Saray Pakasubokan tan saray Pakatuksuwan
2 Ibilang muyon sabtan paririktan, bubsat ko sa pammemper, no kánuman nin umadap kamoy pakasusubok nin nagsikabarang, 3 baná ta tandá muyo say mansumubok sa pammemper muyo ket makatpelan yain maong. 4 Say pakatpelan ket matkap nan yadien a gaw´en na tano makapanakem tan makapasibulot kamo, kasan kurang sa animan. 5 Balé no kurang kamo sa kadunungan, dawaten muyo kunan Diyos, síyay mangibi-ibin pirmi kunran ngámin a kai yan mangkit nin pangurangan, tan maibyan ya lí. 6 Balé no dumawat kamo, matkap muyon tumeper tan andí kamo nin magdwadwa (mag´alangan udino magsapo), ta si sayan nin magdwadwa ket barámo yan daluyon sa taaw, mabagyu-bagyo yan siri. 7 Siin si tawo ket kai ya kumon nin umisip a mangakó (magámuran) yan animan a ngibuwat kunan Katawan; 8 Síyay ruwan isip a tawo, kai na tandá a gaw´e-gaw´en na.

9 Si busat sa ayuyupá nin kapapásar (bagay) ket ipákit naya kumon a ririket na kunan sitin atatágay nin pásar (pusisiyon). 10 Balé si sayan mayaman ket ipákit naya kumon a ririket na kunan sitin ayuyupá nin pásar, baná ta mangangga ya lí bilang sa burak nin dikut sa tatalon. 11 Ta lumwá yay awro nin mangirangrang nin sabtan amot tan makrian yay tanaman; say bubunga na ket maragrag ya tan say andá (bista) na ket masidá (madaeg) ya. Sa kapadan wanin, si tawon mayaman ket mangangga ya lí anamaet abirno sa kapresan nin gaw´e-gaw´en.

12 Makarmá yay tawo nin dumaer (umanos) sa pakasubukan ta no makaumdeng kunan subok, maakó na lí a kuruna (putong [tg] udino balangat [il]) nin biyay a nipangakó na ni Diyos kunran saray umadó kuna.

13 No natuksuwan ka, kai mo kumon wamo, " Si Diyos ket mantumuksuwan nako." Ta si Diyos ket kai ya makatuksuwan kunan duká, udino kai ya nin manuksuwan kunran sínuman; 14 balé si sayan sása a matukso, baná kunan karabayan nan duká, makaguruyen ya tan makaayat ya. 15 Mísa, kayadí yan umanak a karabayan na, manganak yan kasalanan; tan say kasalanan, no inmalalaki yayna, manganak yan patiti.

16 Andí kamo malingwen (maibulaan), bubsat kon diri. 17 Say ngámin nin mabibistan rigalo (parabor, sagot, rangkap [il] udino handog, gawad [tg]) ket nangibwat ya sa atágay, manyumupá kunan Ama a kalangitan nin palaway, síya et a kai ya sumili bilang ran dedlem nin umalis-alis. 18 Pinilí na min ib´yen a panganakan kunan saritá nin peteg, bangle no (salí no) mag´in tamo nin inin say unan bubunga a pinarsa na.

Manrumngé tan Mangaw´en
19 Bubsat kon diri, asikaswen muyoyti: Madalí kamo ngámin kumon nin rumngé, mapalná nin umirgo tan mapalná nin sumager, 20 ta say sager nan tawo ket kai ya maipákit a mapteg nin biyay a karabayan nan Diyos. 21 Kanyá, galaten muyo ngámin in nin kadudukaan a pirmi muyon gumaw´e-gaw´en tan palanaen tamon akuen a saritá a naimula sa kumuyo nin makapasalba (makapaligtas) et kumuyo.

22 Andí kamo tamó nin marngé kunan saritá tan lingwen (bulaen) muyon bukod. Gaw´en muya a wana. 23 Sínuman a rumngé kunan saritá balé kai na gaw´en a wana, bilang yan tawo nin kikiten a rupa na sa ispiho 24 tan, kayadí nan kikiten a bukod na, mako yayna tan malingwanan nan tampor a karupaan na. 25 Balé si tawo nin mangimatonan sa gan-gan a kasan kurangan nin mangibin kaligtasan, tan tumuloy yan gumaw´en ti, kai na linwanen a narngé na, balé gaw´en na-mabindisyunan (makakarmaan) ya lí sa gaw´e-gaw´en na.

26 No sínuman nin ibilang nayan bukod a mapteg (rilihyuso) yan tawo ket kai na masalipné (mapalná) a dilá na, ket malingwen (mabulaan) yan bukod tan say pammemperan na ket makapoy ya (kasan sirbi na). 27 Sa pammemperan a akuen nan Diyos tamon Ama ket saytaw say maringgas tan kasan kurang tan wanti et: asikaswen muyo saray naulila tan saray nabalo sa gew´gewan (pangidapan udino panguluwan) ra tan andí kamo makasamaan kunan sitin babon lutá.