Paglulumbaan
 
AMIRIKA PAGLAKUAN PAKATANDAAN TIKNULUHIYA PAKAINGARAN IIKAPAN IISIPAN ARTI ISTILO PASYAR LUTÁ RURANAN
  Man´LUMALABAN (BUKSING)   |   Bilyar   |   Bulangan   |   GOLP   |   PaGLULUMBAAN   |   Putbol   |

Si Babayi nin taga Bolinao nagbalitok yan 4 sa paglulumbaan nan sansinakban

Nangibwat sa PIA Daily News Reader
Mayo 15, 2009

Lingayen, Pangasinan—Main báyon bituen sa palulumbaan a linumwá nin nangibwat sa Pangasinan

Si Lany Cardona taga babalin Bolinao sa Centrex-Virgen Milagrosa University Foundation (C-VMUF) síyay pangúnan mammanalo kunran kalamó sa Juniors Division (Kasakop ran anak-anaken) ket ápat yan nagbalitok tan saya yan nagplata sa paglumbaan nin 800 mitro-pangredan, 5000, 3000, 10000 tan 1500 sa National Open Athletics Championships (Pammanaluwan nan Bayan sa Buká Paglulumbaan) a nagyadí sa Mayo 10 anggan 12 iti sa pakapanatan na Narcisco Ramos Sports and Civic Center (NRSCC)-(Sintro nan Iikapan tan Kababali).

Sara sa C-VMUF, sísara tamó nin pakalalamuan a nangibwat sa Pangasinan nin nakapalumbaan sa pammanaluwan nan bayan sa buká nin paglulumbaan aya mákit saray lumulumbá a nangibwat sa raruman bayan.

Saray kalalamuan na ni Cardona nakapabilang saray ngámin nin 181, sara sa Far Eastern University (Unibersidad nan Adayó-Baytan) nakapabilang sara ngámin nin 105, mintras sara sa Unibersidad nan Baguio nakapabilang sara ngámin nin 91.

Kai naya nakapanalo a ikaliman balitok sa suyot nin lumbá na baná sa sabtan sakitan nin tyan na kanyá nikayupá yan mayadí nin nagplata.

Si Cardona mag´in yan layi a sayan kagsenan a matkap nin palilbian sa pangingikapan nan sansinakban kunan kapaspasan tan karangepan nin naipákit na.

Si Gubirnador Amado T. Espino, Jr. Tan si Alkaldi nan Dagupan Alipio Fernandez sinamba ran tumulong sa Sports Commission nan Pilipinas nin ipakasadyá saray kababali nin lumulumbá sa paglulumbaan nan sansinakban.

Mintras, saray lumulumbá, saray mangangaakay sa pangikapan tan saray mamapatandá sa PATAFA (Philippine Amateur Track and Field Association) nipasaya sara sa wanra nin sara sa NRSCC main kamimínan ra a kasakop sa sansinakban nin makapasadyá a lumulumbá sa paglulumbaan nan sansinakban.

Saray mag´uuray sa prubinsya nan Pangasinan tan saray mag´uuray nan Dagupan nikalamó saran nangakó a tulon awro nin buká paglulumbaan, siti pa a saya yan pakasadyaan udino papadaan yapó nin paglulumbaan kunan sitin rumaté nin South East Asian Games (Pangingikapan nan Bagatanan Baytan Asya) sa Laos.

Saray raruman lumulumbá taga Pangasinan nin nangiraté sa babali ra nin midalya sara si: Blessie Mae Sanchez, 400md kasakop nin babayi-balitok; Maricris Carolino, 400md kasakop nin babayi-plata; Junelle Gallebo 400md kasakop nin lalaki-balitok; Jonathan Leyga, 400 md kasakop nin lalaki-tansó; Rochille Corpuz, pamitlon lukso kasakop ran matuan bubbayi-plata; pamitlon lukso kasakop nin bubbayi-tansó tan Sarah Jane Pascua, shotput (mamasyon mabyat bula nin lata) kasakop ran bubbayi-tansó.

Sa 10,000 mitro nin lumalako makapada anamaet nin niúnan raya saray lumulumbá sa C-VMUF— si Vanesa Membrado sa kasakop nin bubabyi tan si Mark Anthony Niro sa kasakop nin lullaki. Sísaran ruwa nin lumulumbá nakaudas saran 1:03:54.3.25 tan 59:27.4.31 a kanepegan.

Saray kalalamuan nan Pangasinan nagbalitok saran 8, nagplata saran 4 tan nagtansó saram 3 sa tulon awro nin paglulumbaan.

Sara sa Unibersidad nan Adayó Baytan nakalap ray pammanaluwan sa kasakop ran matutua a nakapabilang sara ngámin nin 180 mísa sinmurnor sara sa Unibersida nan Baguio a nakapabilang sara ngámin nin 102 tan sara sa Armi (Buyot/Hukbó) nan Pilipinas a nakapabilang sara ngámin nin 81.

Nipataros sa Binubolinao ni Oswí Castellano

Sumublí sa babo

Patandá
sa Paglulumbaan

No main nin kuminto muyo kunran saraytin patandá, suratan muyay Binubolinao.com udino magpusto kamo sa Mag´irgo Atamo nin siksyon pigaw maikalamó saray kuminto muyo.

• • • • • • • • • • • • • • • • • • • • • • • • • • • • • • • • •

Síkami      |      Pakánuan      |      Nangyayadian      |      Inglis      |      Raruma