Dalan nan Deloitte a Pangikapan nin Ának sa Sansinakban
(Deloitte Street Child World Cup):
Nanalo yay Pilipinas kunran Brasil

Nangibwat sa World Correspondence
March 20, 2010
SANDY WINTERFIELD

Say únan-úna a Dalan nan Deloitte a Pangikapan nin Ának sa Sansinakban tinmaraná ana. Siti pa a pangikapan a wanran saker udino putbol ra a kasan pamalian ran ának a nangibwat sa adtiman sa sansinakban. Say Pangikapan (Cup) man´umikap sara itaw sa Duban, Bagatanan Aprika tan makiramá saray rarumay walon bubayan. Mikikalamó saray Pilipinas, Indiya, Tansaniya, Brasil, Nikaragwa, Riyno Unido sa Yukranya. Mampangyadí ti sa Marso 15-23 kunan sitin taon.

Saray umiikap nilaok sara, kunran saray lullaki tan bubbayi mikikalamó nin man´umikap, tan saray manalo nin umiikap máwiten ra lí sa bayan ra a makapángapan nin papanemteman a wanran trupio. Say pangikapan nataraná raya saray dupong a tawon katunungan sa UK a wanran Amos Trust. Sitin únan-úna a Pangikapan sa Sansinakban nangyadí yayti sa Bagatanan Aprika midmang sa manrumaté a FIFA (Fédération Internationale de Football Association) kunan sitin Hunyo. Sara sa Umthombo, sísaray dupong nin kasan uray a wanran NGO (Non-govermental Organization) a mantumulong kunran ának a kasan pamalian sa Durban, sara sa KwaZulu-Natal sísaray mantumulong kunan mampangyadian.

Say taranaan nan mampangyadian main nin kuwitis udino paputok tan naipákit a maandá nin kaungan ran ának a kasan pamalian. Main báyu-báyon patandá a sangkángapan a nangyadí bilang sa milagro. Say Pilipinas, saray “Umiikap nin Milagro” nanalo sara kunran Brasil, sísaray bayan nin putbol a katandaan sa sansinakban a nakapuntos udino nakabilang nin 6-2. Narngé mon kusto, say Pilipinas nanalo sara kunran Brasil sa putbol. Say panaluwan ra naliwa-liwawen saran maong. Saray umiikap nan Pilipinas napanguluwan sara kuni mangangaakay Jess Langadan.

“Madaeg a gawá ayi nan Tinikling kunan gawá ayi nan Samba anamain,” wanan babayin katulong sa panguluwan ran umiikap si Marielle Benitez, sin naipatandá ya sa makapanemteman nin pananaluwan ra sa Wibis nin yabi.

Nipataros sa Binubolinao ni Oswí Castellano

Sumublí sa babo