Abdyas- Máran Tarato nan Biblya

Main narngé min patandá nangibwat sa Katawan: Main pinakalalaman a naibakí kunran pakababalyan nin nangibaritá, “Mibangon kamuyna, umaburoy tamon mako subag sa kuna nin lumaban” —

2 “Kikiten muyo, ipadaikleng takamo lí sa pibutlayan ran pakababalyan; sabtan mabalaw-balaw kamo lí. 3 Say karangasan nan pusó muyo, síkamo nin mampiikap sa lutak nin bubato tan namádeng kamon bali muyo sa ababon atágay, síkamo nin mangibaritá kunran kadiryan muyo, “Síno kadí nin makaíras kungko nin kumayupá sa lutá?’ 4 Taman lumpad kamo bilang nin agila tan gumawá kamon pugar sa pibutlayan ran bubituen, mangibwat itaw ipakayupá takamo lí,” nipatandá nan Katawan. 5 “No saray mananakaw nako sara sa kumuyo, no saray tulisan sa yabi—ay, animan duká mangyadí nin mantumágan kumuyo! —takawen ra tamó sa kábaw nin rabay ra? No main mamumutin ubas nako sa kumo, kai para saran kai mamatí a umnu-umnon ubas? 6 Balé páno edet masamsam ya lí si Isaw, saray naiyadi nin kayamanan na ket tinulisan raya! 7 Sarban kaayon mo dagdagen ra kamo sa ketegan; saray kamuko muyo manglangtaw tan daegen ra kamo; saray mangan nin tinapay muyo mangiláwan sara kumuyo balé kai kamo gapo lí nin mar´eb.

8 “Kunan siin nin awro,” nipatandá nan Katawan, “kai ko para nin sidaen saray madudunong nan Idom, saray main makapatarusan sa tutalutog nan Isaw? 9 Saray makikilaban muyo sa Teman malilímo sara lí, tan saray barang saya sa tutalugtog nan Isaw mapati kamo lí sa pinanatyan. 10 Baná sa pakaraetan subag kunan busat muyon Hakob, masakban kamo lí sa pakading´eyan; mapatyan kamó lí anggan-angga. 11 Kunan awro nin nakádeng kan adayó sa pakibiang antaran saray san´ili nitángay ra a kayamanan na tan saray banyagá sinumrep sara sa luuban nan padir na tan nag´sugal sara kunan Herusalen, bilang kan saya sa kunra. 12 Andí kamo kumon marabay-rabay nin pastangen kunan busat mo sa awro nan kadimalasan, udino rumiriket baná kunran tutawo nan Huda sa awro ran pakasidaan, udino marangas nin tuloy sa awro ran pakaguluwan. 13 Andí kamo kumon lumibot nin lumabas sa luuban nan padir sa kunran tutawo ko sa awro ran duká mangyádí, udino marabay-rabay nin pastangen sa kunra sa malakin idap ra sa awro ran duká mangyadí, udino samsamen a kayamanan ra sa awro ran duká mangyadí. 14 Andí kamo kumon tumágan sa pisisnaan nin patyen saray mampananakris sa kunra udino ipasublí saray natrá nin nabyay nin sa kunra sa awro ran pakaguluwan.

15 “Say awro nan Katawan adani yayna kunran sarban pakababalyan. Say ginwá muyo, ipagawá lí kumuyo; saray gawá muyo sumublí lí kunran ulo muyon diri, 16 Bilang kamon nanginom sa purod kon madyusan, kanyá sarban pakababalyan minunáno sara lí nin minom; minum-minom sara lí tan mag´in sara lí bilang nin kai sara gapo nag´in. 17 Balé sa Talugtog Siyon itaw lí a pakailigyasan; mag´in ya lí nin madyusan, tan si Hakob galemgemen na lí a pakatawiran na. 18 Si Hakob mag´in ya lí nin apoy tan si Husi síya lí a duta; si Isaw síya lí a tangkay nan pari, tan puuran raya tan mapatyan raya lí. Kasa gapo lí matrá nin mabyay a nangibwat sa Isaw.” Nag´irgo yaynan Katawan.

19 Saray tutawo nangibwat sa Negeb gámuran ra lí saray talugtog nan Isaw, tan saray tutawo nangibwat sa puon talutog galemgemen ra lí a lutá ran Pilityos. Gámuran ra lí saray lalawak ran Eprain tan Samarya, tan sara sa Benhamin galemgemen ra lí a Gilead. 20 Sitin pididinepan nin Israilita a napakalayasan nin itaw sa Kanaan galemgemen ra lí a lutá anggan sa kaday´an nan Sarepta; saray nakapalayasan nangibwat sa Herusalen nin itaw sara sa Separad galemgemen ra lí saray bubabalí ran Negeb. Saray mangangaon mulí sara lí sa Talugtog Sion nin mag´uray sara kunran talugtog nan Isaw. Tan mag´in ya lí nin pag´adian nan Katawan.

Ipatuloy et...