2 Kagayeman kon diri, ikapadasal kata tano makaparigsa ka sa makaipaong nin ingar mo tan sitaw ngámin a makaipako kumo nin maong, bilang sa kumon kararwa makaipamaong ya anamaet. 3 Narigsa ako talaga sa napakarngé ko kunran uumnon bubsat nin nangibari-baritá kungko say pakamaptegan mo sa kapetegan tan say pakatuluyan mo nin lumalako sa kapetegan. 4 Kasan marigsa ko no kai sa pakakarngé ko nin saray ának ko ket manlumalako sara sa kapetegan.

5 Kagayeman kon diri, síka a mapteg sa mangaw´en mo para kunran kabubsat, bilang et kai mo sara makatandaan. 6 Nibaritá ran sambawan sa pakaaduan mo. Maong lí a gaw´en mo sa ipabakian mo sa kunran dalan nin makaalaga kunan Diyos. 7 Baná sa kagagaraan nan Ngaran naku-nako sara sa liwá, kasan mantumangap nin tulong sa kunran ambó nin mamper. 8 Kanyá ipakákit tamoy kanakeman a maabig(pakamaabigan) kunran katutawo tano makagawá atamo sa kapetegan.

9 Sinurat kuyay sambawan, bale si Diyotripis, síyay talagan marabay nin mainúna, kasan rabay nan makagawá kuntamo. 10 Tano rumaté ako, ipabaritá ko analí a ampaggaw´en nan kadududkan nin tyismis naipáká kuntamo. Kai ya gapo nin makarabayan, magkai ya et sa sumalubong kunran kabubsat. Ipunden na saraytaw nin marabay nin sumalubong ket ipalikwanen na saraet sa liwá nan sambawan.

11 Kagayeman kon diri, andí kamo umarig sa kadukaan bale sa kamaungan. Sínuman a gumuwá nin kamaungan, síyay nangibuwat sa Diyos. Sínuman a gumuwá nin kadukaan, kain naya nákit si Diyos. 12 Si Demitriyes, síyay pinairguwan ra, sara ngámin, nin kamaong ya—bilang sa kapetegan nin bukod. Sítamo anamaet ket pinairguwan tamo sa kamaong na tan tandá muyo sitin pakaibaritaan tamo a peteg ya.

13 Abaw a suratan ko kumuyo, bale kai ko rabay nin isurat sa pagsurat tan sa tinta. Mangapos ako nin rumaté a makákit ako kumuyo lí tan umadap tamon makapag´irgo.

Say pakapatinekan isen sa kumuyo. Saray kagayeman tamo iti ket ipáwit ray kamaabigan (kakumustawan) ra. Umaabigen mo saray kagayeman isen sa ngaran ra.