Ikarwan Pedro 1

1 Si Saymon Pedro, sumirbi ya tan apustol ya kuna ni Hesus Kristo,

Kunran sara, kunan pakamaungan nan Diyos tamo tan si Jesus Kristo nin mangisalva, nin tinmangap say katepran nin mabli bilang sa pakatepran tamo:

2 Grasiya tan katinekan  ipakaisen kumuyo in abaw sa pakatandaan nan Diyos tan si Hesus a Katawan tamo.

Ipapagé Yay Kunan Pakayabenan Na Tan Pakapilínan Na

3 Say kapangyadian a nangibuwat sa Diyos ket naibi kuntamo a ngámin nin matkap tamo sa biyay tan say pakasantuan kunan pakatandaan tamo kuna tan síyay nangayab kuntamo sa kunan karangalan tan kamaungan na. 4 Kunran sarayti ket pinaibyen na tamo say sabtan laki tan mabli nin pangakó na, tano kunan sarayti ket maikalalamó kamo sa pakaugalian a nangibuwat sa Diyos tan makalayas sa kadudukaan nan babon lutá nin nakaguwá sa kaduká nin pakararabayan.

5 Baná kunan siti, sarínen muyon talaga nin ikalalamó yay pakatepran nin pakamaungan; tan sa pakamaungan say pakatandaan; 6 tan sa pakatandaan say pakatuluyan; tan sa pakatuluyan say pakasantuan; 7 tan sa pakasantuan, say pangingádon pakabusatan; tan sa pangingádon pakabusatan, say adó. 8  Tano makaikon kan wanti umalalakin kaugalian,

kai kamo lí nin kasan serbi tan kai kamo lí kasan makaguwá sa pakatandaan nan Katawan tamon Hesus Krsito. 9 Balé no sínuman a kasan wanti nin kaugalian, kai na makákit nin maong tan bulag ya, tan nalingwanen nayna a nalinis saray kasalanan na intaw.

10 Kanyá, saray kabubsat ko, sumabik pa kamo ta makapteg yay pakakayaban tan pakapilínan muyo. Tano gaw´en muyo sarayti, kai kamo gapo nin manabó, 11 tan makatangapen muyoy pasalubong  nin mayaman sa anggan-anggan pag´adian nan Katawan tamo tan síya mangisalba kuntamo si Hesus Kristo.

Say Mangyayadí Nin Nasurat Sa Kasuratan

12 Pirmi ko lí nin ipanemtem kumuyo, saraytin bubarang, abirno nin tandá muyoy na tan abirno nin maksaw yayna a kapetegan nin isen kumuyo sawanin. 13 Maisip ako a kusto nin ipapanemtem ko kumuyo abirno makáno a umikap ako sa kamínan (tulda) nan sitin kalalaman, baná ta tandá ko nin ibatí kuyalí, bilang sa naipaliwanag na kungko ni Katawan atamo, si Jesus Kristo. 15 Tan rabay kon manguwá ngámin nin malasaki (magsakip) sa ipákit tano nayadí ana lí a pakalakwanan ko ket síkamo lí a mapanemtem muyuyti pirmi.

16 Kai kami nin tinmumbok sa mau-maong a nakaguwa-guwá  nin tutarúman sin sayti  a naipabaritá kumuyo kunan kapangyadian tan sa pakaratean nan Katawan tamo, si Hesus Kristo, balé sítamo a napakákitan nin pakapag´adiyan na. 17 Ket síyay nakakalap nin pakapetegan tan pakaraywenan  a nangibuwat sa Diyos nin Ama sin sayti nin busis a rinmaté kuna nin nangibuwat sa Pakapag´adiyan nin Pakaraywenan, wana, “Siti yay Anak ko, síyay kaadó ko, kunan síya a narigsawan ako. 18 Sítamo anamaet nin nakarngé kunan sitin busis a nangibuwat sa kalangitan sin saytaw nin kinalalamó  tamo yadtaw sa talugtog nin nasantuwan. 

19 Tan makamain tamon saritá ran saray mangibaritá nin mangyadí ket naipaliwanag talaga, tan maguwá kan maong lí no umasikaso ka kunan siti, bilang sa silaw nin sumileng sa madedlem nin kamínan, anggan sa pakataranaan nan awro tan sa pakabangunan nan bituen sa kumuyon pupusó. 20 Sa ngámin, matkap muyon matarusan nin kasan mangyayadí nin Kasuratan ket nangyadí bana kunan katandaan nan sayay mangibaritá nin mangyadí. Ket say mangyayadí kasa gapo nin pakataránan na sa nakem nan tawo, bale saray tutawo a nag´irgo sara nin nangibuwat sa Diyos bana sa panangiyakay nan Ispirito Santo.