “sangkadukaan nin sini sa nangyadian nan Cannes”, naisip na ni Mendoza kasaynan mailalwan nan manalo.

Wana, “Abaw duká nin balaw tan maumno saray sabtan masarapsap, balé nakapagawan ako. Sin inawit kuyay “Kinatay” sa Cannes, tandá kuyna nin mapaberé-berean ya baná sa pangyadian nan tungtong balé nailalwan kuyna a mabista nin mangyadí.”

Say rabay nan ibaritá a “Kinatay” a iniwá a wana.

Ipatutong nay nangyadí kunan sayay tububáyo a nakákitan nay sabtan kadukaan papatyan nan babayin uupaan a nadusawan tan napasuet rayan ubeten báyo raya pinuto-putol.

Imbis nakakalap nan sini a 10 muminuto nin man´umdeng saran mampakalapkapan baýo yan nakapaliwá sa Pransya, say kaptegan nin mákit sa mangyadí kai tinmekré maon kunran abaw nin bumabalaw.

Wana, “Wanin pa kumon a sini. Makapangwá kumon a pag´irguwan kunran bumubuyaw. Wanin pa kumon et a maisip ko nin mangyadí sa susini. Ambó yan may´an kumon kunran bumubuyaw.”

“Kai ko anamaet man´ilalwan a saray bumubuyaw nin lumwá sara sa pamabuyawan a wanran bumista yaynay kaingaran ra udino mabista yaytaw nin sini. No kai, man´ilalwan koy saray bumubuyaw a wanra nin , “nategé ako, makapaguluwan yain nin sini.” Matkap mon maingaran tan rumarem sa nakem mo. Siti pa a makapaptegan nin gawá sa sini.

Taman abaw umapes kunan sini “Kinatay,” kai ya makipanabang sa maalawang a ipabuyawan nin sini baná sa pamaliwaan ya tamó sa napilí nin pamag´adalan tan unibersidad.

Mateper na ni Mendoza nin saray bumubuyaw kai ra et maakó a sini nin mangipákit a peteg nin mangyadí sa byay ran tutawo.

Wana, “Maisip ko nin saray bumubuyaw main kumon a pilian ra tan say sini nin gaw´en ko ket sakalako saran sini a makapilí ra. Kunran gumugumwá nin sini, maisip ko nin nagwá kuynan pasakupan ko nin man´iratean ko saraytin tuntong ket kasan raruma a gumugumwá nin sini a matpel nin mangwá.

No kikiten mo saray mabilingan nin tumangan sa sansinakban saray bukod a gumugumwá nin sini a nadepenan sin saytaw nin 4 taon, saray sini na ket maakó ra lí sa pangyadian sawanin.

Nipataros sa Binubolinao ni Oswí Castellano

Sumublí sa atágay

• • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • •

Say Kataránan a Awro nan Star Trek (Kapapakuan sa Bubituen), Nagámuran yan $7 Milyon Dulyar Anggan $8 Milyon Dulyar Nayabi, ket Linabas Nayay Nini nin Wolverine sa Panglakuan nin Tutikit sa Buklas nan Byirnis

Nangibwat sa LATimes.com
BEN FRITZ
5/8/09

Say sini nin Star Trek mako yayna sa sabatan kalakyan nin kataránan kunan siti a duyon linggo.

Say ginwá ra anamana, say dupong nin Paramount, a sitin máran a waran klasik nin Franchise ket naganansya ya sa pisálean nan $7 milyon tan $8 milyon ngibwat sa yabi nan Wibis tan sa kanikngá yabi nin pamuyawan wanran makatanda sa magkumirso sa sini. Alalaki ya et dyan Iron Man sin sayan taon nin nalakó na tamó nin $5 milyon nin tutikit sa kapadan Wibis a tinmaraná anggan $102.1 milyon sa Linggo.

Makapákit et a wanan sayan tawo nin main kapagpyawan nin patandá sa box-office, ket sawanin nailakó naynan Star Trek dandani a $3 milyon nin tutikit kunan sitin buklas. Mirwa yain nin kalakyan dyan X-Men Origins: Wolverine a tinmaraná anggan sa $85 milyon, sa kapadan udas sin sayan linggo.

Balé anamaet, baná kunran saray marabay talaga udino saray wanran tagahanga sa Star Trek, sa nalakuan sa masakbay na pamuyawan kai na layi rabay ibaritá nin umalakin yan barámo sa Iron Man. Balé mákit sawanin nin a sangkapaspasan yan labasen a wanran lumakó yan tamó sa pasálean nin $65 milyon tan $75 milyon.

Saray pangungulon mangitayak (distribution executives) sa mankiuribay nin uistudyo, sísaray mawerweran kunran gawá ran kakiuribay ra, ket maaraman ra sa nakem ra nin mabistay ti a mákit ran sa masakbay nin nalalakuan.

Sara sa Paramount kai ra et nin nipatandá no ani a nailakuan ra udino kai ra et nin nangumbat sa pakatepetan nin kuminto.

Nipataros sa Binubolinao ni Oswí Castellano

Sumublí sa atágay