Maistro Tomas Calado
Poeta-Turbador

Nianakan:    Hulyo 3, 1856    Bolinao, Pangasinan Inadal:    Nurmal Linuuban:    Mangangakay 1880-1905    Vice Alkaldi 1906-1907 Patiti:    1916

Sinurat tan Tinurba:    1. Burak a Mariga    2. Pangungutana    3. Morena Carmen    4. Baswat    5. Kaiiliw    6. Samba    7. Kalapatin Manpangaripaspas    8. Malamang Adó    9. Dansa Milan    10. Naulilan Pusó

Burak A Mariga

Ni Tomas Calado*

O burak a mariga
Man´ibgan kan rway mata
Síkay liwa-liwa
Sa pusó a sidudusa

Bangno yumabina
No udas mibusyag ka
Say banglo moy kasan kipada
Manpismak lawas tana

Sin wangkuynan masanglap
A banglo mon manpismak
Nakem koy nadagdag a mako sa kumo mangikap
Iyaburoy mo pa kumon
A get´en ka tan yator

Sa pusó ko, sa pusó ko, sa pusó ko
Manpanáton nin labi
Sa kumo nisapon (nisápon)
Ta bukod mon peteg
Liwa-liwan magnayon

Naisurat et sa nuta nin musika.

*Main nin nangibaritá a kanayon ran Del Fierro a kai ya si Calado a nanurba kunan sitin kansyon no kai si Simon Del Fierro a nanurba kumon. Mantumágan ako kunran kanayon nin Calado no main tandá ra kunan sitin kansyon.

Maabig A Pasko
Ni Tomas Calado

Sitin yabin kai sukat elekan
Ta si misayas (mesias) nayanak yayna
Sin alas dusin yabin kasan kurang

Si Ninyoy mapangaranan
Si Emmanuel manpangilaban
Kutamoyna mangigalang
Ta pigaw adó nay magámuran
Sawanin ta naraté anay
Awron kasan kipada
Rumiriket atamon sarba
Ta si Misayas nayanak yayna

Kanyá naod nako kamidti kumuyo
Ta mamin maabig a Pasko
Tan kidawat aginaldo
Utsinta (Utyinta) uno sinsilyo, binungey unon patupat
Kanyá naod no main
Ibi muyoy na sawanin
Ta adayó et a Belen
A keen mi ngamin
A keen mi ngámin

Morena Carmen
(Kuralis Taaw)
Ni Tomas Calado

Sa sayay auron sangkakarmaan
Nákit ko in a rupan sangkabistawan
Tan sain a pispis a casan kiuribay
A bilang nin kuralis taaw

Síkay karmá a kai pagdwádwaan
A tinmubó sa makarmá a lugar
A bilang burak sa sangan rusal
A kai malanes makánuman

Kai ko nin tandá no mayin
Kinautibo moy pusó ko
Sayti kai ko katarusan
Sayti kai ko kaunanepan
No kai muyti akuen
Saya nin karaetan
Ay say patiti, magawá kon ipapalaway
Síkay burak a man´apsen a naynay
Síkay byay na nin Bolinao
No kai ka kaadap ay aninay bereng ko
O mutyá ran mata ko
Kádwan udet ta ingaren mo
A pusó ko sa kumo man´ay-ay
Say palaway muyna kumoy risibyen
Nan sitin man´pangdó anan náteng.

Malamang A Adó
Ni Tomas Calado

No isip-isipen koy adó mo sin saytaw
Saytaw say lugod mo nakain kapingmatan
Magbitkel ako kumon ket umbó katunungan
Wanin man rabay koyna dyan natin mankabyay.

Ay! aninan pait mangirangep kalamangan
Say sam´it pangakó mo biig liningwanan
Mapait dyan apro naraté piaduan
Sa lamang mo pulana ta síkoynay nisyay.

No umamengen koy kontra sa katunungan
Baná sa ginawá mo ibat sa kapubrian
Uno main anan báyo ibat sa mayaman
Gintang moy kadina (kadena) tan seer piaduan.

Ani magawá no siti nay karmá ko
Mangitpel ka lamang no maagwantawan mo
Síkan pubrin panyó punasen moy lwá mo
A imakrebey ana baná sa idap mo.

Ayin pusuan kadí makatpel sa sayti
No kai sin sumublí a piaduan a mabli
Mankabyay may adó siulialan pirmi no
Kasa gapon anggawan no kai say patiti.

Mayin lingwanan moy pangakó mo kungko
Umbó para intaw say wamo ket balitok muko
No tandá ko kumon ket saytaw ngámin palso
Mas´balé na udet kumon naglat anay byay ko.

Bituen aMaslag
Ni Tomas Calado

Mantumbuken mi yay bituen a maslag
A nangibwat sa adayó sa kumi nangayat
Sayti nin katutumbok kai mi balé tandá
No gumungan ririket o gumungan dyá-dyá.

Kuro
Ket wanin man ta teed ginagará
Ani may pirat´anan pakisalamatan ana
Ta ugalí umapes o puso umanos ka
Ta magkapagal ka yapó báyo ka uminawa.

O maslag a bituen andí pa nin ikuyep
A palaway mo inin ta síkami pay kikapet
Ta kasan kararaté no sa kumi isiblet
Ta kadó kami na lí lawas mangirangep.

Kuro
Mapilit man wadí a dirin kanakman
A kumapuet kumon sa main muyon palaway
Saytin bistan apes kasa lí kaugutan
No say palaway muyo sa kumi salembengan.

Kalapati
Ni Tomas Calado

Si si kadina kon baror bilang sayay traidor
Naklep ako sa idap a man´irangepen ko lawas
No mísa mantaynepen koy adó lugod mo sa kungko
Tampor makaipakná ko barag-barag anay lwá ko

Pari kayna inadó a mankagulwan nan sitin pusó
Ta unduen mo paytin man´irangepen bereng
Kai parayana sumublí a adó mo sa kungko sin masudi
Tiningkapan samban mati a piaduan tan mabli

Kalapatin mampangaripaspas itgen muin a kalelpad
Dungdungan may mampag´idap piawengen mo no aniyay sumadag
Tepeten mo kunan pusó no síno yay man´aduen na
Maririket o mabereng ya baná sa saytin nikagawá na

Pari kayna inadó a mankagulwan na nin pusó
Ta kai parayna sumublí a adó mo sa kungko nin masudi
O adó a mangaletan kumadani ka ta imatunan
Ta pigaw mon mákit a sayti kon kaberengan

Pari kayna inadó a mankagulwan na nin pusó
Ta unduen mo paytin mampangerangep bereng
Ta kai parayna sumublí a adó mo sa kungkon masudi
Tiningkapan samben mati a piaduan ta nin mabli.

Kaswat
Ni Tomas Calado

Peteg payti main
Andá patbang lenged ra nin hasmin
Nangayat pinanemtem tan ririket
A kai nin masamben
Kanyá naayat kamin
Dumaraw kikit a nangidáton nin iliw
Pigaw mapuryas moy kapipilit
Guston niglot (neglot) sa nakem

Sawanin muyna nin peteg mákit
A pruwibas nin apes kapipilit
Atágay ka man ay langit
Maglingkod ta syay manepeg
Ta kasan masudi sa mata
No umbó say síkan liwa-liwa
Sa pusó kon nipasaya nipasaya
Kai maglat sa anggan angga

Páno koy nalí kasi
No sayti ket kai maaksibi
A buluntadd kon magsirbi
A rinumsik sa pusó a diri
Pilit a sansyay sumili
Kaberengan tanan pirmi
Angawan dusan patiti
No síkay pangibwatan kasan bali