Rosalio C. Celi

Nianakan:    Agusto 30, 1906    Bolinao Pangasinan Mangatutua:    Don Clemente Celi    Donya Maurecia Castelo

Inadal:    Ika-VII grado Linuuban:    Pulis    Hipin Pulis    Mangangater Surat    Sanidad

Garaw-Garaw Mo
Kansyon
Ni Rosalio C. Celi

Kai mo para mauráran
Ririket ko kumo sin saytaw
Anta rinmiga ka sa arukwan
Mayin moyna nin linamang
Ibaritá mo paynay tutuo
Pigaw namaet nin tandá ko
Abirno dyá-dyá a maraté ko
Dapot no mariga kan mákit ko
Ket no wadí saytaw mo
Kasan kwintan gumereng ako
Ilalwan mo byay síkay kawánan
Angga nin leleg mabyay.

Sa Rigrig Taaw
Ni Rosalio C. Celi

Saya yabin sangkadedleman
Itaw ata sa rigrig nan taw
Ta sítan rway manpiaduan
Pangakó tan mikawánanan
Mayin udet bigrá nalingwanan
A pangakó mon sangkasam´itan
Adti saraynaytaw
Adti saraynaytaw
Pangakó mon mangawánan.

Adó A Naima-ima
Ni Rosalio C. Celi

Bukod koy naparsan duká kakarmaan
Bukod koy nangadó wantin narat´anan
Seseg ko nin naglingkod ginumungan kalamangan
Anta nasbuan anamaet tutuon pangawánan.

Ta kapada koy naod a sayay mimumula
O mamásek sa terminon raruma
Nimula kon adó simbuan nin paga
Ginumunga balé pinuti ran raruma.

Sin primiro nan Marso, awron napilí
Primiron nipangmula sa mangkawa-kawánanen biní
Sa madaem a lutá itaw ko nisukit
Tinmubó anamaet mabistay karsik.

Sin bulan Mayo ani nan kalamangan
A inirangep nan pusó kon kaudádwan
Ta pánon kai ko wanin si lutá nimulawan
Inikon rayan raruma ta kasa kon kágetan.

Liksyon yayti kuntamo tan sítamon lapag
Say basta mimula sa lutá a ublag
Tandá tamon peteg ta umbó yan burwak
Nimula tamo et anta ikon rayaynan gindat.

Alimbawa yayti tamo sa nangyadí kuna
Mayin nangadó ya sa main anan nakaúna
No pinipigaw na kummon báyo ya nimula
Kai ya kumon nangirangep wantaw a dusa.